فيليب كان حالف انه يبهدلني لو دخلت الفيلم لوحدي قلتله اطمن الفيلم ده مخصوصا هادخله معاك وابقي سلملي علي الوحده الوطنيه
بعد مانخلصه نطلع ندبح في بعض ونولع في الفتنته الطائفيه وسلملي علي مصر ياسمعايل بيه
اتاخر بسلامته وانا مستانيه جوه المول وكنت هاولع فيه لاني بحب ادخل السينما بدري
طبعا انا اتكلمت كتير عن الفيلم وشايف اهميته للغايه لاني اكتر شخص متوقع ان البلد تتعرض لحرب اهليه ومش هتبقي نابعه من اسباب دينيه بل بالعكس هتبقي نابعه لاسباب طبقيه ونفسيه
هتبقي اشبه بالحروب الصليبيه بحجه الدين وهي ابعد ماتكون عن الدين وهتبقي اشبه بعمليات تنظيم القاعده وهي ابعد ماتكون عن الاسلام
ماليش دعوه بقي ان نجيب ساويرس يمتلك
35 بالمائه من اقتصاد مصر
ولا معظم الاقباط جواهرجيه وهمعاهم فلوس
ولا قناه الحياه الفبطيه وصرخات اقباط المهجر
طيب ماحنا نفس الكلام
عندك شيوخنا بتوع الفضائيات طول الوقت بيسبوا 100 مله ويلعنوا دين النصاري ويمسخروا بهم طول الوقت
وبعدييييييييين؟
اخرتها ايه؟
امسك ساطور وادبح المسيحي وارميه في البحر ؟ هو ده الحل؟
لازم كلما نقعد ونتكلم
انا ماليش اي عداوه مع الاقباط بل معظم اصدقائي ايام الجامعه كانوا اقباط مع اختلاف الملل سواء بروتتستانت او ارزوكس
لكم دينكم وليا دين غير كده اصحاب وزمايل ونتكلم ونخرج ونتفسح وعلي اتصال
انا ليا بشخصيه اللي ادامي ماليش دعوه بيعبد ايه ولا بيصلي لمين
كلنا بنصلي لاله واحد معروف مساله بقي تكفيره او رجمه دي حاجه اسيبها لربنا مش لبشر
قال يعني المسلم ابو دقن وزبيبه لغايه سرته اللي بيصلي 24 ساعه هيدخل الجنه؟ باماره ايه
ماحدش ضامن اي حاجه
ثم ان ممكن يكون البيه اخلاقه زي الزفت ولا يتمتع باخلاق المسلمين ولا سماحتهم بيادي فروض وبس
واظن اننا شوفنا ناذج قذره زي دي كتيره
نفس الشيء في القاباط كتير جدا معلقين صلبان وهعم اصلا عمرهم ماراحوا كنيسه ولا عتبوا بابها
معظم النقط دي اتكلمت قيها مع فيليب بصراحجه وهو عارف كده
فيليب مش متدين اوي ومش متعصب
بصراحه انا عاوز اثبت لناس كتيره ببتهمني اني مصاحب اقباط علي حساب ديني لكن باقولهم ده مش صحيح
انا صحيح بت عندهم وفطرت في رمضان عندهم ووقفوا جنبي وقفه رجاله وانا وقفت برده معاهم
لكن لا يمكن ابدا ان ده يغير مني ولا من هويتي الاسلاميه
انا طول الفيلم كنت بس خايف علي مشاعر فيليب انه حد يعلق عليه ولا علي بعض الكلمات وكنت بحاول اشغله عن ده واقوله اضحك يابني عادي مانا بتريق برده علي الهبل اللي بيتريقوا عليكم
الحمد لله انه مازعلش واتفق معايا ان النهايه بشعه جدا ومخيفه وبصراحه قاللي اكتر من مره انه عاوز يسيب مصر ويروح امريكا هناك عند اخوه لانه زهق من البلد ومن تخلف الناس وتعصبهم
انا عاذره طبعا لكن المفروض يصبر ويخلي عنده امل ان الناس عقلها يتنور ويصبحوا اكثر تسامحا
وان كنت اشك في ده
