الموضوع ده دراسه اجتماعيه عامه علي جزئين الاجزء الاول في مدونه الزميله
"
حقا ان زماننا ليس زمن الرجال فقد ولي وذهبت ايامه"
اي اتنين متزوجين بيبقوا نفسهم يبجيبوا ولد قبل مايبجيبوا بنت
ليه؟
لاسباب عديده منها انه هيبقي راجل ومسئوليه ومنظره وفشخره وكيد الاعادي
واول مايتولد الولد تلاقيه بياخد رقيه من الحسد والاهل يبخبوا الخبر لفتره ويعملوا له حجاب علي ورك نمله
وده كله علشان ولد
طبعا بيغدقوا عليه في اللعب والدلع لغايه سن معينه وطلباته كلها مجابه وفسح وهيصه بقي وياسلام بقي لو كان له اخت اكبر منه بحبه خلاص كده بقي في البلاك ليست وانسي هتبقي مكروه طول عمرك
وده مش ذنبك انك اتولدت ولد وبتتعامل معامله خاصه افضل من البنت لكن الناس هي اللي حطتك في الوضع الحرج ده
علشان كده بنات كتير تشتكي ان المجتمع مجتمع زكوري وبيفضل الولد علي البنت
في الزمن القديم كان الولد بيتربي تربيه خشنه بعد ال 10 سنين علي انه راجل البيت ولو غلط يتضرب ويتعاقب وكل حاجه بيعملها غصب عنه وممالوش راي ومايقدرش يعترض علي راي والده
وده كان بيموت فيه جزء من روحه رغم انه مافيهاش حاجه لما يطيع والده لكن كان ممنوع عليه حتي انه يبدي رايه او يقول هو عاوز ايه
وكان مطلوب انه يبقي مسئول عن كل حاجه ويبقي هو الراجل في غياب الاب ومطلوب منه انه يرعي امه واخوته وطلبات البيت
ده كله مافيهاش حاجه
لكن انه يبقي مطالب انه يكون صوره طبق الاصل من والده؟ ليه بقي افرض انه عاوز يبقي حاجه تانيه او يمشي في طريق تانيه خالص
ده كله بيخلق جواه هم تقيل لو هو نفسيا مش مستعد وممكن يخلق منه راجل بجد قادر فعلا علي تحمل المسئوليه
لكن في الحالتين بيتولد عنده عقده من مساله الاختيار هتخليها تطارده طول حياته
وهتخلي عنده عقده حب السيطره
وده للاسف مش موجود الا في العالم العربي وبس
لو شخصيه الاب ديكتاتوريه بحته هتغلي تماما شخصيه الابن وهيطلع طول عمره ماعندوش شخصيه ومتردد وهيعاني في زواجه لان زوجته هي اللي هتبقي مسيطره عليه
لو الاب مدي حريه زياده عن اللزوم للابن غالبا هيطلع فاسد وهيستغل سلطاته بشكل سيء وهيبقي شخحصيه انانيه تافهه كريهه
لو الاب مسك العصايه من النص وده المفروض هيعرف يطلع ابن معتدل وناجح وديمقراطي
اللي سبق ده كله ماينفيش ان الرجل الشرقي بيحب يكون هو اللي بيتولي زمام الامور سواء كان ديمقراطي او ديكتاتوري
مهمها اختلفت طبقاتهم او مستواهم الاجتماعي والثقافي
اه احنا كرجاله بنجب السيطره ممكن ساعات نسيبها علي البحري ونسيب شويه حريه لكن اوقات معينه لازم احنا اللي نتحكم في كل حاجه ماينفعش نسبب للحريم المسائل مش علشان احنا متكبرين ولا عندنا عقده نقص
ده شيء فطري موجود جوانا في طبيعتنا ككائنات ذكوريه
منها انه بيحب يكون هو التحكم في مصروف البيت واختيار العروسه واختيار المنزل وحتي طبيعه علاقته بزوجته الجنسيه بيحب يكون هو المتحكم فيها غاالبا
الراجل مش عاوز حد يغصب عليه ولو حصل فده لو هو اصلا موقفه ضعيف او مكانته ضعيفه في حالات نادره زي السياسه او الدين او العمل
في السياسه طبعا مايقدرش يقول حاجه للحاكم خوفا منه ولسبب تاني ان الحاكم بيمثل صوره مشابهه لصوره الاب المحفوره في دماغه واللي المفروض مايخرجش عن طوعه بالاضافه ان الرجال في العالم العربي متعودين انهم يبقوا محكومين ومايتخدلوش ابدا في امور الحكم الا لرجال الساسه واصحاب المناصب ومراكز القوي علشان كده الراجل بيحب يكون هو صاحب الكلمه الاولي والخيره في البيت وهو الناهي الامر وبس
زمان كان فيه حاجه اسمها سي السيد واللي خلدها الرائع نجيب محفوظ شحخصيه جميله خلبت لب اغلب الرجال في العالم العربي انا عن نفسي شايفها شخصيه رجاله زمان اللي بجد
انا ماقصدش هنا اني ابقي متعصب لبني جنسي لكن فعلا الشخصيه دي تستحق ان الواحد يحترمها رغم انها اتسببت في اختلال نفسي لابنائها وفوبيا من مجرد زكر اسمه
لكن رغ م كده الشخصيه دي ضحيه لتربيه صارمه وبتتكرر في الاجيال المتواليه بعد كده رغم انه هو له حياه تانيه لاهيه حنون ومرح ومسخره وكريم وهلاس
علشان كده رجاله كتيير بيحلموا بالسلطه سواء سياسيه او دينيه علشان يشبعوا رغباتهم المكبوته وطموحاتهم
لكن حاليا اصبح الرجاله يرثي لهم
زمان كنت تلاقي رجاله بجد بيحملوا معاني واسامي الرجوله
بدايه من نبينا الكريم والصحابه وعمر بن الخطاب مرورا ب عمر بن عبد العزيز ويوسف بن تاشفين وصلاح الدين الايوبي ومحمد علي وعمر مكرم واحمد عرابي وجمال عبد الناصر ( مع اختلافي فه بكثره واعتراضي عليه لاسباب خاصه) و
اخيرا السادات
زمان كان الست تموت في اي حاجه لها شعر ويطلع منها شويه دخان
دلوقتي بيموتوا في مهند
الست بطبيعتها ضعيفه مهمها حاولت وانكرت وادعت انها بقت اقوي حاليا من الراجل
علشان كده بتحب الراجل اللي بيشخط فيها حتي لو ادعت انها غضبانه او حست بالاهانه لكن من جواها هو ارضي شعورها الانثوي بالاحساس بالضعف وهي طبعا عمرها ماهتقوله كده علشان مايسوقش فيها ويركبها لكن لو وصلت لحد الضرب هيبقفي فيها كلام تاني
صوره الراجل الازليه بتاعه رجل الكهف وهو بيجر الست من شعرها وداخل بها الكهف مفارقتش الستات والرجاله ورغم انها صوره تثير الاشمئزاز لكن بعضهم بيحلم بها لانه اصلا عنده رغبات ماسوشيه عميقه من الطرفين علشان كده في ستات بتحب انها تتربط وتبقي مستسلمه تماما للراجل اثناء المعاشره الزوجيه خاصه لو كانت بتحبه فعلا
ورغم كده تلاقيهم بيطلعوا عليك ويقولوا لك الراجل ده كذا ولا كذا ولا كذا
ياسلام
حاليا ااراجل عربي ياما حاله يصعب علي الكافر نظرا لان نسبه كبيره منهم اصبح عنده مشاكل جنسيه وده الشيء الوحيد اللي كان بيحاول يثبت نفسه فيها ويثبت رجولته نظرا للتلوث وكثره المشكلات والاحساس بالقهر والمراره في انظمه عربيه مستبده وظروف معيشيه صعبه وحاله ماديه ضعيفه
والراجل لما يفقد حتي نقطه التميز بتاعته علي الست في وضعه الجنسي بيصاب باالاكتئاب وبيحاول الفرار من البيت وبيتجنب الجلوس مع عيلته ويتجنب التقاء نظراته
ياما بقي يقرر انه يسلم نفسه لوسائل الاعلام وصناعه النجم بانه يتقلد بعض المظاهر الناعمه والناعسه وتسبيبل العينين والصوت الهامس والابتسامه الجذابه حتي يكون في الصوره ومايتركنش علي جنب
يعني في الحالتين ضايع ضايع
لما اتعرض مسلسل باب الحاره ومسلسل صراع علي الرمال وكلاهما اعمال سوريه خلبت لب العالم العربي كله نظرا لشخصياتهم الرجوليه البحته الخلابه الرجال ذو الشنبات والدقون والصوت الجهور والجمهور قال والله زمان
وده بيعكس الحاله المزريه النفسيه اللي وصل لها الناس حاليا انهم اصبحوا يفتقدوا معني كلمه راجل
لا يخفي علي احد ان الراجل الان ساب مقاليد الامور للست في كل حاجه في تربيه العيال ومصاريف الييت وبقي مضطر انه يسسيبها تطلع تشتغل وتصرف عليهم لان الزمن مابقاش زي الزمن واستسلم للنداءات العاليه بحقوق المراه
تراجع عن مكانه في قياده الدوله وترك جزء للمراه هو طبعا مش غبي علشان يسيب لها كل حاجه بس قال ارضيها باي حاجه مؤقتا علشان تبطل زن
وفي نفس الوقت هو بيحقد عليها لانها نجحت واتحدته وغلبته وبتلقي مسانده اكتر منه في جميع دول العالم ماعدا الدول المتخلفه ودول العاللم التالت
اي راجل بتحكمه امراه في العمل او الحكم بيبقي مغلول منها لكنه بيكتم جواه وده من حقه لان مش هو ده الوضع الطبيعي للراجل
صحيح الست بتتعب اكتر وتشقي وبتتحمل برود الرجل وقسوته ونزواته ومغامراته
لكنه برده الراجل بيتخنق من الست احيانا ويبقي عاوز يرمييها من الشباك لما يلاقيها بتتصرف بغباء او تعمل زي الستات الفاضيه في موضوع الرغي والنميمه ولوك لوك لوك لوك
بالاضافه ان اعصابه مشدوده دايما في لقمه العيش والشغل وعامل هم بكره
اركب اي مترو او اتوبيس نقل عام شوف الرجاله ماشيه ازاي مكشره مهمومه مكتئبه بيتابعوا اسعر الغلاء والمرتبات والحوافز عاملين هم مصاريف المدارس والكليات ومصاريف البيت والاكل واللبس وياعيني بقه لو حد عنده بنت علي وش زواج لازم يجهزها احسن حاجه علشان ماحدش يتريق عليه
وفي نفس الوقت ان الراجل بيمر بحاجه اسمها ازمه منتصف العمر تلاقيه بيبص لواحده تانيه غير مراته او ارتبط عاطفيا فعلا بواحده تانيه وهو هنا مش بيخونها لكنه بتكوينه العاطفي الراجل ممكن يحب اكتر من واحده في نفس الوقت وبنفس المقدار وده شيء صعب ان عقليه الست تتفهمه لانها بتبص علي انه بيخونها او بيبعمل كده لانه شايفها فيها حاجات ناقصه او هي بدات تدوب ادامه وتختفي تماما وده مش صحيح
الرجاله مايهونش عليها الست اللي وقفت معاه طول عمره ورافقته في الكفاح وعمره ماهيتخلي عنها لكنه يعمل ايه في قلبه لو فعلا قابل واحده تانيه خلبت عقله ولبه
ياما هيواجه العالم كله ويتحداه ويتحمل العقبات
ياما يكتم جواه ويصبر ويمكن يبتدي يكتئب كمان
لكن ماباليد حيله
لكن في نفس الوقت مايقدرش يعمل لها حاجه لان الست لها قدسيه خاصه في المجتمعات العربيه خاصه المصريه ويمكن هنا في مصر الست بتتعامل كويس احسن من بلاد تانيبه زي الاردن وسوريا اللي فيها جرائم الشرف نسبه عاليه او دةل زي السعوديه اللي الست مش واخده حريتها خالص
فياريت ماتجيش ستات وتقول فينك ياحريه
انتم دلوقتي واخدينها تاالت ومتلت اه صحيح ان في طبقات كتيره لسه ماوصلهاش الكلام ده وخاصه في الارياف والاقاليم
لكن النخبه الحاكمه والمتعلمه في ايدها انها تتغير كل حاجه لو اتحركوا
وفي نفس الوقت هجوم شديد دايما علي الراجل
ده الراجل بيتحرش بينا
ده الراجل متعصب ضدنا
ده الراجل بيتحكم فينا
ده الراجل مطلع عينينا
فين ده؟
الست لو شايفه كده تخلع زوجها ولا تفك من خطيبها ولا تديله بالجزمه لكنها بس بتحب ترمي كل حاجه عليه
فيه مثل بيقولك الراجل مايعيبهوش الا جيبه
للاسف ده كان زمان وخلص
دلوقتي الرجاله بقت زي قلتها وهينقرضوا
من كتر الاناث في مصر بقيت مستغرب ده احنا بقينا قليلين اوي يارجاله
شوف اي مدرسه كميه البنات اللي طالعه منها او اي جامعه هتصعق من كميتهم
هتقول هيتزوجوا دول ازاي
ده لازم الواحد يتزوج اتنين علي الاقل علشان يحل مشكله العنوسه
لكن ازاي بقي الستات مش هيرضوا وانانيين كمان يقولوا لك تتزوج عليا ياراجل يامنيل
لا خلاص خلي زميلتك ولا صاحبتك ولا جارتك تعنس وافرحي فيها بقي
الكلام ده مش من عندي بالمناسبه
وبعدين ييجوا يتهموا الرجاله عينهم زايغه
طبعا عينهم زايغه
من كتر مالحريم والنسوان بيعملوه في نفسهم وبيتفننوا في ده
وكمان ماحدش ييجي يلوم واحد قاعد ادام التلفزيون وبيتفرج علي هيفاء وهبي وسايب مراته
انا عن نفسي معجب بهيفاء وهبي ماخبيش علي حد علشان ست فعلا بتهتم بجمالها رغم انها ساعات بتفرط منها وبتتحول الي مبتذله وتافهه واصبحت سلعه اعلاميه متدنيه وبتحرص علي القاء الضوء عليها وبس
ماهي مراته هي السبب اصلا هي اللي مش مهتمه بنفسهها
هتقولوا مالراجل كمان لازم يهتم
لا الراجل بيهتم ولو عاوز يهتم هيهتهم بس الست تجاريه بدل ماهي عماله تتخن وتكشر في وشه علي طول وماتكلموش الا علي الطبيخ والجيران
بيتخنق منها ومن دماغها ومن منظرها
وتلاقيه يبيص لبره ورغم انه هو مزودها حبتين وبيلوم الست علي كل حاجه وبيكسر في نفسيتها
لكنه فعلا لو بيحبها هيحبها زي ماهي وهيرضي بها
لكن برده ده مايبعدناش عن اسباب الكراهيه المتبادله مابين الجنسين
هل هي غيره من النجاح او حب السيطره او اسباب قديمه او فطريه
خلينا واقعيين الراجل بقي مظلوم جدا الفتره الاخيره ومش ذنبه انه بقي مهمل وجاهل وبيتغاضي عن كوارث كتيره بتحصل وانهيار في المجتمعات وتخليه عن دوره الهام
الراجل محتاج ترجع ثقته بنفسه شويه ومحتاج مسانده قويه من المجتمع محتاج حد يرفعه من علي الارض ويحتويه ويخليه يفرغ همومه
الرجاله المتمثله في الشباب اللي بيتبدل في اشغل والهجره ويموت في عرض البحر علشان لقمه العيسش
الشباب اللي مش عارفين يتزوجوا واللي اغلبهم بيشكل 60 بالمائه من المجتمع طبقه متوسطه او اقل من المتوسطه مالهاش وسايط ولا عربيه ولا فيلاا وعايشين اليوم بيومه
الشباب اللي اي امين شرطه حقير او ظابط داخليه يهزءه
الشباب اللي بيتفرج علي البنات الشيك والمرفهه ويتفرج علي الشقق الغاليه ويدفن همومه في سينما تافهه هتضحكه في ساعتين او يروح يلف له سيجاره ماريجوانا
او يروح يتفرج علي فيلم بورنو او يقعد علي القهوه يلعب دومينو
او يتزوج زميله له عرفي ويسبها اول اول ماتحمل منه او تقوله عريس متقدم لي
وانا بتفرج علي الفيلم العظيم حب فوق هضبه الهرم شوف هو معمول بقاله 19 سنه ولبغايه دلوقتي هو فعلا بيعبر عن اغلب شباب جيلي بصدق وبصوره انسانيه خلابه
الشباب اللي بيتعصب لماتشات الكوره بيفرغ فيها جزء من اللي جواه
او تلاقيه بيتفرج علي افلام اكشن او يحب السرعه في السواقه ويخاطر بحياته
ده كله مكتوم جواهم علشن هم عارفين ان بكره مش مضمون حاليا
عارفين ان حياتهم هتبقي زي الزفت ومش متختلفه عن حياه اي واحد عنده 35 سنه ماشي في الشارع
شباب قرر يقول لا للزواج لا للاحلام لا لاني ابقي راجل
الشباب دول مشروع رجاله بس متعطل ومتاجل
وبعد ده كله تيجوا تقولوا فين الرجاله
قبل م تاحسبوا الرجاله حاسبوا الظروف والمجتمع
اه ملحوظه اخيره انا مش متعصب لجنس الرجال انا بس عملت لكم دراسه عامه وتحليل لكلام رجاله كتير باسمعه منهم بينهم وبين بعضهم
