الاسبوع اللي فات كان اكتر اسبوع مرهق بالنسبه لي رغم اني كنت المفروض اخده اجازه اريح فيه قبل معمعه امتحانات الماجستير لكن كل يوم كان فيه سفر وشغل ومشاكل بدايه من مشكله اتنين اصحابي فسخوا خطوبتهم وعمتي اللي دخلت العنايه المركزه ومشكله الشغل عندي والالي حصل في الجامعه عندنا والمواعيد اللي حاولت اوفقها بين الشغل والحاجات التانيه ويوم التلتاء الطويل جدا بتاع وفاه حفيد الريس والخنقه من الاستعدادات الامنيه المبالغ فيها والخبر الفقيع بتاع اسقاط الجنسيه والانفجار اللي حصل في مخزن الاسلحه في اساعيليه جنب معسكر واحد صاحبي وحكم بتاع هشام طلعت
حاولت والله افك عن نفسي وكنت مشحطط نفسي في ميت حته شويه في اكتوبر وشويه في مصر الجديده ويوم مارجعت الاربعاء للبيت بعد اسبوع كامل من السفر الزقازيق كنت مستهلك جدا
لقيت طارق بيفكرني اننا هنسافر الخميس والجمعه اسكندريه قلت اشتات انا فعلا لازم اغير جو بسرعه باي طريقه
روحت هووب مجهز الشنطه وحالق دقني لان قبلها وانا في السوبر جيت دخل واحد ظريف لذيذ ظبوط كان بيدور علي اي حد ملتحي وانا كانت دقني منبته حبتين فقلت بلاها المشاكل واهو علشان اهلي يرتاحوا مني شويه بحكايه احلق دقنك
ماعلينا
قلت طبعا لازم ادي تليفون لحبايبي الاول
كلمت احمد ليلتها بعد ماتش الاهلي عدل وقلتله اني جاي وجهزت الشونظه والصبح طلعنا في عربيه عمرو انا وطارق وعمرو صلاح وعمرو عبد السميع وقسشيناها بقي براحتنا بس كله كووم والسمك بتاع قدوره كووم تاني
انا كنت هانفجر خلاص من حلاوه السمك ايوووووووووووووووووه ياجدعان
سمك اسكندريه لا يعلي عليه بجد سمك ابن سمك بجد ولا الجمبري بتاعه اكتشفت اني مابدوقش السمك بجد الا في كل مره بنزل فيها اسكندريه
المهم شحننا الفسفور
وطبعا كفايه انك اول ماتدخل تلاقي ريحه اسكندريه النقيه الرائعه ومنظر البحر اللي يغسل همومك واحزانك
انا قعدتي ادام البحر لوحدها تنسيني الدنيا بجد
نست كل حاجه مشاكلي واحزاني والهموم اللي عندي والحاجات اللي عاوز اقفل عليها من جوايا
تغمض عينيك وتفتح صدرك وتفك القميص وتخلي الهوا يدخل جواك ورزاز الميه تخبط في وشك وتحس بلمسمها علي جلدك
مافيش حته تانيه في الدنيا بلاقي فيها الاحساس ده الا في اسكندريه
بعشقها فعلا بموت فيها لو كانت بنت كنت اتزوجتها لو كانت ارمله كنت داويت احزانها المشكله ان وانت قاعد غصب عنك بتقعد تفكر في الماضي وتقول هل كان ممكن اصلح غلطاتي وتلاقي نفسك حنين جامد اووي للفتره اللي انت مشتاق لها تقعد تقول ياريتني
تقعد تقول هو فيه مستقبل لسه هنا فيه امل ان ممكن اعرف اعمل حاجه؟ ولا خلاص انا احرقت كل مراكبي ورايا
ومابقاش ادامي الا الرحيل؟.
هل فعلا اللي انا عملته ده الصح.؟ وهل اللي اماشي فيه و فعلا اللي ربنا كاتبه لي؟ وهل فعلا اللي انا عاوزه لسه ماجاش وقته ولسه مستنيني؟
نفسي بجد اغمض عيني ماصحاش والاقي كل اللي معذبني اختفي والاقي راحه البال وانام كتيير مش عاوز حاجه من الدنيا دي
انا اليومين دول اه انبسطت فيهم لكن فرحه مؤقته
دايما كده السعاده بتبقي مؤقته عندي قصيره جدا مابلحقش والله اتهني بحاجه
انا اخر مره كنت روحتها كانت في نوفمبر 2008 وحبيت انزلها قبل زحمه الصيف لاني مش ناوي انزلها في الصيف خالص ممكن في رمضان بقي او بعد رمضان
طبعا بلليل كان لازم نختمها بسينما
وانتخانق هندخل فيلم ايه؟
angels and demons?
]دخلته
he is just into you
شفته
عين شمس؟
مش ناقصه بكاء وكئابه هو فيلم حلو طبعا لكن هنعيط لو دخلناه
راح عمرو صلاح افترح ندخل عمر وسلمي؟
عمر وسلمي؟ ده انا رقم واحد من كارعي تامر حسني القزز ادخله فيلم؟ عملنا قرعه فعلا علشان نشوف هندخل فين؟
بس انا تمسكت بقراري
دكان شحاته ياخواننا مافيش كلاام دي هيفاء يابشر ههههههه
وفي الاخر رسيت عليها
تاني يوم قضيناه صياعه برده لغايه مامحمد كلمني وقاللي هشوفهم بعد المغرب
المهم انا سبت العيال اللي كانوا معايا راحوا كارفور وروحت محطه الرمل لمحمد قباري صاحب مدونه her iam
مبرووك ياعم علي الليزك يالعب عيونك
الاتنين دول بجد الله يعلم انا بحبهم اد ايه يعني بجد ياريتني كنت من سكان اسكندريه علشان اشوفهم كل يوم بجد قعدتهم لا تعوض ونقاشهم حلو اوي وربنا يعلم اني واحد من اهم الاسباب اللي خلتني انزل واسيب شغلي ومزاكرتي اني كنت عاوز اشوفهم
اتكلمنا في كل حاجه غالبا وعن كل الناس وعن ايجي فيلم اللي ناويين نظبطه ان شالله كده ساعتين ونص قعدتها معاهم كانوا بجد مايتحسوش بمرور الوقت وطبعا محمد خلاني اجرب المشروب الوطني اللي لغايه دلوقتي معرفش هو ايه
عن الدكان وعن المزه
بغض النظر عن اي حاجه تانيه وعن عيوب الفيبلم الفنيه والسقطات
لكن الفيلم مهم جدا ورسالته اهم حاجه انذار مهم لاي مصري احنا في خطر
الشخصيه المصريه بتشيع خلاص وبتنقرض فيها كل حاجه حلوه البراءه والشهامه والطيبه والعفه
احنا بنموت الشخصيه دي كل يوم
اكيد الفيلم عامل مشاكل من حقه لان فيه نقد صريح للنظام والسياسه اللي ماتشيه عليها البلد واستعرض كل حاجه حصلت في اخر 5 سنين ورسم صوره بشعه مستقبليه رهيبه لمصير البلد لو الحال مانصلحش
اغبي مافي الفيلم هو تحيزه لنظام عبد الناصر وانه شايف انه هو المنقذ وهو الحل وده طبعا فقعني جدا بالاضافه لنقده للسادات وشايف انه هو السبب في كل اللي وصلنا له؟. اشته اووي يعني خالد يوسف بيهجص
طبعا فيه حاجات تانيه فنيه لكن عامه الفيلم هيعجب اي حد وهياثر فيه جدا خاصه النص التاني اللي كله تراجيديا
في الاول انا للقيت اغلب الناس رجاله لا مش اغلب ده كلهم رجاله وطبعا داخلين علشان هيفاء اكييد وبصراحه هي وجبت معانا اووي وبغض النظر عن اي وجهه نظر ناحيتها لكنها كانت كويسه جدا في الفيلم خاصه انها اول مره ومش كممثله كمان لكن بعد مالفيلم خلص لقيت الناس كلها بتصقف ومعجبه بالفيلم هو اصلا وفي الاخر فيلم معمول علشان الجمهور
خالد يوسف عملها صح يمكن تكون هي الحسنه الوحيده بالاضافه لطاقم التمثيل ورساله الفيلم والنهايه بتاعته وطبعا ااغاني ومووايل الفيلم اللي كتبها الشاعر جمال بخيت
احمد هيبقي يعمل موضوع عن الفيلم وهيتكلم عنه لانه محتاج كلام كتير علشان كده مش هاحرقه لحد الا لما اغلب الناس تشوفه
شوفوه وابقي قولوا رايكم
المهم روحت الزقازيق علي 5 الفجر علي انغام الاغاني القديمه لاصاله واحنا كلنا مانتخين في الكراسي وطارق طاير علي 160 منه لله وكان ورايا شغل الصبح طبعا حلقتله وكملتها نووم واهو انا مضطر اقوم دلوقتي اخد لي دووش وانزل شغل بلليل واحتمال ماعملش اي بوستات الا لما اخلص امتحاناتي ان شالله
يعني واخد اجازه كده من التدوين علي ماتفرج
وهابقي متابع كده كل شويه مدوناتكم كلها
سلام عليكم
