الجمعة، 23 أكتوبر 2009

بيكامون بالمكسرات





this is why we go to movies





اسبوع حافل بس بحاجات كتيره اغلبه سفر يوميا بدا بيومين في مصر الجديده اخلص مشاغل ليا وااشقر علي ولاد عمتي وافك عن نفسي شويه واجيب روايتين لماركيز من ديوان وادخل مع احمد فيلم كوانتين ترنتينو الجديد الدموي الساخر الرائع المليان باسقاطات ونهايات صادمه ومفاجئه وخاصه ان الفيلم بيتكلم عن السينما واثرها في الشعوب المختلفه ثقافيا وسياسيا ورجوعي عيان بالنفلونزا وخوفي انها تبقي خنازير بس ربنا ستر واهو بدات اتعافي منها شويه




ويومين اتحطنت فيهم في الشغل فقررت اخد لي تلاته ايام اجازه مع تهديدات وانذارات وتخويفات لكني طنشت ورميت ده ورا ضهري بس كان لازم اخلص مشوار ليا في جامعه القاهره الاول علشان الماستر وبعد كده انطلقت مع طارق وعبد العاطي وطلع عين اللي خلفونا علشان ننزل نزله السمان بس قضيناها تهريج ومسخره مابين تنظيط في محطات المترو وشوارع فيصل وميدان الجيزه وركبنا الخيل وعشنا ليله جامده كييك رغم ان الدنيا كانت مظلمه بس الجو كان هادي ورايق علي هضبه الهرم والواحد استمتع بجد بالجو فوق بعيد عن قرف القاهره وزحمتها والواحد حس انه رجع لاصوله العربيه القديمه وتملكته روح الفرسان وجزء منه اتجنن لما شاف الطبيعه الخلابه وخاصه الصحراءالجميله




بس طبعا اترقعنا واحنا راجعين علي الخيل لانها هاجت زي المجانين وطارق وقع من علي الحصان واتصاب في دراعه بس وديناه بعدها المستشفي وظبطنا له دراعه وبعد كده طبعا كان لازم انا وعبد العاطي نختمها بالسينابون لاني بموت فيها وباعشقها وخاصه اللي بالكراميل والمكسرات ودي عاوزه بوست لوحده اقعد اوصف في طعامه السينابون واللي بتعمله فيا والنشوه العجيبه اللي بتتملكني لما اكلها كاني بطير في السما واواصل لقمه المتعه مع دوبان طعمها في بقي ولذاذه ملمسها وحلاوه حشوها ويعتبر احسن فرعين لها بتاع مصر الجديده اللي في شارع الميرغني او اللي في مكرم عبيد ورجعنا الزقازيق علي 3 الفجر متكسحين وكان لازم ننخمد علشان تاني يوم ورانا سفر تاني علشان فرح ماجد في مدينه العبور




وصحيت علي 12 الظهر حلقت دقني وجهزت البدله وطلعت الزفه علي 4 العصر لغايه ماوصلنا للمكان اللي كان معمول علي نظام ال open air مكان كلاسيكي جدا وراقي زي بالظبط ماجد اللي هو شخصيه نادره اصلا مابشوفش زيها بقالي قروون لانه محترم جدا ومهذب وتحس انه ابن ذوات راقي فعلا وكنت مبسوط له جدا انا وعمرو وطارق وظبطناه في الفرح رغم انننا كنا تعبانين من اول امبارح وهلكانين مووت من ركوب الخيل ويادوبك لسه راجع البيت بقالي 3 ساعتين مش شايف قدامي مستني الفجر يادن علشان اتخمد وربنا يستر اعرف اصحي علي صلاه الجمعه لان عضلات جسمي مورمه جدا بس كله يهون لاني فعلا استمتعت اليومين اللي فاتوا جدا وارجع تاني الشغل بقي واركز شويه واخد لي اسبوع كده اجازه من التدوين






خارج النص




ده لينك لحمله عملاها نواره نجم في مدونتها لحمله لرفض التوريث الحكم لجمال مبارك انا حاطه هنا لاي حد عاوز يدخل ويبص عليه بصه رغم اختلافي مع ميول نواره السياسيه لكني بؤيدها في حملتها لاني زي اي حد تاني رافض جمال مبارك




الحمله اسمها ايش عرفك انت





http://www.tahyyes.org/2009/10/3.html


http://www.facebook.com/group.php?rbc5af70b&gid=162871175473&refid=0



اه نسيت اللي عاوز يتحاور مع المحروس علي موقع شارك هيبقي يوم 25 اكتوبر يوم الاحد وده لينك الموقع





الثلاثاء، 13 أكتوبر 2009

قالت.......ضحي





" لعمرك ما ضاقت بلاد بأهلها **** ولكن أحلام الرجال تضيق)

عمرو بن الاهتم التميمي


عائد الي المنزل محملا بهموم ووساوس وارهاق بدني وعاطفي وتسائلات تنخر في خلايا مخي دافعه اياه للجنون وشاحنه قلبي بمشاعر رهيبه شريره ربما او هيستيريه


اخطو الي غرفتي متفقدا التلفاز لاجد برامج عن ازمه شيخ الازهر والنقاب اغير المحطه اجدها تتحدث عن ازمه نور الشريف وعن المؤامره المدبره ضده بسبب عمله الدرامي الرمضاني


اصاب بالغثيان من ابتذال الاخبار فارتاح عندما استقر علي فيلما لبطلي الرجل العنكبوت وكانما سمع ندائي فهو الوحيد القادر علي شحني بالامل ورسم الابتسامه علي شفتي


ابغي النوم لكن قلبي مجروح ينزف بلا انقطاع منذ 3 اشهر حاولت البحث عن دواء له وجربت العديد لكن بلا جدوي كان يتوقف لبرهه ثم يعاود النزيف


اطالع روايه بهاء طاهر التي ابتعتها منذ يوم لعشقي الشديد له اطالعها علي انغام الموسيقي الحالمه المنبعثه من الراديو عند الثالثه فجرا


اغوص مع ضحي وبطل الروايه اتواجد في الستينات اغوص في البشر الذين تغيروا بفعل الزمان
اضل الطريق مثلما فعل وابحث عن نفسي ابحث عن حقيقتي عن هويتي
اتوه في فهم ضحي؟ اتوه في فهم لما يفسد البشر

اتوه في فهم علاقات البشر ببعض اتوه في تقلبات المراه واختياراتها الصادمه وعنفها مع من يعشقها بصدق

اتوه في تفسير ماحدث لتاريخنا


لما كلما تظهر حركه اصلاحيه للقضاء علي الفساد تظهر افعي اخري في وسط الشرفاء المناضلين فالفساد ياتي من البشر انفسهم ليس من الخارج لاننا بشر ضعفاء نرتخي امام اول اغراء سواء كان متمثلا في الجنس او المال او السلطه


لما ظهرت الثوره؟ اقصد االانقالاب العسكري الذي قاده هؤلاء الظباط ؟
لما اصروا علي تدمير معالم فتره ماقبل الثوره؟ ولما شوهوا الجمال بايديهم؟
لما تغير اتجاه هؤلاء الثوار وتخلوا عن حلمهم وخذلوا المصريين.

لما كان حكمهم اشبه بكابوس مخيم علي قلوب الناس كاننهم يعيشون في الاتحاد السوفييتي
لما مازال ابي يعشق عبد الناصر ويري ان افضل ماحدث في تاريخ مصر هي الثوره؟
لماذا لاري مثله ولا افتخر بتلك الثوره؟ انا لم استفد منها بشيء وعاني مثلي مثل ملايين الشباب من توابع تلك الثوره المتمثله في نظام مبارك المبارك الظريف


نعم الثوره هي من جلبت مبارك وامثاله الثوره هي من تسببت بهزيمه 67 ثم تتابعات معاهده السلام والتطبيع مع اسرائيل والانفتاح الاقتصادي وكل ماتمر به مصر منذ 1952


كانوا يحلمون بالديمقراطيه؟ فهل تحقق ذلك لهم؟ كانوا يحلمون بالقضاء علي الانحلال؟ اذن اين نعيش اذن؟ في المريخ؟ نحن نستحم في بحر من الانحلال الاخلاقي والتفكك الديني بفضل الثوره المجيده


الحق يقال ان المصريين لا يصلحون ليحكموا بلادهم ولن يرتقوا ابدا نحتاج لشخص صارم يجلدنا مثل العظيم محمد علي كي نرتقي


هل حققت الثوره اهدافها؟ هههههههههه نعم فعلا لقد عاد الاقطاع بشكل جديد واشرس مرحبا بكم في عالم الاقطاعيين الجدد اما عن النظام الملكي الذي حاربوا ضده فهنيئا لهم نظام مبارك الملكي وولي عهده جمال


اختفت الطبقه الوسطي بفضل الثوره واصبح هناك فقط طبقه القطاميه ومارينا وطبقه الدويقه ومنشيه ناصر
يطالبوننا نحن الشباب ان نتحرك؟ كيف بالله عليكم وانتم قمتم باخصائنا وسممتم دمائنا وافسدتم احلامنا وحطمتم قلوبنا وفرقتمونا عن احبائنا


سحقا لكم ولتاريخكم المجيد انا امقت الثوره وامقت ماتحولت اليه الان بشكلها القبيح
عار عليكم ياابائنا ان تلومونا وقد صرنا حطاما فالذنب ذنبكم انتم لانكم انتم من فتحتم الباب لهم وهاقدر اغرقتم الوطن معكم واضعتم هويتنا


وكما يقول زكي الدسوقي في روايه عماره يعقوبيان
نحن في زمن المسخ " "


انظروا الي المدن الي الاسكندريه التي اصبحت تفقد رونقها بفعل توابع الثوره الي القاهره التي ضاعات ملامحها مع توابع الاشتراكيه الي اساتذه الجامعه الذين هم بالاصل من طلبه الاتحاد الاشتراكي سابقا واصبح همهم الحالي جمع المال والنزاع علي المراكز


انظروا الي الاطباء الذين لا يفقهون شيئا بفضل نظام عبد الناصر الجامعي المجاني


انظروا الي الخطاب الديني الذي اصبح يخاف الاقتراب من الحاكم وامور الدوله او اي امور فقهيه خوفا من غضب الباب العالي


انظروا الي المراه حاليا التي لا تستطيع ان تخمن هل هي مصريه ام متامركه ام خليجيه ام ماذا؟ فقد اصبحا متناقضه تماما في ملابسها ومشيتها وكلامها

تاره بعباءه خليجيه مجسمه لمعالم جسدها وتضيق علي ثنيات جسدها فتبرز في شهوه عارمه

تاره باسدال ايراني بحجه انه يستر الجسد

تاره بملابس ضيقه وعاريه بحجه التحرر




اعود الي ضحي وتقلباتها اعود الي الحب الذي لم يصبح مثلما كان واصبح بارد عديم المذاق


لما يتغير الحب مع الزمن؟ لما يصر البعض علي جرح واصابه الطرف الاخر بالالم والسخريه منه والتمنع عنه
لما نتمسك بشيء نعرف انه لن يكون من نصيبنا وصعب ان نلمسه و
والاقتراب منه


لما نظل دائما نرسم احلاما وامالا كبيره علي شيء لسنا واثقين منه تماما ثم نصاب بالاحباط لاننا فشلنا ولانه ضاع مننا مع علمنا المسبق منذ البدايه انه سيذهب وسيطير

بهاء طاهر يترك في اعماقي بصمه في كل مره ومن اجل ذلك فانا ممتن له دائما وممتن للست فيروز مع اغنيتها

صباحه مسا


صباحه مسا
شيء مابيتنسي
تركت الحب واخدت الاسي
شو بده يدور علي شو عم يدور علي غيره
فيه ناس كتير لكن مابيصير في غيره