الأحد، 29 يناير 2012

التحرير 2012


من مسجد الاستقامه يوم الاربعاء لمسيره جامعه القاهره للدقي لمسيره كوبري قصر النيل للتحرير
ويوم الجمعه من مسيره العباسيه لرمسيس لماسبيرو وبعد كده روحت كتب كتاب طارق ابن عمتي وخرجت مع احمد سامي وزوجته الكولومبيه وروحت الدقي اوصل صديقه ورجعت تاني علي ماسبيرو احضر عرض كاذبون هناك اللي خلانا نهتف في الشرطه العسكريه يسقط يسقط حكم العسكر واحنا بنفتكر شهدا محمد محمود ومجلس الوزراء وماسبيرو والعباسيه وباحمد ربنا اني ماقعدتش في التحرير علشان اشوف مهزله خناقه الاخوان والثوار وشماته العسكر

بجانب اكتر حاجه اتبسطت فيها ان فيلم التحرير الفين وحداشر اتعرض اللي عباره عن تلاته اجزاء وثائقيه

الجزء الاول عن الطيب او الثوار وددوافعهم للنزول يوم خمسه وعشرين والقصص اللي حصلت لهم والحكاوي بتاعه التمنتاشر يوم
الحزء التاني الشرس عن ظباط الامن المركزي والداخليه ووجهه نظرهم ناحيه الثوار وموضوع تورطهم في اطلاق النار
الجزء التالت عن مبارك وازاي اصبح ديكتاتور وراي السياسيين فيه والمقربين فيه والاسباب اللي ادت الي سقوطه

الفيلم مجملا رائع واخرجه عمرو سلامه وايتن عامر وتامر عزت وحظي بجوائز عالميه واحترام النقاد بالاضافه انه فكرني بالايام الجميله بتاعه الثوره

اخيرا انا شايف التحرير مالوش لازمه ولازم تطلع كل يوم مسيرات للحشد في الشوارع والضغط علي ماسبيرو لان ماسبيرو لو تم تطهيره او السيطره عليه الثوره هتنجح لانه اداه اعلاميه هامه

لازم السلطه تتسلم علشان نعمل انتخابات رئاسيه من غير ماتتزور من العسكر ونعمل دستور ونعرف نحاكم العسكر

احنا مش هننسي الشهدا ودم الشهدا في رقبتنا ورقبه العسكر

الثلاثاء، 17 يناير 2012

النور هييجي اكيد




زي السنه اللي فاتت بالظبط كتبت بوست كان عن الامل لينا قبل الثوره

حياتي كانت بائسه قبل يوم خمسه وعشرين وبعدها حياتي اتحسنت وبقي ليا رغبه في الدنيا
حتي علاقتي بامل بقت وثيقه وبقت اقوي من الاول

وبعد كده بدات الثوره تبوظ معرفش باظت من ايه باظت من الاستفتاء ولا باظت من توحش التيار الاسلامي ولا من الصفقه اللي بين المجلس العسكري والاخوان ولا من انانيتنا او غباء الليبراليين ولا من ان الشعب بتاعنا بيهيج مره واحده وينام بسرعه

احنا اتغيرنا كلنا والكل ساعد علي قتل الثوره بس حاولنا اكتر من مره نحييها حاولنا اكتر من مره الوحيدين اللي حاولوا هو جيلنا جيل شباب الثوره اول ناس نزلت لغايه اللحظه دي
وفي نفس الوقت علاقتي باظت بامل وحاولت اصلحها اكتر من مره بس انا كنت غبي واناني
معرفش ايه اللي هيحصل يوم الاربعاء المنتظر
انا كنت بحب الاربعاء زمان جدا وكان افضل يوم في الاسبوع
بس مؤخرا بقي يحصل لي فيه كوارث

انا مخنوق جدا ومابقتش حاسس بطعم اي حاجه ويمكن حالي بقي اسوا من ايام مبارك
انا محتاج امل اي امل يخليني اتمسك بالحياه
محتاج الظلمه تروح من ادام عينيا

انا نازل بس معرفش هل انتم هتنزلوا ولا نازلين ليه ولا ناويين علي ايه
كل اللي اعرفه ان انا كنت باعيش بحاجتين واحده منهم بتضيع مني والتانيه بحاول ابعثها من موتها
التانيه دي هي الثوره لو فشلنا يبقي ماتبقاش حاجه لينا خلاص بعد كده

احنا مستنيين النور في اخر النفق المظلم واتمني انه يطلع نور القطار اللي هياخدنا لمحطه الامان والنهايه