السبت، 30 يونيو 2012

سلم....السلطه


الصوره ملتقطه من امام ماسبيرو في يناير السابق

.........


يوم 19 نوفمبر 2011 

في شارع محمد محمود الساعه التاسعه ليلا

اتحصن امام سياج من الصفيح مع شباب الالتراس والثوار  وسته ابريل وشباب حازم ابوة اسماعيل بينما ينهمر علينا الخرطوش والمطاطي من قوات الامن المركزي ونسعل من الغاز المفرط قذفه علينا

يسالني الصحفيين الفرنسيين الملازمين لي انا وخالد ومحمد عبد الفتاح بالانجليزيه لان لغتي الفرنسيه لا تتعدي ميرسي بوكوا او سيلفو بليه مسيو

"wat u think will happen this night?
me: to night will be the end of the military council and the revoultion will win

كان من الممكن ان يكون فعلا النصر حليفنا ونسقط ونحاكم العسكر لكن رفاقنا من الموسليم برازر هوود تخلوا عننا خوفا من تاجيل انتخابات مجلس الشعب الذي تم حله مؤخرا 
كان من الممكن ان نتمتع الان برئيس حقيقي سواء كان محمد مرسي او غيره لكن بصلاحيات حقيقيه ونحن نري طنطاوي وغيرهم من عجزه المجلس العسكري امام المحكمه الثوريه لناخذ بحق شهدائنا الذين ازاداوا بعد ذلك في مذابح مجلس الوزراء والعباسيه وبورسعيد 
كان من الممكن ان نستلم سلطه حقيقيه وكان من الممكن ان اكون اول من يبايع محمد مرسي علي السمع والطاعه


..................

عام ونصف حلمنا وشاركنا في الحلم 

في اول ثمانيه عشر يوما كانوا حلما في غايه الجمال كنا اشبه بالمدينه الفاضله بكل تياراتنا واتجاهاتنا

لكن الحلم بعد شهر تفتت واصبح مسخا 

عام ونصف كانت الثوره وشخص اخر اجمل شيئين حدثوا لي في حياتي 

ربما اكون اخطئت وكنت انانيا او تغيرت او اسات لكليهما او اصبحت محدث نعمه او لم احمد الله علي تلك الهبتين 

كلنا تصرفنا بشكل خاطيء ولا استثني احدا فنحن لسنا ملائكه نحن بشرا ولكننا نفتقر للقدره علي الغفران والتسامح للاسف

لو ساعتذر لهما ساعتذر واصحح ماحدث واقبل راسيهما رغبه في تعويضهما 

مهما حدث مني او منهما سيظلان في قلبي وفي ارشيف ذكرياتي كشيء جميل كانوا وكنت جزءا منهما ويعلم الله معزتهما في قلبي وان انكساري لم يكن هينا 

...........................


اليوم سيتسلم اول رئيس منتخب بشرعيه وديمنقراطيه حقيقيه السلطه من من حكموا البلاد منذ ستون عاما

ممن قاموا بانقلاب غير شرعي سموه ثوره ونسبوا فضلها لهم 

اليوم يتحقق حلم حسن البنا منذ ستون عاما في ان يصبح الاخوان المسلمين بيدهعم مقاليد الحكم فهنيئا لهم علي ذلك فقد صبروا وصمدوا وتعبوا وعانوا وشاركوا في الثوره 

اليوم ستنتهي الثوره كما عهدناها ليبدا عهد جديد باصلاح وكتابه دستور للبلاد وبدء مشروع النهضه الذي وعد به الاخوان

انا لم انتخب محمد مرسي لاسباب خاصه بي وبالطبع لم اكن انتوي انتخاب شفيق 

لكني كثائر ينتهي دوري اليوم او ربما انتهي منذ فتره لاصبح مواطنا يرغب في رؤيه بلده تتقدم في مسيره تاخرت كثيرا

يعلم الله اني اتمني رؤيه حمدي بدين يحاكم  الذي سبنا بالفاظ قذره العام الماضي في العباسيه في الموقعه الشهيره التي استشهد فيها زميلنا محمد محسن رحمه الله 

سانضم لحزب الدستور باذن الله لاني اثق بالبرادعي واتمني ان ياتي علي راس وزاره تكون بصلاحيات تتسع لاصلاح ملموس وليس مقيدا 

وليتذكر محمد مرسي اننا سنكون وراءه طالما سار علي درب الحق وسنكون ضده ان اخلف وعوده وسنمنحه فرصا 

هنيئا لمصر 


............



اختم البوست بمقوله استاذي دكتور احمد خالد توفيق عن الانتظار والامل بشخصيه رفعت اسماعيل وماجي ماكيلوب

"للابد؟
ماذا"

ستكون لي للابد؟

وحتي تحترق النجوم وحتي تجف المحيطات والخ الخ "



ولم يكمل تلك الجمله
  حتي الان لان القدر لم يكتب النهايه لسبب ما

الخميس، 28 يونيو 2012

هاكتب

هشام صاحبي بيقول لي اكتب وعبر عن نفسك

انا ناوي اكتب بس مش دلوقتي 

كل اللي اقدر اقوله اني بعد خمسه وعشرين يناير بعد التنحي او بالاصح بعد استفتاء مارس انا اتغيرت وبقيت شخص تاني
واتشوهت من جوايا 

انا بقيت نصين نص وسخ ونص بيحاول يبقي نظيف 

خسرت ناس كتيره والاقسي خسرتك

انا مش حابب الفتره الانتقاليه بكرهها وبكره اللي غملته فيا 

ماهو مش معقول واحد كان بيشتبك في معارك مع العسكر وبيدمن منظر الامن المركزي والجيش وريحه الغاز والمطاطي وبيجري علي اي مسيره 

مش معقول بعد ده كله يبقي طبيعي اكيد مريض نفسي  واكيد انسان مشوه من جواه 

مش معقول بعد كل الموت ده والاعتصامات والادراينالين والعرق ابقي طبيعي


انا بس اللي حازز في نفسي اني مامتش لغايه دلوقتي

الأربعاء، 27 يونيو 2012

ولا حاجه

                      مش لاقي حاجه اقولها

لاول مره يجيلي عجز عن الكلام مبيجليش نوم علشان خايف احلم باللي عاوزه ولو حلمت به مهابقي عايز افوق علشان مش هلاقيه في الواقع وخايف انام محلمش به اتوجع وعارف ان عدم نومي ماهيحل المشكله لانه كده كده مش موجود  انا مابقيتش عارف اليوم بيبتدي امتي وبيخلص امتي

انا معرفش بكره مخبيلي ايه 

انا تايه 

بس عايش اليوم بيومه يمكن الاسبوع الجاي يبقي فيه تغيير يبقي فيه امل




الخميس، 21 يونيو 2012

there will be blood




اعتصام ونتيجه بتااخر وحشود في التحرير 

مبارك بيحتضر

سلاح بيدخل مصر بكميات مهوله

كلام عن تمهيد لنجاح شفيق
كلام عن صفقه مع العسكر مقابل الخازوق الدستوري

كلام عن مسيرات للتضامن مع المعتقلين

كلام عن حشد العسكر لقواته في مداخل القاهره ومخارجها واستنفار عام 

كلام عن مواجهه وتصعيد 

كلام عن سيناريو 54 

كلام كتير لكني شامم حاجه واحده

شامم دم وقريب جدا

الثلاثاء، 19 يونيو 2012

شكرا




عاشق سارح في الملكوت ميهموش العمر يفوت يدفع في الحرية حياته ولو اتكتف للحظة يموت قلبه بيبرق زي الماس ولا يملك غير الإحساس غرقان في جروحه وآلامه وبيداوي في جروح الناس بايع قلبه للي يحبه ومعندوش للحب شروط عاشق سارح في الملكوت ولو اتكتف للحظة يموت طير في السما وملوش عنوان وفي ايده خاتم سليمان كان عايز بالضحكة يغير ويتوه كل الأحزان عاش الحلم كأنه حقيقة وافتكر إن الدنيا بريئة من طيبته سلم لحبيبته وحبيبته بتبيع في دقيقة فوق واتحرر من أوهامك العمر بيخلص قدامك الطير مش هيطير في جهنم ومفيش سمكة بتعشق حوت




قلبي اتكسر مرتين
مره في وسط الرصاص والغاز واحنا قليلين في شارع محمد محمود السنه اللي فاتت ومحدش نزل معانا والناس بتتكلم علينا  ومحدش نزل معانا وتشتمنا
والمره التانيه في نفس الشارع لما هي  قالت مش هينفع نبقي مع بعض في التليفون

.........

في مسلسل الغفران

اخر حلقه
امجد بيعترف لوالدته انه لما كان في الجيش مكانش بينام وبيحرس الوحده بتاعته ويتفقد العساكر بما انه ملازم
كان بيعمل كده لانه خايف من اي هجوم من العدو كان متحفز وحط نفسه في موود الدفاع عن الوطن ومهمته يحمي اهله وبلده
وصحابه وكل الناس لان ده واجبه


لكن الحقيقه انه كان بيعمل كده لانه عايز عزه تنام في امان وانه بيفكر فيها ومههوش هي بتعمل ايه ولا مع مين المهم تكون بامان
لانه بيعمل ده كله علشانها هي حتي لو مش معاه


وانا لما نزلت في اول يوم نزلت لاني كنت يائس كنت حاسس ان مافيش حاجه فضلت الا اننا نسقط النظام وعارف انها محاوله يائسه
لكني كنت بهرب من واقعي للاسف وكنت ناوي علي الموت واني مارجعش تاني

بالاضافه ان كنت فاكر امل مش راجعه تاني وهتسافر



لما نزلت في محمد محمود كنت عايز الخلاص كنت استنتفذت كل شيء والاهم اني مكنتش قادر اتحمل واقع ومجتمع بيهاجمني وبيكدبني وبيشوه سمعتي والاوسخ انه دمر حياتي بحجه اني مش حر في حياتي ونسي كل حاجه عملتها له


والافظع انه اخد امل مني ودمر علاقتي بها


الافظع انه كسرني ولسه بيكسرني وبما ان خلاص كل حاجه خلصت لوضع ومستقبل انا مطلبتوش فكان لازم اعترف بده

شكرا علي السنه ونصف اللي كانت حلم بس اتدمر ومعرفش اخرته ايه


شكرا  لكل من اتسببت لهم بالالم وجرحتهم انا منسحب ومش عايز ابقي شريك في المرحله الجايه

لو فيها موت انا معاكم غير كده انا اسف

انا انسان تافه وضعيف مش قد المسئوليه وهمومي عبيطه واحلامي متستاهلش اتكلم عنها

كان نفسي اعيش في مجتمع احسن من كده لكنه كسرني

انا فيا العبر ومش ملاك وعاص وربنا مش راضي عني ويمكن تكون رحمه ربنا انه يخلصني

الأحد، 17 يونيو 2012

الرجل الذي يتهته



سيقولون ويهاجمون ويسخرون 

سيشوهونك ويكرهوك ويكذبوك

لكنهم لن يعلموا قيمتك الا بعد فوات الاوان

وهاهم يعضون اناملهم ويندمون 

فانت رايت ماعجزت قلوبهم السوداء عن رؤيته 


كل عام وان بخير يابيدو

الخميس، 14 يونيو 2012

عبوكوا كلكم

ي بورسعيد ضحايا شافوا الغدر قبل الممات
شافوا نظام خير مابين حكمه و الفوضى في البلاد
كان فاكر حكمه يوم هيخليه في أعلى مكان
و الشعب الثوري يركع للعسكر زي زمان
أطلق في كلاب كمان و الفوضى في كل مكان
عمري ما هديك الامان وله تحكمني يوم كمان

في بورسعيد كلاب لما العسكر فتحوا الباب
انظلقوا و الفوضى عمت و اتقتلوا اغلى الشباب
منهم كان المهندس و العمال منهم ولاد
راحوا و كان مناهم حكمك ناهي في البلاد
اه يا مجلس يابن الحرام بعت دم شهيد بكام لأجل ما تحمي في النظام اللي انت منه كمان"





انا هبطل صوتي في الاعاده مش هشارك في المهزله دي انا كنت غلطان اني شاركت في المرحله الاولي مكانش لازم اشارك

مش هدي صوتي للي بيهمشوني مش هدي صوتي للي قتلني معنويا وماديا مش هدي صوتي للي هياخد مني حريتي مش هدي صوتي 
مش هدي للي شوه سمعتي وقال عليا بكره الدين مش هدي صوتي للي هاجمني وجرحني
مش هنسي انتم عملتم فيا ايه مش هنسي انكم دمرتم حياتي
مش هدي حد فيكم انتم متستاهلوش 
انتم خنازير وانجاس 

انتم عبيد وخونه وغشاشين وكدابين مش هدي صوتي للكدابين مش هابقي ايجابي هابقي سلبي هاستمتع باني ابقي سلبي وابقي بخون البلد
ياريتني اعرف اخون واقبض فلوس نفسي تدفعوا التمن نفسي تندموا وتعرفوا انكم غلطانين

نفسي يبقي فيه دم انا عايز دم  

نفسي اسمع عذابكم واعتذاراتكم نفسي تحسوا بالللي انا فيه نفسي تشوفوا نفسكم في المرايه

انتم متستاهلوش انتم ولا حاجه حسبي الله ونعم الوكيل فيكم 

محدش يستاهل اتعب واموت نفسي علشانه عملتم انتم ايه ليا غير انكم اتسببتم في مزيد من الالم؟

خساره فيكم اي حاجه


هاستعير جمله امل

"مات من لا يستحق الموت ليعيش من لا يستحق الحياه"


فعلا  احنا دمرنا حلم ال تمنتاشر يوم  انا لو اقدر ارجع بالزمن اعيش التمنتاشر يوم دول تاني اعيش اجمل فتره في حياتي 
انا مش قادر اتخيل ان الحلم ده خلص خلاص

متبقاش ادامنا الا اننا ندفع التمن كلنا ونستني اللي هيحصل بعد الاعاده او نتقبل الوضع

الاثنين، 11 يونيو 2012

3 D..CINEMA



مشكلتي اني ادمنت عوالم الثري دي منذ ثلاثه اعوام واصبحت انتظر اي فيلم جديد ينزل الي دار العرض لاشالهده بتقنيه الابعاد الثلاثيه المجسمه 

وبما اننا بدانا موسم الصيف فان هناك العديد من الفلام المنتظره التي ستحقق نجاحا قويا في شباك التذاكر 

بداتها مع فيلم the avengers  لشركه مارفل الذي جمع اقوي شخصيبات الكوميكس معا في حبكه جيده واخراج رائع وانتاج ضخم مع طاقم نجوم متعاون ليخرج فيلما مبهرا 

والاسبوع الماضي شاهدت فيلم men in black  وساشاهد هذا الاسبوع فيلم ريدلي سكوت الجديد promeathesus  

وبانتظار الجزء الجديد من سبايدرمان وفيلم كريس نولان الاخير dark knight rise

وبالطبع لن افوت فيلمي ice age...madgasacr  وفيلم بيكسار الجديد brave 

عوالم الثري دي بها سحر طفولي وخيالي لذلك تجتذبني عندما تشاهد الاشياء تخرج من الشاشه وتكاد تلمسك 

او ان   تدخل في عمق الفيلم وتكون وسط الاحداث وتشعر بانك مندمج تماما

بالطبع ليست كل الافلام متقنه الصنع لكنك تستمتع بها اكثر في افلام الانيمتشن 

البعض لا يعجبه تلك الافلام ويفضل افلام الثنائيه الابعاد وربما يكونون محقين انا عن نفسي لم استطع مقاومه ان اشاهد فيلم تيم بيرتون الاخير رغم انه ليس ثلاثيا الابعاد لكنه اعجبني كثيرا وافكر في كتابه تدوينه كامله عنه 

كلمه اخيره ستظل السينما هي تجميع كل الفنون من موسيقا وادب وفكر لتكون محرابا مقدسا ندخله مثل المسجد والكنيسه نمارس فيه عبادتنا للفنون ونستمتع بها قرابه الساعتين لنخرج بشكل مختلف نضيف للحياه او نتعلم درسا جديدا