الأحد، 21 ديسمبر 2008

خووووووود ........ دي











في وسط مشكله النت والخنقه اللي انا فيها والوقت اللي عمال يجري بسرعه

بابص ل2008 واشوف اخبارها ايه مع المصريين

البوست ده هيبقي متشائم لكن اللي جاي ان شالله هيبقي مختلف









2008 يا 2008 مش عارف اقولك ايه ولا اقول للمصريين


سنه حلوه؟ ممكن سنه منيله بقطران؟ جايز


ابتديها بايه؟

ب الشغب اللي حصل في 6 ابريل وحمله الاعتقالات الكبيره اللي عملتها الحكومه

والاضراب اللي نشرته واحده بنت علي الفيس بوك خلي البلد كلها تتقلب وتتضامن مع الفكره


عن نفسي انا شاركت في الاضراب وغصب عن الحكومه ماروحتش شغلي يومها وقعدت في البيت كحل سلمي وقلت طز في كل حاجه



ولا ابتديها بمسخره تسريب اسئله الثانويه العامه ؟


ولا خليها باضطهاد النظام المستبد بالصحافه الحره والمستقله اللي عاملاله وش في دماغه


ولا بكارثه الدويقه والاهمال الجسيم اللي حصل والابرياء اللي راحوا نتيجه الاهمال؟

ولا بالمسخره بتاعه حريق مجلس الشوري اللي قعدوا 8 ساعات يطفوا فيه

ويطفوه بايه ؟ بميه؟

واللي اتبعه بحريق المسرح القومي ؟

بصراحه كان رمضان السنه دي زي اللوز كان غم علي معظم المصريين للاسف


واللي بدعها اكتر الارتفاع الرهيب في اسعار الحديد والسعار الديكي الوزي البطي الكناري في جري الناس ورا الحديد علشان يبنوا وجشع التجار وعلي راسهم المحتكر الرئيسي احمد بيه عز عظم الله اجره

وعلشان ياحبه عيني يحسن صورته مول برنامج ب 30 شقه للشباب في رمضان تحت اسم محمودسعد علشان ربنا يتقبل منه

ومنا امين يارب العالمين



................








ابناء مصر المخلصين





السنه دي مصر فقدت اشخاص نفخر انهم مصريين وانهم يحملون الدماء المصريه


علي راسهم


دكتور عبد الوهاب المسيري المفكر الكبيير والمعارض للنظام المصري واحد مؤسسيي حركه كفايه واحد مؤسيي حزب الوسط

مش محتاج اتكلم عنه ولا عن موسوعته الرائعه عن تاريخ الصهوينيه



دكتور يونان لبيب رزق

المؤرخ الكبير وابو التاريخ في مصر




الاستاذ مجدي مهنا الصحفي الكبيير والمحاور الرائع

الاستاذ رجاء النقاش


المخرج الكبيير يوسف شاهين احد عباقره االسينما المصريه رغم اختلاف الكثيريين حوله وحول اخر افلامه اللي هاجم فيه السلطه




..................






السنه دي مصر للاسف كلها انشغلت بقضيتين تافهتين

شايف ان مالهمش لازمه خالص ومجرد شغل للراي العام عن هموم البلد الحقيقيه


قضيه الاخ هشام طلعت مصطفي احد الرؤووس الكبييره بالحزب الوطني ورمز اقتصادي هام

وقضيه مقتل ابنه المطربه ليلي غفران والجدل الي اثير حولها


طيب واحنا مالنا؟


فيه حاجات اهم بكتيير من الهبل ده انا مالي واحد مجنون بالمطربات راح دابحها وبيقول انا بريء



هو غالبا المصريين بقي فيهم داء انهم يتشفوا في الشخصيات المعروفه لاسباب عديده اهمها الهم والحاله الاقتصاديه المنيله بنيله علشان كده بيحبوا يطلعوا فضايح واشاعات لا اساس لها من الصحه


اللي شدني اكتر هو المحاكمه مش القضيه

التواجد الامني الغير مسبوق حول المحكمه وقرار بحظر النشر والكلام عن التور جوه لجنه السياساات ده كله خلي الفار يلعب بس مش في عبي

في حته تانيه





........................






مش عارف ليه دايما يوم الاحد مابحبهوش


بس السنه دي كان يوم اسود بصراحه لما مات يوسف شاهين وفي نفس الوقت طلع الاخ الفاضل القاتل السفاح

ممدوح اسماعيل براءه


مش عارف هو بيعرف ينام ازاي من ال 1032 شبح بتوع المصريين اللي غرقوا؟



...........





الله يرحم كل اللي ماتوا وهو واقفين في طابور العيش علشان يجيبوا رغيف ولا اتنين لعيالهم

ده بقي اللي يتقال عليهم بجد ماتوا علشان لقمه العيش


منكم لله ياللي بهدلتم الناس علشان العيش





..............





عمالين نقول عاوزين نعمل تغيير ونحن البلد

ابتدينا بحمله التدخين والادمان بتاعه عمرو خالد والحمد لله الي حد مانجحت

وكنا هنبتدي في حمله التعليم والفقر

بس وقفوا لنا فيها بحجج واهيه مش مقتنع بها خالص







من اسبوعين جرنان صوت الامه نشر مثال لعبد الحليم قنديل بيقول ليه مانعملش زي تايلاند

ونعزل مبارك؟

ليه مش كل القوي الوطنيه والاحزاب والمفكرين يعملوا طلب بعزل مبارك زي اي بلد ديمقراطيه؟



طبعا مبارك هيرد عليهم ويقول لهم



عند امه يا ادهم




....................





عجبني ان البنات بدوا يتشجعوا ويرفعوا قضايا تحرش علشان المهزله دي تخلص بقي بعد معيارها ىفلت

لكن في نفس الوقت لازم دراسه نفسيه واسعه واحصاء شامل علشان نعرف السبب الحقيقي الكامن اللي بيحرك النزوه المريضه دي جوه الذكور

هل هي مرتبطه بالفقر؟
بالكبت؟

بالفراغ؟

بالكره ناحيه الانثي؟



مع ملاحظه ان الجو العدائي بين الزكور والاناث زاد جدا السنه دي في كل مكان





مصر كلها فرحت لما خدنا كاس الامم الافريقيه

واتغمت لما الاهلي خسر من اسبوع


يافرحه ماتمت



.................





غالبا بقينا معتمدين جدا علي النت وحياتنا متوقفه عليه


باتكلم عن الازمه الي حصلت في اول السنه دي لما خلاه مقطوع 10 ايام البلد اتشلت بجد وربنا سترها






الناس فرحت لما بوش اتضرب بالجزمه

طيب ماتبقوا جدعان واعملوها في واحد تاني عارفينه كلنا

؟



القرضاوي قال كلمته

ياريته مقالها بوظ ودمر الجو السلمي اللي بنحاول نعمله مع الشيعه




فرحان في الداخليه بصراحه

خاصه احداث العريش الاخيره

انا حاسس ان العادلي كان هيعملها علي نفسه



بس فقعونا برده بحكايه قانون المرور

نكته بجد والله

بس يالاا ماحنا كل يوم عايشين في نكته





لسه ومازلت وهاقول


مصر علي شفا حرب اهليه طائفيه

اللي حصل الشهرين اللي فاتوا واللي لسه بيحصل لازم يكون له حد


اللي شاف المشهد الاخير من حسن ومرقص هيعرف انا خايف اد ايه







...........................









حلو اوي المؤتمر الاخراني بتاع مصر بترجع بينا


طيب ورينا بقي ازاي


والنبي لو حد شايف فيه تحسن بيحصل من 28 سنه

يبقي يشاور لي بس



ايها الغالي يابن الغالي في قلوب المصريين كلها


فكك بقي من اللي انت فيه




................



مصر كلها بقت تقول

a7a


بقي شعار خلاص رسمي بفضل الاخ دبور

البنات تقول ايه سفت اايه

وتالاطفال بيقولوا 2 ايه سفن ايه



انا بقول عدد لا متناهي من الايه سفن ايه



.......................



بكره الداخليه بكرهها رغم ان فيها ناس حلوه كتييره



بكره وزاره الصحه بكرهها


بكره وزاره التعليم العالي

بكره وزاره المواصلات


اتخنقت بجد







بيقولوا عليا عملت ايه لمصر


مابحبش اقول بصراحه

انا بعمل وخلاص

صحيح مش زي ناس تانيه

بس بعمل اللي اقدر عليه





..................





جربت اقدم خدماتي للقوات المسلحه مرتين

مره في الاكاديميه في شهر 3

والمره التانيه في شهر 5 لما الجيش طلبني


وفي المرتين اترفضت ولله الحمد

هم الخسرانين بجد كنت هاعمل انقلاب عسكري واغير البلد


.................





عجبني اوي كام اغنيه السنه دي علقت مع دماغ الناس رغم انها سوقيه وشعبي


اغنيه قولي لي يامرايتي ايه اخره حكايتي

واغنيه العبد والشيطان


واغنيه طول عمري في المواجع

مش عارف امتي راجع



بارشحهم للميوزك اوارد بجد

شغالين في كل حته في مصر


لدرجه ان الخواجات بيرقصوا عليها




................





محمد حمدي العضو القديم بتاع ايجي فيلم والمدون المعروف فاز السنه دي في مسابقه نظمتها موقع العشرينات كافضل مدون وتسلم الجايزه من الاستاذ احمد المسلمي

مبروك يابني رغم انها متاخره اوي بس بجد مدونتك رائعه



.....................



سؤال ممكن استغل نصيبي في مصر وابيع الصك الخاص بتاعي لاي حد يدفع اكتر بما ان العمليه بقت سايبه؟



احلي حاجه الشباب بيعرف يصرف نفسه وخاصه البنات


بما ان مافيش زواج وبقي صعب علشان الشقق

فبيقضوها صحوبيه وخروجات احسن ممما فيش

بس بحدود طبعا


والاجمل ان مافيش حد معترض

ولا انا



..................





عمال افكر في اكتب ايه تاني اكتب ايه تاني يااد؟


مش عارف بس غالبا كده البوست بقي دمه تقيل وكله حاجات نكد ورخمه


انا عن نفسي مش عاوز اكمله بس اهو اكتب وخلاص بدل ماطق من جنابي

البوست الجاي ان شالله هاختم به به السنه






ملحوظه الصوره اللي فوق

مش لحد معين هي بس لاي حد عكنن عليا وعلي ال 75 مليون مصري

في 2008


ويمكن ل 2008 نفسها


ربنا مايعيدها علينا تاني



الجمعة، 12 ديسمبر 2008

عن ..............?













الطبيب المصري



الشاب الضنن اللي طالع من ثانوي بيدخل كليه الطب كليه القمه كليه المجد كليه المستقبل ( طبعا ده كان زمان )
بيطلع عين امه في 6 سنين دراسه مميته كريهه بارده وسنه امتياز يطلع ياما بنظاره كعب كوبايه كبيره ومايعرفش حاجه الا الطب والشغل والدراسات العليا

ياما طالع حالف ميت يمين يعوض كل سنه من اللي شافهم في بهدله العيانين الغلابه واستنزاف اموالهم ويبقي مكاينه جشعه عاوزه فلوس وبس

ياما يبقي نبيه يحضر دراسات عليا او يمله بورد ويهج من البلد دي


النوع الاول ده بيتمرمط جدا وبيبقي مستقبله معروف فاتح عياده كاتب عليها اخصائي اطفال ولا نساء ولا باطنه وماحدش داري به اصلا وهيعيش ويموت مجهول



النوع التاني اللي بيفتح عياده وربنا فاتحها عليه ومابيرحمش شغال 24 ساعه وهمه ازاي يفضي جيب العيان وياحبذا بقي لو كان نايب ولا جراح في مستشفي كبيره قمه الاستغلال والجشع واستدراج المريض لعيادته الخاصه او المستشفي الخاصه الاخري اللي بيشتغل فيها بعد الظهر


النوع التالت مابيرجعش مصر الا في الاجازات او لو مؤتمر هو مدعو له وبس وبيقطع صلته تماما بمصر



ليه ده كله؟



علشان وزاره الصحه ووزاره التعليم العالي ساهموا بشكل كبيير في خلق الانواع التلاته
وهي مسح انسانيتهم وعواطفهم وخلق قالب اسمه انا دكتور علشان الفلوس مش دكتور علشان العلم ولا علشان الانسانيه والبدنجان الابيض ( مابحبيش علي فكرهالبدنجان اصلا )
الواحد من دول بيبقي متخرج عاوز شقه ويدور علي عروسه وطبعا واكيد مش هيبص لواحده زمليته مايعرؤفش عنها حاجه الا لو كان شاب فاقد ايام الكليه ومقضيها كافيتريات وعارف كل البنات
ويدخل اي بيت يقولك انا الدكتور

متوقع اي واحده هيغمي عليها لما تعرف انه دكتور وتقع في دباديب اللي خلفوه وكلام بقي من عينه عريس لقطه ويبقي الناس كلها باصه عليه في الرايحه والجايه والجيران مجهزين بناتهم للعرض ادام سيدنا الدكتور





طبعا مش كل خريجي كليه الطب بالشكل ده فيهم ناس محترمه بس قله قليله للاسف

لو طبعا واحد حالته حكيانه وبيكح تراب هيشتغل في وزاره الصحه بالمرتب الهزيل والحوفز ويستحمل البيروقراطيه والروتين الخنيق ويتدمر تماما ويموت طموحه
ويبقي عبد لرؤسائه وللسيد الوزير

ولو هو لسه فيه رمق ممكن يدور علي عقد اعاره بره ان شالله حتي في مستوصف ويستحمل الغربه والبهدله والذل
ولو غلط يروحوا جالدينه 1000 جلده زي ماحصل في بلد لااسف كنت بحبها





غلطه مين؟




غلطته انه راح بهدل نفسه علشان لقمه العيش ويعيش عيشه كريمه كانسان بدل عيشه الفار القحط في مصر؟

لا طبعا غلطه مجتمعه وحكومته اللي مابتهمتش بحال الاطباء

متوقعين ايه من اطباء مش بياخدوا تدريب كويس ولا تعليم مناسب ولا ظروف ماديه مريحه وظروف اجتماعيه مناسبه انهم يعملوا للبلد؟

بصراحه بحسد اللي بيصبر علي الوضع ده وباعتبره اسطوره

ده بالاضافه للمستوي السيء للوحدات والمستشفيات في الاقاليم البعيده في الاماكن الصحراويه او المنعزله
والفساد الاداري وعدم وجود رقابه مناسبه والمهازل والمسخره اللي بتحصل

ولو حاولت تعمل شكوي او تتصرف تصرف مناسب هتللاقي الكل وقف ضدك ويتهموك بالتقصير والاهمال ( خدوك بالصوت )

الطبيب بيبقي عاوز يشتغل في مكان يساعده انه يشتغل بضمير وذمه ويبقي عنده امكانيات كويسه تخليه مقبل علي العمل ويساعد فعلا الناس الغلابه مش بتوع مستشفي دار الفؤاد
ولا السلام الدولي


قالك طب ؟




طب من بقك
























عن
....................

........

انا وعلي البدري






الفتره دي بيتعرض ليالي الحلميه ودي المره ال عاشره اشوفها بقالي 20 سنه كل مالمحها اقعد ادامها علي طول


علي البدري شايفه شبهي رغم ان الكل بيقوللي لا ماافيش شبه خالص انت مختلف تماما عن الشخصيه دي

اقولهم انا حاسس ان اسامه انور عكاشه لما كتب الشخصيه دي كتبها علشاني مخصوص وده طبعا في المشمش

علي البدري اتولد مع ثوره يوليو ه

علي البدري جرب اليتم بعد وفاه امه واتربي بعيد عن والده بس اتربي في حضن الحاره المصريه الاصيله اللي فيها عبق مصر الحقيقي والللي برع في وصفه العظيم اسامه انور عكاشه

علي البدري كان متفائل وله حلم وطموح وشهم وطيب وحنون
علي البدري حب رفيقه صباه زهره

علي وزهره كانوا بيمثلوا حلم مصر في الستينات حلم الشباب الواعد الزاهر المتفائل الطموح

علي كان مؤمن بايدلوجيات وقناعات ومؤمن بماديء الثوره والعداله الاجتماعيه

علي دافع عن الثوره وحب جمال عبد الناصر وكان شايفه اب





علي اتكسر قلبه وروحه بالنكسه
شاف كل اللي حلم به بينهار



علي دخل السجن بسبب انه بينتمي للنظام القديم وبسبب انه قال كلمه حق

علي ضاع مستقبله وانعزل وتقوقع علي نفسه
واتغيرت نظرته للحياه
وترك احلام البراءه والعفه ورا ظهره
وترك طموحه العلمي والعاطفي وداس علي قلبه بعد مازهره اتخلت عنه

علي قرر انه يواكب العصر ويمشي مع الموجه

علي بدا عهد مظلم قاسي واصبح راسمالي جشع



علي انضم للحزب الوطني لضمان السلطه

علي غالبا هو واحد من 4 شخصيات معروفه حاليا في الحزب الحاكم ومن كبار رجال الاعمال والرموز الاقتصاديه ( ماحدش يقولي مين علشان انا باخمن وبس )

علي داس علي الكل لتحقيق مجد خاص به لوحده وللنتقام من الثوره اللي ضيعت احلامه

علي تايه مايعرفش هو عاوز ايه وبيعمل كده ليه

علي عاوز يرجع للحلميه ولحضن ماما انيسه ولزهره


بس خلاص مابقاش ينفع


بعد ده كله وكم الاختلاف اللي بيني وبين علي

بس مازلت مصر ان علي بيشبهني

فيه حاجات شايفها بتربطني به

ايه هيا؟

الله اعلم







عن اخر الرجال المحترمين




السنه اللي فاتت كان ليا الشرف اني احضر ندوه للمفكر الكبير فهمي الهويدي

ها كنت اسمع عنه لكن عمري ماقريت له

فهمي الهويدي في حوالي 8 صحف ومجلات عربيه وكان له عمود يومي في جريده الاهرام وهو من نوعيه الرجال اللي له وزنه وقلمه اهم حاجه عنده

كان مابيخافش من النظام رغم انه بيكتب في جريده تابعه له

الاهرام حاول يعمل رقابه عليه اكتر من مره طوال الفتره الطويله الي تقارب 30 سنه كتابه لكنه لم يرضخ لهم

وفي الاخر لما زهق منهم اعتذر نهائيا عن الكتابه في الاهرام وهو اصلا مش محتاج لهم في حاجه

امين الهويدي ودكتور علاء الاسواني هما الوحيدين اللي بقرا لهم في الجرانان الفاكس الدستور الاسبوعي غير كده ماكنتش قريت لحد تاني





عن دكتور محمد سليم العوا






انت بتحارب في الظلمه ومعاك قليلين لكن هتوصل في الاخر

تحياتي لجمعيه مصر للثقافه والحوار وللقائمين عليها


















عن اسكندريه



في الشتا انت عذراء خجوله فاتنه رقيقه



باحبك في الشتا باحضنك واضمك جوايا



في الشتا انت رايقه هاديه بسيطه



معلش تقلت عليكي اليومين اللي قبل العيد بس اعذريني كنت محتاجلك اوي ومحتاج لبحرك


صحيح رجعت عندي برد ونمت اول يومين بتوع العيد في البيت



بس برده انت علي قلبي زي السكر



بحبك اوي وبحب السمك والجمبري بتوعك




الأحد، 7 ديسمبر 2008

مناجاه


وحدي في ظلمه ليلي
في وحشه دربي
همي يثقلني
ذنبي يؤلمني
وحدي ادعوك وارجو
من ذنبي اشكو
مالي سواك
انا في حماك
فارحم عبدا ناجاك
يالله
رباه هداك مازلت اسير
وعلي العصيان ماعدت قدير
واغفر ذنوبي فانا الفقير
قد عاد القلب في الدرب يسير
فرحا مشتاق لله يطير
ورجاه رضاك
يوم لقاك
انت القدير
فارحم عبدا نجاك ياالله

الاثنين، 1 ديسمبر 2008

stations








" زيز تووت اتش زيز توت اتش ياللا زيز قطر قطر "




انا وعمي عبد العزيز وابي علي محطه القطار 1988








...........................................




الجمعه 9 ذي الحجه 1404 هجريا

جيت الدنيا
................................................
1993
اول لقاء ليا مع الراجل اللي اثر في تفكيري واهتماماتي بعد كده
دكتور احمد خالد توفيق



.......................................



ابريل 2007

فرح فاطمه الزهراء اول الجيل التاني من العيله وبدايه انفراط عقد رابطه الطفوله ولمه العيله


..................................................


العيد من كل سنه بنقضيه في البلد

السنه دي لا ولا اللي جايه ولا اللي بعدها

بح خلاص

كله مشي وكله سافر وكله انشغل

.......................................................


"life is like box of choclate u never know wat it comes for u"
tom hanks

.,..........................................



" to die as good one...or live along to see ur self as villan"





harvey dent from dark knight






...................................


بقالي 9 سنين بسافر مابطلش سفر في كل حته

خلاص بقيت انا والسفر زي الميه والهوا

نفسي ابطل واستقر في حته

لكن يظهر ان انا مابستمتعش بحياتي الا بالسفر

والنوم

انا شايل مخزون استراتيجي للنوم اول ماوصل لنهايه الرحله

هنام نوم الابل بجد





.........................................

" find u.....love u........and marry u"






from atonemnet



......................................................................

every passing second is another chance for change

..........................................

if u see the wonder
of a fairy tale
u can take the future
even u fail
i believe in angels
wen i know the time is right for me
i cross the street
i have a dream
abba
............................................
2004 ديسمبر

ماما : محمد بص ماتزعلش واهدي كده

انا : في ايه

ماما : عمك عبد العزيز اتوفي النهارده الفجر

انا : ...................

دوخه

الاوده

الظلمه

السرير

البطانيه

العياط

نووم

...............................................

2008

بابا : مش هينفع يامحمد انا نفسي بجد لكن مش هاقدر اساعدك

انا :......................

ماما : ماتزعلش نفسك لو ليك نصيب فيها ربنا هيجمعك بها ان شالله

انا : .....................

........................................................





" my gift is my curse "




فعلا دي حقيقه


مبعرفش استفيد بها خالص هي اللي بتتحكم فيا وبتسلب ارادتي

وياما سببت لي مشاكل علشان سوء استخدامها



...........................





انت نقطه ضعفي مابضعفش الا ادامك وبس




وانت سبب تمسكي بالحياه لغايه دلوقتي




فاكره لما قلت لك اني مش هاستحمل 2008 بعيد عنك




يظهر ان ده بيحصل متاخر للاسف





.................................







تيته تعالي اهرشي لي في شعري علشلان ايدك مريحه




1999








.......................................


2006 مارس

اول اتصال حقيقي بين كائن من عالم اخر بيمثل كل اللي حلمت به طول حياتي



...................................

1992

نفسك تطلع ايه يامحمد ؟

رائد فضاء

1995 نفسك تطلع ايه يامحمد

عالم فلك

1998

نفسك تطلع ايه يامحمد

دكتور بشري زي بتوع مسلسل ال ER

2001

نفسك تبقي ايه ؟

ولا حاجه شوفوا انتم عاوزيني ابقي ايه وانا تحت امركم


دلوقتي

نفسك تطلع فيين؟

نفسي اطلع له فوق

.............................






























MY FAVORITES CHILD HOOD MOVIES









...............................................








THE TRUTH IS OUT THERE




..............................................

ابله جيهان : شاطر يامحمد

استاذ محمد فياض : انت عبقري جبتها ازاي؟

ميس ريهام : u r so creative ...amazing




................................

كنت فاكر ان لقيت نفسي واتعودت علي الشخصيه اللي عايشها حاليا

ورغم سعادتي بها لكن حاسس ان ناقصها حاجه

بالظبط زي الاكله الدلعه


.......................................................

الساعه 4 و 5 الفجر من كل يوم

باشوف الله وباطلع له

وبابتسم

.................................

متاخدش في بالك تحلي لك

عيشتك وتروق

ارزاق الخلق علي الخالق

مش علي المخلوق

والدنيا دواير دايره بينا

من تحت لفوق

سيب بكره وخلينا علي اد الشوق

حميد الشاعري

1993

.............................


الاثنين، 24 نوفمبر 2008

الإخــوان الجدد















دي مقاله في مجله نيووزوويك المفضله ليا عن شبه اعتراف بحلمي الخاص بالحزب المستحيل







حزب الوسط








كتب:حسن عبدالله




في عام 1995، وبينما كان أعضاء جماعة الإخوان المسلمين في مصر ينزلون جثمان مرشدهم العام حامد أبو النصر إلى قبره، انطلق صوت القيادي مأمون الهضيبي عاليا يقول: "أبايع مصطفى مشهور مرشدا عاما".ران صمت الموتى على الجميع، وتقدم الشيوخ والقادة التاريخيون بسرعة ليبايعوا المرشد الجديد في حالة من التسليم التام.عدد من شباب الجماعة أصيبوا بالذهول والخرس






















وعندما أفاقوا من صدمتهم وحاولوا الاعتراض على هذه الطريقة في اختيار أعلى منصب في جماعة الإخوان المسلمين، كان السيف قد سبق العذل، وتم تثبيت المرشد الجديد وسط حالة من الضيق لدى الكوادر الشابة، التي تم تطعيم الجماعة بها لتنشيط التنظيم حسب اقتراح للقيادي عبدالمنعم أبوالفتوح، فإذا بهذه الكوادر تتصور أنه يمكنها تغيير الأسس التنظيمية التي قامت عليها الجماعة منذ إنشائها عام 1928، كعقد البيعة للمرشد العام على طريقة القرون الوسطى، أو عدم طرح برنامج والاكتفاء بالشعارات الجذابة، وفق طرح الشباب المتمردين على الجماعة.من رحم تلك اللحظة الفارقة، لحظة المبايعة،











ومن قلب الجماعة، خرج أول تنظيم إسلامي مدني، معلنا في برنامجه الالتزام بقواعد الديموقراطية والمواطنة وحقوق الإنسان والدولة المدنية، والقبول بالآخر والتعايش السلمي معه. إحدى القيادات الشابة، وهو المهندس الميكانيكي أبو العلا ماضي، قدم استقالته من الجماعة، وأعلن عن تشكيل حزب الوسط



كتنظيم مدني ذي خلفية إسلامية. وسرعان ما تبرأ الإخوان من الحزب ومؤسسه وأفكاره وأعلنوا القطيعة التامة مع أي توجه من هذا النوع، فيما سخرت الأحزاب اليسارية والليبرالية من التجربة كلها، واعتبرت القصة كلها مجرد "توزيع أدوار" بين القيادات الإخوانية، محذرة من أن جماعة الإخوان المسلمين أطلقت حزب الوسط كحصان طروادة تتسلل منه إلى الحياة السياسية ومنه إلى الهيمنة على الحكم في مصر










.لجنة الأحزاب التابعة لمجلس الشورى المصري بدورها تصدت للحزب الوليد. فمنذ عام 1996 وحتى الآن رفض إشهار حزب الوسط نحو خمس مرات، استنادا إلى أن الحزب يرفع شعارات إسلامية وهو ما يتعارض مع الدستور المصري الذي يرفض إنشاء تنظيمات سياسية على أسس دينية، الأمر الذي جعل جماعة الإخوان التي توصف بـ «المحظورة» تلجأ إلى خوض الانتخابات البرلمانية الأخيرة كمستقلين وتحصل على 88 مقعدا.وعلى الرغم من هذا، فإن وكيل مؤسسي الوسط، أبو العلا ماضي، تقدم في أكتوبر الماضي بطلب جديد بعد أن استجاب لكل الملاحظات التي علقت عليها اللجنة.















ويشعر ماضي في حديث مع نيوزويك العربية أنه ربما تتم الموافقة على قيام الحزب هذه المرة "فلم يعد هناك أي مبرر للتأخير. نختلف مع الإخوان ويعادوننا منذ نحو 12 عاما، ومازال هناك من يتهمنا بأننا غطاء لهم، أو يسمينا بـ «الإخوان الجدد». لسنا إخوانا بل وسطيون أو لك أن تصفنا بالأردوغانيين العرب.


















مشروعنا يتقاطع مع الإخوان المسلمين تماما كجماعة تقوم بوظيفة دعوية ذات غطاء سياسي، أما نحن فحزب سياسي مدني".تثير تجربة رئيس الوزراء التركي رجب طيب أردوغان حماس تيارات الوسط الإسلامية، لذلك فهي تحاول التأسي بحزب العدالة والتنمية ذي الميول الإسلامية الذي يتزعمه أردوغان. ويعتبر عدد من مؤسسي هذه الأحزاب أن التجربة التركية رائدة وجديرة بالتأمل، وحتى عند بعض المعارضين للتيار الإسلامي، كالمفكر المصري الليبرالي السيد ياسين، فإن التجربة الأردوغانية التي تقبل بالدولة المدنية وبتداول السلطة لها صدى ديموقراطي ينبغي سماعه.أبو العلا ماضي يحدد نقاط أساسية تبعد حزب الوسط عن جماعة الإخوان المسلمين من وجهة نظره: "فهم ـــ أي الإخوان ـــ يطرحون في برنامجهم الذي أعلنوه أخيرا ضرورة إنشاء هيئة استشارية دينية لمراقبة القوانين شبيهة بهيئة تشخيص مصلحة النظام في إيران، واعتبروا أن منصب رئيس الدولة ديني لا يتولاه إلا مسلم، وهو ما يؤكد فكرتهم عن الدولة الدينية. أما نحن فنؤمن بالدولة المدنية وبالمواطنة، وبأن منصب رئيس الدولة ليس دينيا، ويجوز للمسيحي أن يترشح لرئاسة الجمهورية كالمسلم تماما". ويضيف: "الإخوان يرفضون مساواة المرأة بالرجل في تولي منصب الرئاسة. هم لايزالون غير مؤمنـين بالديموقراطية ولا يمارسونها فيما بينهم. أتحدث عن تجربة، فقد عشت بينهم. تنظيم الإخوان كله ليس به امرأة واحدة ولا مسيحي واحد. أما نحن فمع الديموقراطية والمساواة التامة بين جميع المواطنين مسلمين ومسيحيين، رجالا كانوا أم نساء. نؤمن بالشرعية القانونية






. أما الإخوان فيعملون خـارج القانـون ولم يتقدمـوا بطلب لإنشاء حزب لهـم رغـم طرحهـم لبرنامـج".أما جماعة الإخوان المسلمين فترى أن أحزاب الوسط الإسلامية "تجربة حزبية فاشلة ليس لها حظ في المستقبل وفي الدوام" حسب رأي النائب الاول لحزب جبهة العمل الإسلامي ـــ الذراع السياسية لجماعة الإخوان المسلمين في الأردن ـــ إرحيّل الغرايبة الذي يضيف: "هذه الأحزاب عبارة عن جهود من أصحاب السلطة في إقامة أحزاب من أجل التشويش على الحركة الإسلامية ذات التاريخ العريق والبرامج الواضحة والمحددة، التي اكتسبت ثقة تاريخية كبيرة عبر السنوات والعقود، لذلك تحاول هذه الأحزاب أن تخرج للناس لتحمل مسمى الإسلام فقط من أجل تشويه الحركة الإسلامية لا أكثر".يبدو أن تجربة حزب «الوسط» المصري فتحت الباب أمام ظهور تيارات إسلامية مدنية ذات توجهات ديموقراطية في الأردن













فقد شهدت الساحة السياسية العربية حضورا لتنظيمات، خرجت من رحم الإخوان المسلمين لكنها ابتعدت عنها، ولعلها تجاوزتها بالفعل.ففي المغرب، اندمجت حركة الإصلاح والتجديد الإسلامية، مع الحركة الشعبية الدستورية الديموقراطية ليكوّنا تنظيما إسلاميا ديموقراطيا يؤمن بتداول السلطة وبالدولة المدنية تحت مسمى حزب العدالة والتنمية. ويصف بعض الخصوم السياسيين هذا الحزب بـ"إسلاميي القصر" نظرا لأنهم في حالة وئام مع النظام في المغرب. ويعد هذا الحزب القوة السياسية الثانية في المغرب، حيـث يملـك 46 مقعـدا في البرلمـان، بعـد حـزب الاستقـلال الحاكـم الـذي فـاز بـ 52 مقعـدا.وقد فاجأ حزب العدالة والتنمية الجميع بمراجعاته الفكرية، والتي أعلن فيها صراحة تخليه عن شعار إقامة دولة إسلامية "بعدما تبين أن الدعوة إلى ذلك تعني أن الدولة القائمة في المغرب ليست إسلامية، وهذا ليس صحيحا" حسب تعليق عبدالإله بن كيران الأمين العام للحزب الذي يضيف بأن "أفكار حسن البنا مؤسس جماعة الإخوان المسلمين في مصر ليست مقدسة

















. فالفكر يتطور والاجتهاد البشري لابد أن يخضع للتجربة للتأكد من مدى ملاءمته وقابليته للتطبيق. نبحث عن مناطق مشتركة مع الحكام ونساهم في تعزيز الديموقراطية، ونراجع فكرنا عن قناعة ولا نقدم تنازلات".ثمة عوامل موضوعية تدفعنا إلى التوقف أمام ظاهرة أحزاب الوسط الإسلامية. فمن ناحية، تعبر هذه الأحزاب عن درجة متقدمة من الوعي السياسي طالما افتقدته الساحة السياسية العربية منذ نشأة الدولة الوطنية، بفعل الصراع الضاري بين الدولة وتيارات العنف الديني، وهو ما أثار الشكوك حول فرص إنضاج رؤية سياسية إسلامية مدنية.ومن ناحية أخرى، تمثل هذه الأحزاب خروجا عن التصنيف التقليدي لتيارات الإسلام السياسي ما بين معتدل وعنيف، وتضيف معيارا جديدا للتصنيف يتمثل في الكفاءة السياسية، أي قدرة هذه التيارات على استيعاب مفاهيم الديموقراطية، والعمل المدني، والتعاطي معها بعيدا عن هيمنة «الديني» على ممارساتها السياسية. فهذه الأحزاب، حسب رأي الباحث السوري عبدالله تركماني، وإن كانت تتمتع بمرجعية دينية تحكم رؤيتها لذاتها وللآخرين، شأنها في ذلك شأن التيارات الإسلامية الأخرى، لا تنطلق في ممارساتها السياسية من خلفية دينية، ولا تمثل المرجعية الدينية بالنسبة لها سوى "حاضنة حضارية" تتسع لجميع أطياف الاختلاف السياسي والديني داخل الوطن الواحد.ويضيف الباحث السوري المقيم في تونس عبدالله تركماني في دراسة له صدرت عام 2007 وعنوانها «الحركات الإسلامية والمجال السياسي في المغرب والبلاد العربية» أن "أحزاب الوسط الإسلامية تطرح مشروعا حداثيا للمجتمعات العربية، قد يعتبر «خلاصا» للإشكالية التي أرّقت الفكر الإسلامي طوال القرن الماضي، يتمثل في كيفية العلاقة بين الدين والحداثة، وما تنطوي عليه من قضايا خلافية تتعلق بالهوية الحضارية وشكل العلاقة مع الآخر".تطرح أحزاب الوسط الإسلامية في برامجها رؤية للعلاقة مع الغرب، تغاير رؤى معظم التيارات الإسلامية الأخرى












فهي لا ترى الغرب عدوا على طول الخط، وإنما قد تكون العلاقة محكومة بالتعاون. أو كما يقول مروان الفاعوري الأمين العام السابق لحزب الوسط الأردني الذي تأسس عام 2001، لنيوزويك العربية: "نتأسى في هذه التجربة بحزب العدالة والتنمية في تركيا، الذي رسم علاقة صحية متكافئة مع الغرب".لكن الفاعوري يدعو إلى احترام حقوق المسلمين، مؤكدا أن الغرب فيه الصديق والمحايد والعدو: "نعتقد أن تنظيم القاعدة هو من يسعى إلى إحداث هوة بين العالم الإسلامي وأمريكا وأوروبا"




.الواقع أن هذه الرؤية المتصالحة مع الغرب استوقفت عددا من الباحثين الغربيين فسعوا إلى رصدها ميدانيا وإيديولوجيا.ولعل الأب الحقيقي للتيار الأكاديمي الأمريكي الذي حاول بعمق شديد ونادر تأصيل «ليبرالية إسلامية»، هو عالم السياسة الأمريكي المعروف ليونارد بايندر في كتابه «الليبرالية الإسلامية: نقد للإيديولوجيات التنموية» الصادر عام 1988 عن دار نشر مطبعة جامعة شيكاغو. ويخلص الكتاب إلى أنه "بغير تيار قوي لليبرالية الإسلامية فإن الليبرالية السياسية لن تنجح في الشرق الأوسط".وتقدم الباحثة تشريل بينارد، التي تعمل في قسم الأمن القومي بمؤسسة راند الأمريكية، في دراسة لها صدرت عام 2003 بعنوان «الإسلام المدني الديموقراطي: الشركاء والموارد والاستراتيجيات»، توصيات عملية لصانع القرار الأمريكي "بغرض الإسهام في بلورة تيار الإسلام المدني الديموقراطي بشكل مباشر وغير مباشر معا، من خلال نقد التيارات الإسلامية الأصولية والتقليدية، ودعم وتشجيع التيارات الإسلامية العلمانية والحداثية" حسب قراءة للباحث المصري في الشؤون الاستراتيجية السيد ياسين.بالرغم من كل هذا التفاؤل، فلابد من الاعتراف بأن أحزاب الوسط الإسلامية مازال تأثيرها محدودا، وليس لبرامجها نفس الصدى والبريق الذي تثيره شعارات جماعة الإخوان المسلمين أو بقية التيارات السياسية الإسلامية الأخرى في الشارع العربي









. فشعار «الإسلام هو الحل» الذي ترفعه جماعة الإخوان في كل البلاد العربية والإسلامية، مازال قادرا على إلهاب حماسة الجماهير، وحشدها خلف الجماعة في أي انتخابات






.كما أن أفرع الجماعة في مصر، أو في غيرها كالكويت والأردن وسوريا وتونس والجزائر، راجعت أدبياتها وقامت بإصلاحات باتجاه الديموقراطية، جعلتها ــ فكريا وتنظيميا ــ قريبة من أحزاب الوسط المنشقة عليها، وهو ما جعلها تجمع بين شعارات الإخوان المسلمين الجذابة، والإصلاحات التي مازالت نسبية. فموقف الإخوان المسلمين من المرأة والمواطنة والدولة المدنية مازال سلبيا وغائما، حتى إن خصوم الإخوان من التيارات السياسية الأخرى يتهمونهم بسلوك طريق الديموقراطية بهدف الانقضاض عليها، والانفراد بالحكم.ومن هنا فإن نشوء تيار إسلامي مدني تحت أي غطاء، حسب رأي كثير من المختصين والمتابعين، سواء أكان باسم أحزاب الوسط، أم عن طريق إجراء إصلاحات جذرية في جماعة الإخوان المسلمين، يعتبر أمرا حيويا في إطار عملية تثوير المفاهيم الدينية، استنادا إلى الإيمان بدنيوية الممارسة السياسية، وتبعات الدولة المدنية من الديموقراطية والتعددية وتداول السلطة، شريطة أن تكون البرامج السياسية قائمة على أسس مدنية ومعايير عقلانية، بعيدا عن المزايدات الدينية والتدخل في حياة الناس الشخصية.




وهنا يمكن أن تصل تجربة هذه الأحزاب إلى الجماهير، وتصل معها إلى إصلاحات جذرية قد تكون هي الحل والخلاص لمشاكل المنطقة، بعيدا عن الشعار شديد الجاذبية في غموضه: «الإسلام هو الحل»، الذي جعل الإسلام مصدر كل الحلول، دون أن يقدم حلا ناجعا للكثير من المشاكل التي تواجه المواطن العربي أو المسلم، ودون أن يترجم إلى واقع عملي على الأرض









.بمشاركة أحمد زكريا في الكويت





الجمعة، 21 نوفمبر 2008

جنينه ..............الخوف





الحياه مش لعبه
الحياه لو لعبه
ودلوقتي اقدر استوضح كلمه نفض
لما لقيت تفكيري ان التركيز يربط
يعني بمعني اصح مهتم بالتغطيه
والوقت ماشي بالعكس وتقوله لا باس
وقلبك من كلمه هتعيش ويكون صغير حس
خبره الدنيا دلوقتي مالهاش لازمه لحد ماتعدي الازمه
وفكك من اللي انت فيه
اعرفني الاول قبل اسمي
انا بعمل مزيكتي الحيه ماحدش يحكمني
الحياه لو لعبه كنت قفلتها
الحياه لو لعبه كنت قطعتها
كنت ولعتها
جمعتها كسرتها
ركبتها
ولعبتها
وكسبتها
كنت دلعتها
كنت رقصتها عاكستها روقتها
==============

انا لسه عايش يعني الخطر لسه موجود فوق الحدود ضد الوجود
باكتب علي ورق محروق
والمعلبات والمخلوقات محبوسه في حوض اسماك
علو الصوت ياللا نفجر السماعات
ودي الحقيقه مش احساس ايوه عالم تاني والناس عليا ضيوف وبيشاركوني في رزقي
فلما الموت يعدي جنبي وهو خايف مني
انا اتولدت اصلا مركب بس عندي محركني
عاوز تعطلني بحقدك وهبلك
لا احلق لنفسك
عاقل مش طبيعتي
فارس دي كنايتي
ضعفي ده قوتي
وجنوني هو غريزتي
==============
كنت مقضيها شوف الصدف
ماكتنتش متخيل الساعه ممكن تقف
والكتاب يتني في صفحات كتيره
فجاه الاقي نفسي في الصفحه الاخيره
مع ان كلمه موت بقت حاجه عاديه ده حتي بقت يقولوها في الاغاني العاطفيه
مش حاسين بالمعني ماشافوش بعينيا ومش حاسين بالحرب النفسيه
ده النظام سيبوني براحتي هاضربها صرمه واقطع بطاقتي
اصلي انا مووزن مجنون وضد الهجوم
الحياه لو لعبه كنت ولعتها
من فيلم جنينه الاسماك لفريق ارابيان نايتس
==============
نقد الفيلم في الوصله الاتيه