الجمعة، 30 مارس 2012

انيننا


انك تبقي تايه في الدنيا وماشي زي مالدنيا ممشياك او الباقيين ممشينك
وبعد كده تكتشف انك تقدر تعمل اللي انت عايزه وان لك رساله وهدف وانك مش مجرد كومبارس مش واحد بيصحي وياكل ويشرب وينام ويمارس الجنس ويشتغل ويتفرج علي التلفزيون ويخلف عيال وخلاص

تقدر تقف ادام الدنيا وتتحدي كل حاجه من بدايه التقاليد والقيود والنظام والمجتمع نفسه

انت بتدور علي ايه منصب؟ زوجه؟ شغل؟ سياره؟ رفاهيهه؟ سيطره علي الناس؟ سلطه؟ فلوس؟

انت لك هدف اعظم بتحاول تبقي فوق ده كله

انت بتتحمس وتسخن وكلك نشاط لكن هتلاقي كل حاجه بتثبطك والاحباط هيملاك والفشل هيجري وراك

بتبقي عايز تفرقع

عايز تتحرر

هيبتدي الانين يطلع ويبتدي الصوت يكبر جواك مش هتعرف تنام هتجيلك كوابيس هتتالم هيجيلك صداع مابين انت عايز تبقي ايه والباقيين عايزينك تبقي ايه

نفسك تبقي حاجه معينه نفسك تبقي كاتب معروف او مفكر او دكتور محترم نفسك تسافر بره تحضر زمالات اجنبيه نفسك تشتري حاجات كتيره نفسك تتزوج اللي بتحبها بس الكل بيحاول ياخدها منك ويبعدها عنك ويبوظوا اللي بينكم لغايه ماتكرهك
تحاول تبكي تصرخ مش هتقدر

هتلاقي الكل بيتكلم عنك من ورا ظهرك بيراقبك هيجيلك وسواس شك عقده اضطهاد

مش هتعرف تبقي باكتر من شخصيه هتتحول لحاجه دكتور جيكل ومستر هايد او زي ماحصل لادوارد نورتون في نادي القتال او دي نيرو في فيلم تاكسي درايفر

هتعمل حاجات وانت نايم بشخصيه تانيه مبتكلمش عن الاحلام بتكلم عن الفصام في الشخصيه هتنقسم اتنين

ضميرك هيطاردك لو كنت مقصر ناحيه حاجه معينه لو كنت مسئوول عن حاجه لو كنت لك التزامات وهربت منها لو كنت اتسترت علي جريمه لو كنت شهدت زور لو كنت ظلمت او سرقت او اذيت

هتحاول تصحح الغلط هتحاول تمنح نفسك فرصه هتحاول تعوض هتحاول تنتقم تحاول ترجع الحق تحاول تفضح الباقيين

او تتحول لشخص كريه مظلم شبه انسان ونصك التاني كائن غريب

تبتدي تفقد كل مايربطك بعالم البشر



...............



فيه ظلم رهيب بيحصل فيه غش فيه كدب فيه خداع فيه تزوير وخيانه فيه تجسس

فيه اشياء كثيره بتقتل البني ادم في بلدنا

فيه عوامل طرد كتيره

احنا بنحاول نعيش في مجتمع غلط وعايش بالغلط بس فاكر نفسه صح وبيمنعنا من الصح الصحيح

احنا جبيل اتربي علي ايد جيل اتحكم غلط واتغرس فيه حاجات بشعه بقالها ستين سنه

احنا وكستنا ابتدت سنه اتنين وخمسين ومفوقناش منها لغايه دلوقتي



.............



روايه انين باعتبر احداثها مكمله لروايه يوتبيا لاحمد خالد توفيق

بتتكلم عن المستقبل المخيف اللي مستنبي مصر لو مكانش الثوره قامت احداثها في اسكندريه

عن مؤامره بشعه بتتعمل علي الشعب لامتصاص طاقته بتواطيء عده شخصيات تمثل االنخبه المثقفه

المهندس الغني ابن الذوات والصحفيه المتدينه واستاذ الجامعه المرموق

كل واحد حاول يقتل ضميره وينسي ان فيه مجتمع بيعاني من الفساد والفقر والظلم مجتمع بيموت ومش عايش عيشه بني ادمين

احنا مبنفكرش غير في نفسنا ومراكزنا ومنظرنا ادام الناس بكل انانيه ومابنفكرش الناس التانيه عايشه ازاي


الروايه صادمه جدا وتثير القشعريره

احداثها تنتطبق علي دلوقتي رغم ان ناس هتقوللي مالنظام سقط خلاص بس المشكله مكانتش في النظام المشكله فينا احنا في مجتمعنا


مجتمعنا هو اللي مريض ومليان بؤر صديديه وتقرحات ومشوه لكنه فاكر نفسه جميل ونظيف

نهايه الروايه بتنذر بنوه وعاصفه قادمه بموجه جايه من البحر

نهايه الروايه بتنذر بضياع اسكندريه او البلد كلها


ياريت نفوق قبل مانغرق



الثلاثاء، 20 مارس 2012

لهذا خلقت السينما


ستظل السينما اروع اختراع واهمها في تاريخ البشريه من وجهه نظري بعد اختراع الهاتف

السينما ليست مجرد وسيله لقضاء وقت الفراغ او التسليه

وليست مكان للمقابلات االغراميه او الهروب من حر الجو الي التكييف كما يحدث في مصر

ليست مكان لاكل الفيشار ومقابله الاصدقاء او الاستمتاع بفيلم تافه لمده ساعتين

السينما اعمق واعظم بكثيير واهم من كل ذلك

شعور ان تدخل قاعه السينما المظلمه لتنفصل عن العالم الخارجي وتتوحد مع قصه وابطال وموسيقي وعالم اخر يجعلك تنتشي
خاصه لو كانت عوالم ترغب في الهرب اليها فتري نفسك مكان البطل او البطله

تبكي وتضحك تتامل تندهش تخاف تتحمس تستفيد

تري قصص خياليه بموؤثرات خاصه بصريه ومؤثرات صوتيه تجعلك في قلب الحدث او تشاهد قصه تاريخيه تضيف الي معلوماتك
او قصه رومانسيه تؤثر فيك

ظلت السينما وستظل اهم العوامي التي شكلت شخصيتي بعد الادب بالاضافه انها ساعدتني علي تحويل الادب الي قراءه سينمائيه تخيليه

سبيلبرج وسكورسيزي هما اكثر المخرجين قربا الي ثم تيم بيرتون يليهم

سكورسيزي في فيلمه الجديد هيوجو

ادي تحيه وتكريم الي صناعه السينما بفيلم عن احد اهم صناعها وهو جورج ميليس

الفيلم عن رجل وهب حياته وكل ماميملك من اجل السينما ولم يبالي بالخساره او الكسب وابتكر مؤثرات بصريه وافلام جعلت تحقيق الاحلام ممكنا

في احد المشاهد الجميله يسال صبي صغير عن السينما فيجيبه جورج انه ان كان يتسائل عن مصدر الاحلام فهو هنا يحيط به في هذا المكان المقصود به الاستوديو الذي يصورون فيه الافلام الخياليه

الفيلم ممتع جدا خاصه تقنيه الابعاد الثلاثيه التي تم تصوير بالفيلم بكاميرات خاصه بها والموسيقي الساحره الكلاسيكيه وجو باريس في النصف الاول من القرن العشرين بالاضافه الي مدير التصوير كل ذلك جعل الفيام في غايه الروعه ولا عجب انه ترشح الي عده جوائز للاسكار نال منها خمس جوائز خاصه بالمجالات التقنيه كموثرات بصريه وجماليه وصوتيه

سكورسيزي قدم فيلما مشابها لاجواء عالم تين بيرتون وسبيلبرج من حيث العوالم الطفوليه خاصه اننا ركزنا في قصه الصبي الذي يعيش بمحطه القطار وحيدا

تحيه مني الي سكورسيزي والي رساله الفيلم الجميله

الأربعاء، 14 مارس 2012

بعضا مني


سانتخب دكتور عبد المنعم ابو الفتوح لاني احبه منذ كان عضوا بالجمعيه الوطنيه للتغيير وكتابابته عن البرادعي ودفاعه عنه في عهد مبارك ولتاريخه النضالي ولانه نزل معنا في اول يوم من الثوره امام دار القضاء العالي لم يخف من بطش الامن وقال كلمه حق في وجه سلطان جائر

لانه يمثل لي الوسطيه والليبراليه الاسلاميه التي اتمني تحقيقها في الوطن

ولانه يشبه دكتور محترم اعرفه وتربطني به علاقه جيده هو دكتور اسماعيل غنيم

كنت اود ان اختار خالد علي ذلك المحامي الشجاع لانه يمثل الشباب واعترف انه شاب محترم ومناضل بالاضافه لحلمه بتطبيق العداله الاجتماعيه الاشتراكيه

...............

يوم الخميس انتظر لقاء هام مع دكتور محمد غنيم في لقاء ينظمه قائمه الثوره مستمره التابعه لاناخابات النقابه الاسنان اتمني ان اقضي يوما جيدا باذن الله
..............


ماحدث مع سميره ابراهيم هو عهر ودعاره لم يسبقنا بها الاولين مثلما حدث من موقف العسكر من تعريه الفتاه المنتقبه في احداث مجلس الوزراء ويدل علي قذاره القضاء العسكري والقضاء عامه مثل تورطه في تهريب الموظفين الامريكيين في قضيه التمويل الاجنبي

انا لا اعتبر نفسي رجلا لاني لم اساند سميره واراها مثل اسماء محفوظ ونواره نجم ومثل كل فتاه واجهت المجتمع لوحدها والسلطه اكثر رجوله مننا نحن معشر الرجال للاسف

يوم الجمعه وقفه احتجاجيه ومسيره امام دار القضاء العالي باذن الله

...............

" انا بتهته وانا بتكلم مع الناس بس مبتهتش وانا بتكلم مع نفسي بس انا مش عايز اتكلم مع نفسي انا عايز اتكلم مع الناس"

من فيلم رسائل بحر
.............

شخص حقير اهدل له تلك السطور يدعي مصطفي توفيق

انا اعلم عنك الكثير فلا تضطرني الي فضحك ياعزيزي وكشفت الاعيبك والاسلوب الذي تستخدمه معي ومع اصدقائي لن ينفع

سابقا كنت اتعاطف معك واشعر بتانيب الضمير واحسست بما مررت به رغم ان ماحدث لم يكن بارادتي وحدث بتدبير من الله لان هذه الامور ليس لنا يد فيها لكن فجرك سيودي بك الي طريق مظلم فالافضل لك ان تتوقف عن اذيه الاخرين

......................

جريده الشروق استعادت رونقها مره اخري في عدد الاربعاء من كل اسبوع بصفحه المعصره لبلال فضل وعمرو سليم

...................


اليوم كان هناك انترفيو في الملحقيه السعوديه للعمل في القطاع الطبي الخاص بوزاره الدفاع بمرتب مغري ومجزي ولكني لم اذهب

ومن اسبوع جاء لي فرصه عمل اخري بمكه وقبلها بالرياض بعروض مغريه

والسبب؟

هو انت لاني لم اتاقلم بعد ان ابتعد عنك او اتقبل فكره ان لا اراكي مره اخري او ان يذهب كل مننا في طريق بعد ان اصبحت طرقنا متناقضه وبعد التغيير الذي طرا علينا

لا استطيع ان امحيكي من حياتي ومازالت في انتظار اتصال منك

مازال عندي امل ان تتركي كل شيء وتندمي علي قراراتك وتختاري ان تسافري معي ويعود قلبك لي
اعلم ان هذا امل ضعيف لكنه امل مثل اسمك لم يتبقي لي غيره

.....................


اجتمااع واتحاد الاولتراس والوايت نايتس الاسبوع الماضي هو اتحاد تاريخي بمناسبه مرور اربعين يوما علي مجزره بورسعيد دون القبض علي الجناه ودون القصاص

عندما رايت هذا المنظر كنت رايته يوم احداث محمد محمود ادركت ان للثوره جيش يحميها

.....................

اعترف اني لم اعد اكترث بالحديث عن السياسه حتي لا اصاب بالاحباط لكن السبب الرئيسي هو غياب البرادعي عن الصوره

واعترف اني اصبحت مغرما بالمسيرات ولم اشارك في ايه مسيره منذ تلك المسيره الرائعه لوزاره الدفاع منذ اربعين يوما
المسيرات تشعر بها بالحياه
....................

امر بضائقه ماليه تمنعني من تحقيق عده احلام لكني صابر

اود تطوير نفسي او فعل اشياء عديده اود الرجوع للجامعه واستكمال مافاتني......

....................


غرفه العنايه المركزه من افضل ماقرات هذا العام بعد روايه الطنطوريه

عز الدين شكري فشير ابدع في تجسيد جيل كامل بكل جوارحه وتقلباته

..............


اتجمعوا ياناس

ادوا الحياه احساس النور هييجي اكيد

راجعين ياحياه راجعين بقلب جديد راجعين بامل يزيد

راجعين من الماضي رايحين علي المستقبل بعزمنا الماضي الدنيا تصبح اجمل


فرقه اسكندريللا




السبت، 3 مارس 2012

الوقت




ليله شتويه
كان فيه خطط كتيره منها اسافر اسكندريه الحق الجو هناك

او ادخل سينما واجيب كتاب وائل غنيم الجديد علشان افتكر ان كان فيه مشروع اسمه الثوره المنحوسه

لكن لسوء الاحوال الجويه والجو الممطر ولاصابتي بالبرد قدر الله ان اقضي الليله مع صح0ابنا بتوع بيت الشمس

في جو اسري حميم اتعشينا مع بعض وشربنا شاي مع بعض مابين متزوجين ومخطوبين وعزاب بس افتقدت اللمه دي من فتره

زي مانا مفتقد حاجات كتيره مفتقد خروجاتنا ومفتقد اني اسافر حتت جديده مفتقد نفسي

مفتقد الفتره اللي قبل الثوره ومعرفش ايه اللي جرالنا من بعدها بس انا متبسطتش من بعد الثوره او بالتحديد من بعد مارس الفين وحداشر

مفتقد المدونه وجو المدونات ونتابع الاخبار عن بعضنا وننزل بانشطه سياسيه او ثقافيه او فنيه

مفتقد الكتابه مفتقد ارجع اكتب واقرا مفتقد الخيال

مفتقد ايام الجامعه فيليب وحسن وهشام وايام الماستر
مفتقد ايام ماكنت بقرا لمحمد امين راضي سيناريوهاته ونقعد نتناقش فيها

مفتقد ايام ماكنت بروح كورسات ومفتقد ايام ماكنت حاطط خطط لبكره

مفتقد ايام ماكنت بنتجمع في البلد قبل ماكل واحد يتزوج وينشغل

مفتقد ايام المظاهرات في عهد حسني مبارك لما كنا ننزل خايفين بس مؤمنين باللي بنعمله

مفتقد صحابي في ايجي فيلم

مفتقد سهرنا يوم الخميس انا وطارق وعبد العاطي وعمرو

مفتقد ايام ماكان ليا مشاعر نظيفه بريئه مفتقد دقات قلبي بحراره

مفتقد ال تمتنتاشر يوم بتوع الثوره لدرجه نفسي ارجع اعيشهم كااحسن فتره في حياتي علشان كانوا حلم جميل

مفتقد شخص كان في حياتي بس اختار طريق وانا اخترت طريق

انا مبحسش بالدفء الا هنا في المدونه ومابقيتش احب الفيس بوك زي زمان

انا مفتقد حاجات كتيره بس هارجعها وارجع اعيشها وفي نفس الوقت هاكمل حياتي مش هوقفها



انا فيه قرارات هامه هابتديها من الليله باذن الله