الاثنين، 10 فبراير، 2014

ديجافو -stay alive






الصوره التي بالاعلي عزيزه جدا علي لاهم من عرفتهم في عام 2013 بعد ان تقابلنا في الاسكندريه ويجمعنا حب السينما والفن

وقد كان يوما لن يتكرر بهذا الجمال  في فبراير العزيز

مصطفي
طارق
اسراء
رامي
الدباح
يسري 
شريف
خالد
نعمان

....................


 هو :معرفش هل فعلا موضوع التاريخ يعيد نفسه ده حقيقي بس انا حاسه بيحصل فعلا

انا : لكن الفرق انك ممكن تتفادي الاخطاء اللي انت وقعت فيها قبل كده  وتستغل الفرص اللي ضيعتها


...........

مستحيل الحب يتحول لصداقه 

احمد العايدي

..................

 

زي الفتره دي من اربع سنين  كنت باسمع اغاني فيلم yes man  المتفائل جدا والايجابي ودلوقتي باسمع اغاني the secret life of walter mitty

زي دلوقتي كنت بذاكر علشان عندي امتحانات الفير ست بتاع الماجستير في القصر العيني  ودلوقتي بذاكر علشان الزماله كمان اسبوعين

زي دلوقتي كنت بشوف slumdog millionaire  ولسه شايفه تاني حالا

نفس الشهر ده من اربع سنين كنت في معرض الكتاب وقابلت قباري بالصدفه ومن اسبوع برده كنت في المعرض وقابلته بالصدفه وحضرنا حفل توقيع لاحمد خالد توفيق واتكرر ده السنه دي مع فرق اني حضرت حفلات توقيع لاصدقائي ممدوح زيكا عن ديوانه الجديد ولروايه محمد علاء الدين الجديده وقابلت اغلب صحابي المدونين زي عادل صليب وعمرو وغيرهم بالاضافه لصحابي اللي عرفتهم علي الفيس زي ممدوح صلاح وغاده حسن وغيرهم

اهم ماجبته من المعرض الكوميديا الالهيه بسعر زهيد جدا 

..................

زي اليومين دول من اربع سنين كنت بشوف هناء من بعيد لبعيد كنت خايف اقرب لها او اعرفها معرفش ايه شدني لها بس كنت حاسس اننا هنعرف بعض  وكنت علي يقين من ده لكن ظروف كتيره حصلت وعرفت حد تاني ويمكن مش هاكدب لو قلت اني عرفت الحد ده علشان اهرب من فشلي في الوصول لهناء 
وجت الثوره وتلات سنين عدوا وانهت علاقتي الفاشله مع الحد ده 
وقابلت هناء مره تانيه وقربت منها 
واكتشفت اني ضيعتها من ايديا بسبب ترددي وحاولت اصلح الغلطات اللي عملتها من بعد تلاتين يونيو 

انا مش زعلان منها بالعكس هي هتفضل واحده من اهم الحاجات اللي حصلت في حياتي ومدين لها بالتطور الايجابي الي حصل لي مؤخرا ومش هانكر ان اغلب التدوينات اللي كتبتها في الشهور اللي فاتت كانت اهداء لها

بس واضح ان مافش حاجه بتدوم وواضح ان مش لازم كل مانحلم به نوصل له ويتحقق 

................
 
There’s a rhythm in rush these days
Where the lights don’t move and the colors don’t fade
Leaves you empty with nothing but dreams
In a world gone shallow
In a world gone lean

Sometimes there’s things a man cannot know
Gears won’t turn and the leaves won’t grow
There’s no place to run and no gasoline
Engine won’t turn
And the train won’t leave

Engines won’t turn and the train won’t leave

I will stay with you tonight
Hold you close ‘til the morning light
In the morning watch a new day rise
We’ll do whatever just to stay alive
We’ll do whatever just to stay alive

....................


 




في مشهد من فيلم her  جواكين فونيكس بيكون علي علاقه حب مع نظام التشغيل بتاع الكمبيوتر المتطور اللي بيمتلك صوت بشري ومشاعر حقيقيه وصادقه واحاسيس 
بيتسيقظ في يوم ويكتشف ان سامنثا او النظام مابقاش موجوده عنده واختفي بيقعد يجري في كل حته يدور عليه وبتنتابه حاله فزع وهلع وعلي وشك انه ينهار عصبيا ويبكي لانه هيرجع لوحدته واحس انه فقد الشيء الوحيد اللي قدر يحبه ويخليه مبسوط مره تانيه 


انا مش ناوي اوصل للمرحله دي



....

يوم التلتاء 11 فبراير هيناسب يوم خلع مبارك من تلات سنين 

يوم مالمجلس العسكري ضغط علي مبارك علشان يتنحي لما كنا بالالاف بره القصر الجمهوري 

هتحل الذكري دي ولسه زمايلنا معتقلين في سجون النظام الجديد العسكري اللي جبناه بعد خلع الاخوان 

خالد السيد وناجي وغيرهم معتقلين االي قادوا مسيراتنا في الذكري الاولي للتنحي لوزاره الدفاع
هتحل الذكري دي ولسه ضياء احمد صاحبي معتقل من يوم فض رابعه ولسه علاء عبد الفتاح واحمد ماهر واحمد دومه ومحمد عادل معتقلين 
هتحل الذكري وماجبناش حق اللي ماتوا
هتحل الذكري والسيسي هيترشح خلاص للرئاسه

بس اللي اقدر اؤكده ان فيه حاجه هتحصل ومفاجاه

اكيد في حاجه هتحصل بس مش هنقول 

كل اللي هنقوله

اوعي تنسي وخليك فاكر اللي قتلوا فينا عساكر