الثلاثاء، 2 سبتمبر 2008

نوستالجيااااااااا رمضانيه





رمضان رجع من تاني ورجعت معاه زكرياتنا


ده هيبقي اول رمضان من غير مانفطر مع جدتي اللي توفت من شهرين


اول رمضان مانروحش فيه البلد زي كل سنه واول رمضان بيت العيله يتقفل فيه


ده تاني رمضان من غير احمد صاحبنا اللي مات السنه اللي فاتت



ده رابع رمضان من غير عمي عبد العزيز الله يرحمه
ده اول رمضان من غير مانتجمع انا وصحابي زي كل سنه علشان محمد في الجيش وعمرو في القاهره وابراهيم في القاهره ومش هنشوف بعض الا كل خميس من رمضان لكن مش هنبقي زي زمان للاسف
ده هيبقي تالت رمضان استمتع به من ساعه ماتخرجت من الجامعه من غير مزاكره ولا سفر ولا قرف بس بيني وبين نفسي باشتاق لايام رمضان في الجامعه
باشتاق لايام الفطار الجماعي وايام مكانت باتبهدل في المواصلات علشان اوصل رمسيس بس من كتر الزحمه والخنقه
باشتاق لايام ماكنت صغير باجيب فانوس رمضان والعب به انا واخواتي بعد الفطار والنينجا ترتلز والباور رينجرز
باشتاق لايام ليالي الحلميه وزيزينيا والمال والبنون لما كانت الدراما المصريه متوهجه وقتها
باشتاق لايام فوازير شريهان وعمو فؤاد وايام مسلسل هارون الرشيد وعمر بن عبد العزيز وقت السحور
بافتكر رمضان 2006 لما عشت رمضان بكل لحظه فيه وماضيعتش وقت خاالص وطلعت منه راضي عن نفسي وياريت ده يتكرر السنه دي واقدر ارضي نفسي وابعد نفسي عن اي معصيه واي حاجه تغضب ربنا واتم كل الفروض والعبادات اللي عليا
بافتكر ايام صلاه التهجد وانا باعيط وانا ساجد وبادعي ربنا واطول في السجود
بافتكر ايام حرصي الدائم علي صلاه التروايح واغيظ اصحابي كل سنه اني ختمت القران قبل ال 10 اواخر من رمضان
رمضان 2007
شغلي في الجمعيه كان اكتر من اي فتره قبل كده وعملنا خير كتيير جدا وادخلنا الفرحه علي قلوب اسر كتيره
وساهمنا في نشر جو الموده والرحمه والرضا عن الحياه ولو لفتره قصيره
صحيح ناس مشيت من رساله وناس تانيه جت لكن لسه هدفها واحد ورسالتها مستمره والحمد لله
رمضان 2007 خاص اكتر لسبب في نفسي انه كان مرحله فاصله من التردد والشك والخوف لانتقالي لمرحله اكبر ومقابلتي لشخصيه مهمه جدا في حياتي
رمضان 2007 كان احلي افطار جماعي مع زمايلي في الشغل في العاشر من رمضان كان يوم اكتر من رائع
رمضان 2007 كان عيد ميلادي الخاص قبل السحور اصحابي احتفلوا به معايا في نادي المصريه بلازا
رمضان يجمعنا زي كل سنه صحيح الدنيا اتغيرت والناس اتغيرت لكني حريص اني استمتع به زي كل سنه
رمضان فرصتي اني اطهر نفسي من العبء الثقيل اللي مستحمله بقاللي 9 شهور واحاول اعوض حاجات كتيره قصرت فيها للاسف
يارب اغفر لكل احبائي اللي رحلوا وباشتاقلهم وارحمهم في الليله المفترجه دي
يارب بلغني ليله القدر ومش عاوز حاجه بعدها وكفايه كرمك عليا والجميل ده
يارب ارشدني اني اخليني في الطريق اللي انا رسمته لنفسي وماشي فيه لغايه مانت تقولي اقف وهاقف
يارب ارعي وصون اهلي علشان هم تعبوا جدا علشاني
يارب خد بيدي وارشدني للراحه الابديه وراحه البال اللي بادور عليها من زمان واشرح لي صدري ويسر لي امري

هناك 10 تعليقات:

Unknown يقول...

طريقتك جميلة أوى فى تذكر الذكريات فى رمضان

انا كنت فى قافلة طبية الاسبوع اللى فات وعلى الرغم من أننا كنا تبع جمعية صناع النهضة كان معانا شباب رسالة ومساعده جميلة وتعاون جميل

dr.lecter يقول...

انا فعلا هاطلع قالفه طبيه في النص التاني من رمضان معانا برده بتوع مساعده وصناع الحياه

The Seagull يقول...

رمضـان كريم يا دكتـور .. وتقبل الله منك إن شـاء الله :)

dr.lecter يقول...

ومنك ان شالله

Desert cat يقول...

كل سنة وانت طيب يا دكتور
ربنا يرحم جدتك واحمد وعمو عبدالعزيز
وان شاء الله رمضان السنة دى يخلص وتكون راضى فيه عن نفسك كل الرضا
بس مش قولت لى انت فى رساله ايه ؟؟؟
اوعى يكون الزقازيق
:)
رمضان كريم

Desert cat يقول...

نسيت اقولك اهدم شوية من الحجارة اللى فى المدونة لانها تقيلة جدا
بتفتح عندى فى نص ساعه

dr.lecter يقول...

مش عارف والله ايه حكايه التقل في المدونه بتاعتي بس مش نص ساعه يعني ايه المبالغه دي هههههههه هي دقيقه بس وبتفتح عادي والله

انا فعلا في رساله الزقايق
نورتي المدونه بجد

The Führer يقول...

كل عام وأنت بخير .
أولا تعيش وتفتكر
ثانيا أمين يا رب العالمين
ثالثا أنا شفت إسمك في إحدي المدونات قلت تمام أهو الدكتور هانيبال لكتر يعني سفاح زميل والسفاحين قلوبهم عند بعض.
دخلت أشوف الدم المطرطش في المدونة لقيت إنسان جميل وحساس وكمان بيحب الخير .
ربنا يتقبل منك ومنا صالح الأعمال ببركة الشهر الفضيل.
ورجائي بتقبل مروري المتواضع
دمت بكل خير

Yasmine يقول...

كل سنة و انت طيب و تعيش و تفتكر
انا نفسي رمضان السنة دى يبقى احلى رمضان..ربنا يقدرنى و اكمل زى مانا عايزة
تقبل الله و ان شاء الله تلاقى راحة البال اللى بتدور عليها :)

dr.lecter يقول...

fuhrer

لا اطمن انا بعد رمضان باقلب سفاح زميل وكل اللي قلبك يحبه حتي شوف الموضوعات القديمه هتلاقيها كلها طرطشه دم وامعاء ثقيله ونزيف مستمر ومافيش جلطات بتتكون للاسف ههههه شكرا جدا علي كلامك وشرفني مروروك بجد



بنوته مصريه

ياريت بجد والله الدنيا دي كلها تهون بجانب راحه البال ورضا الله عننا