الثلاثاء، 13 أكتوبر 2009

قالت.......ضحي





" لعمرك ما ضاقت بلاد بأهلها **** ولكن أحلام الرجال تضيق)

عمرو بن الاهتم التميمي


عائد الي المنزل محملا بهموم ووساوس وارهاق بدني وعاطفي وتسائلات تنخر في خلايا مخي دافعه اياه للجنون وشاحنه قلبي بمشاعر رهيبه شريره ربما او هيستيريه


اخطو الي غرفتي متفقدا التلفاز لاجد برامج عن ازمه شيخ الازهر والنقاب اغير المحطه اجدها تتحدث عن ازمه نور الشريف وعن المؤامره المدبره ضده بسبب عمله الدرامي الرمضاني


اصاب بالغثيان من ابتذال الاخبار فارتاح عندما استقر علي فيلما لبطلي الرجل العنكبوت وكانما سمع ندائي فهو الوحيد القادر علي شحني بالامل ورسم الابتسامه علي شفتي


ابغي النوم لكن قلبي مجروح ينزف بلا انقطاع منذ 3 اشهر حاولت البحث عن دواء له وجربت العديد لكن بلا جدوي كان يتوقف لبرهه ثم يعاود النزيف


اطالع روايه بهاء طاهر التي ابتعتها منذ يوم لعشقي الشديد له اطالعها علي انغام الموسيقي الحالمه المنبعثه من الراديو عند الثالثه فجرا


اغوص مع ضحي وبطل الروايه اتواجد في الستينات اغوص في البشر الذين تغيروا بفعل الزمان
اضل الطريق مثلما فعل وابحث عن نفسي ابحث عن حقيقتي عن هويتي
اتوه في فهم ضحي؟ اتوه في فهم لما يفسد البشر

اتوه في فهم علاقات البشر ببعض اتوه في تقلبات المراه واختياراتها الصادمه وعنفها مع من يعشقها بصدق

اتوه في تفسير ماحدث لتاريخنا


لما كلما تظهر حركه اصلاحيه للقضاء علي الفساد تظهر افعي اخري في وسط الشرفاء المناضلين فالفساد ياتي من البشر انفسهم ليس من الخارج لاننا بشر ضعفاء نرتخي امام اول اغراء سواء كان متمثلا في الجنس او المال او السلطه


لما ظهرت الثوره؟ اقصد االانقالاب العسكري الذي قاده هؤلاء الظباط ؟
لما اصروا علي تدمير معالم فتره ماقبل الثوره؟ ولما شوهوا الجمال بايديهم؟
لما تغير اتجاه هؤلاء الثوار وتخلوا عن حلمهم وخذلوا المصريين.

لما كان حكمهم اشبه بكابوس مخيم علي قلوب الناس كاننهم يعيشون في الاتحاد السوفييتي
لما مازال ابي يعشق عبد الناصر ويري ان افضل ماحدث في تاريخ مصر هي الثوره؟
لماذا لاري مثله ولا افتخر بتلك الثوره؟ انا لم استفد منها بشيء وعاني مثلي مثل ملايين الشباب من توابع تلك الثوره المتمثله في نظام مبارك المبارك الظريف


نعم الثوره هي من جلبت مبارك وامثاله الثوره هي من تسببت بهزيمه 67 ثم تتابعات معاهده السلام والتطبيع مع اسرائيل والانفتاح الاقتصادي وكل ماتمر به مصر منذ 1952


كانوا يحلمون بالديمقراطيه؟ فهل تحقق ذلك لهم؟ كانوا يحلمون بالقضاء علي الانحلال؟ اذن اين نعيش اذن؟ في المريخ؟ نحن نستحم في بحر من الانحلال الاخلاقي والتفكك الديني بفضل الثوره المجيده


الحق يقال ان المصريين لا يصلحون ليحكموا بلادهم ولن يرتقوا ابدا نحتاج لشخص صارم يجلدنا مثل العظيم محمد علي كي نرتقي


هل حققت الثوره اهدافها؟ هههههههههه نعم فعلا لقد عاد الاقطاع بشكل جديد واشرس مرحبا بكم في عالم الاقطاعيين الجدد اما عن النظام الملكي الذي حاربوا ضده فهنيئا لهم نظام مبارك الملكي وولي عهده جمال


اختفت الطبقه الوسطي بفضل الثوره واصبح هناك فقط طبقه القطاميه ومارينا وطبقه الدويقه ومنشيه ناصر
يطالبوننا نحن الشباب ان نتحرك؟ كيف بالله عليكم وانتم قمتم باخصائنا وسممتم دمائنا وافسدتم احلامنا وحطمتم قلوبنا وفرقتمونا عن احبائنا


سحقا لكم ولتاريخكم المجيد انا امقت الثوره وامقت ماتحولت اليه الان بشكلها القبيح
عار عليكم ياابائنا ان تلومونا وقد صرنا حطاما فالذنب ذنبكم انتم لانكم انتم من فتحتم الباب لهم وهاقدر اغرقتم الوطن معكم واضعتم هويتنا


وكما يقول زكي الدسوقي في روايه عماره يعقوبيان
نحن في زمن المسخ " "


انظروا الي المدن الي الاسكندريه التي اصبحت تفقد رونقها بفعل توابع الثوره الي القاهره التي ضاعات ملامحها مع توابع الاشتراكيه الي اساتذه الجامعه الذين هم بالاصل من طلبه الاتحاد الاشتراكي سابقا واصبح همهم الحالي جمع المال والنزاع علي المراكز


انظروا الي الاطباء الذين لا يفقهون شيئا بفضل نظام عبد الناصر الجامعي المجاني


انظروا الي الخطاب الديني الذي اصبح يخاف الاقتراب من الحاكم وامور الدوله او اي امور فقهيه خوفا من غضب الباب العالي


انظروا الي المراه حاليا التي لا تستطيع ان تخمن هل هي مصريه ام متامركه ام خليجيه ام ماذا؟ فقد اصبحا متناقضه تماما في ملابسها ومشيتها وكلامها

تاره بعباءه خليجيه مجسمه لمعالم جسدها وتضيق علي ثنيات جسدها فتبرز في شهوه عارمه

تاره باسدال ايراني بحجه انه يستر الجسد

تاره بملابس ضيقه وعاريه بحجه التحرر




اعود الي ضحي وتقلباتها اعود الي الحب الذي لم يصبح مثلما كان واصبح بارد عديم المذاق


لما يتغير الحب مع الزمن؟ لما يصر البعض علي جرح واصابه الطرف الاخر بالالم والسخريه منه والتمنع عنه
لما نتمسك بشيء نعرف انه لن يكون من نصيبنا وصعب ان نلمسه و
والاقتراب منه


لما نظل دائما نرسم احلاما وامالا كبيره علي شيء لسنا واثقين منه تماما ثم نصاب بالاحباط لاننا فشلنا ولانه ضاع مننا مع علمنا المسبق منذ البدايه انه سيذهب وسيطير

بهاء طاهر يترك في اعماقي بصمه في كل مره ومن اجل ذلك فانا ممتن له دائما وممتن للست فيروز مع اغنيتها

صباحه مسا


صباحه مسا
شيء مابيتنسي
تركت الحب واخدت الاسي
شو بده يدور علي شو عم يدور علي غيره
فيه ناس كتير لكن مابيصير في غيره

هناك 50 تعليقًا:

mUsLiM يقول...

بص يا دكتور انا هاتكلم معاك حاليا باعتبار انى شايف انك فعلا موهوب ما شاء الله فى فن الرواية والتعبير

ولذلك انا هحاول أحط نقاط معينة بخصوص موضوعك ده وأقيمه أدبيا مع أن يمكن انت مش كاتبه كرواية أو قصة قصيرة ممكن تكون كاتبه كموضوع عادى لا أكثر

لكن لأنى حاسس فعلا انك موهوب هحاول نتناقش فى المسائل دى علشان نستفيد من بعض

أولاً: فى فن الرواية عموما من السئ إن الإنسان يضع فى بدايات السطور ملخص الرواية أو خلاصتها فهذا يوحى للقارئ عموما ماذا تريد الرواية أن تقول من أول صفحة مما يصيبه بالفتور بعد ذلك

يعنى مثلا انت بدأت ببيت شعر غاية فى الجمال

هذا البيت ربما لخص القصة القصيرة هذه التى كتبتها أو الموضوع كله

كان الأفضل أن يكون هذا البيت فى نهاية الموضوع لا أوله أبدا

شئ ثانى وهو إنك وصلت المعلومات بشكل مباشر ووصلت أفكارك عن الثورة وعبد الناصر ومبارك وحال البلد والمصريين وغيره وغيره

بكلمات مباشرة وصريحة وهذا بلا شك غير جيد فى فن الكتابة الأدبية

لازم الأحداث هى اللى تحكى والسطور توحى وترمز للى عاوز تقوله بدون تصريح أو قول مباشر

ولو حتى فيه تصريح أو قول مباشر يكون بكلمة بسيطة وبحركة من بطل من أبطال القصة أو الرواية

انا عارف انك كتبت موضوع عادى مش غرضك منه أدبى أو شئ لكن زى ما قلتلك انا بحاول معاك أستفيد لأن فعلا انت موهوب فى فن الرواية والقصة وهذا ما يشجعنى انى اقلك الكلام ده وممكن جدا تكون انت بالفعل فاهمه

وعاوزين بقى ياعم نراسل بعض وأبعتلك جوابات فيها أشعار كتبتها وانت ترد عليا برواية

هههههههههههه

زى الأدباء ما كانوا بيعملوا زمان

يمكن ربنا يوفقنا لطريق الأدب بجد وبعد ما نموت بقى ينشروا الرسايل دى زى ما بيحصل مع كل الأدباء

ههههههه

أما بالنسبة لمضمون الموضوع فبالتأكيد انا ليا تعليق على أكثر من حاجه لأن انت تطرقت لمواضيع كثيره فى حديثك

لكن هأجل التعليق على مضمون الموضوع وأفكاره لرد فيما بعد ان شاء الله

السلام عليكم

Israa El-sakka يقول...

شخصيا بحس ان الضباط كانوا مليانين بالحقد و الغضب على الارستقراطية !! ده تفسيري الشخصي على الصعيد الشخصي انا كرهت كلمة ثورة بسبب ثورة يوليو يعني لو كنا بنعاني قراط بقينا بنعاني 2 قراط !! بجد انا احبطت

مواطن مصري يقول...

الانقلاب في مصر سبب المشاكل و لم تكن ثورة حقيقية

مواطن مصري يقول...

السادات أصلح ما أفسدة ناصر

محمد حمدي يقول...

بوست جميل لخصت فيه اوجاع كتير .. والاروع من البوست هو اغنيه فيروز فى النهايه

مي يقول...

بتعجبنى دماغك اووووووووووووووى
طريقة تفكيرك متفرده اوى رغم انى بحس بحزنك بس حاسة انك بتخرج منه برضه
وده كويس اوى ارائك بتعجبنى بجد فى السياسة معاك فيها
تحياتى ليك ومتحرمناش من كلامك ببقى مستنياه
على فكرة انا بعشق الاغنية دى

زهرة يقول...

مووضع جميل مع انه متشعب لكم حساك عايز توضح مليون حاجة وتحكى فيهم بس لخضتهم مع بعض فى سطور واديت كل حاجة حقها ووصلت للناس قصدك.

اسلوبك جميل ما شاء الله

بحب اتابع جديدك

احييك

Fatma يقول...

الي اساتذه الجامعه الذين هم بالاصل من طلبه الاتحاد الاشتراكي سابقا واصبح همهم الحالي جمع المال والنزاع علي المراكز

عميد كليتي كان واحد منهم :) كانوا مسمينه في شبابه ماركس للدرجة دي تخيل مش قادرة احكيلك طبعا حاليا حزب وطني فيلا في مارينا ابصر ايه فين مابفهمش المبادئ لما تنهار في ثانية وتتقلب للضد

موضوع رائع رائع يا محمد مع اني بقيت بخاف اقرالك انا واحمد كنا لسه بنقول الراجل دا ازاي بيحس كدا ازاي من غير تحكيله على حاجة يحس ويشرحلك احساسك بالظبط :)

انت جميل يا دوكي بجد بهاء طلهر وفيروز في الاخر طبعا مافيش كلام يتقال :)

أبــــو ضـــيــاء يقول...

بهاء طاهر ده تحفة
انا معاك في حكاية الانقلاب
لكن بدل ما نبكي على اللبن المسكوب المفروض ندور ازاي نجيب بداله
الدنيا مش كئيبة قوي كده
حاول تقوم بدورك في نهضة مصر , مهما كان دور بسيط, زي انك تعلم واحد ازاي يقرى ويكتب

Here i'm يقول...

البوست دا حلو قوى .. لم كل الهموم .. هموم عامة و هموم خاصة بصاحبها ..

مش عارف .. كنت بتمنى اكون بنى ادم فاكس لا شاغل دماغه بمصر ولا الجن .. حد مش همه و حاطط دماغه فى تلاجة من نوعية ألكتروستار يا عبد الستار ..

مش عارف .. كل اللى أعرفه أنى فى حيرة .. محتار من بلدى و شوية من مستقبلى ..

الله المستعان

dr.lecter يقول...

مصعب

انا بجد بحب نقدك بشده لاي عمل ادبي ليا لانك بتقول رايك من وجهه نظر واحد مهتم بالادب
بس ازي مانت قولت ده مش قصه دي مجرد خواطر مخنوقه جوايا واحمد ربنا اني مكتبتش حاجه تانيه غيرها كنت هتشوف بلاوي متلتله

بالنسبه لنقط الروايه

انا بقلد كتاب كتار في موضوع مقدمه العمل بس انا شايفها مفيده لانها فعلا بتعطي جو معين او بتساعدك في فك رموز العمل لو العمل ده غامض وصعب او جواه اسئله بلدون اجابات


معظم اللي اعرفهم من الكتاب بيحطوا حاجه زي كده في اول العمل واخره


بالنسبه للموضوع نفسه انا كنت متعصب وانا بكتبه ومكنتش بحاول اقوله بشكل عميق ولا حاجه انا كنت بقول رايي فعلا في اللي انا شايفه وبعانيه لو كنت بكتب روايه كنت اقول اه طبعا معاك حق بس ده يعتبر مجرد نوع من المقالات علي الاقل وانا معاك طبعا في اللي انت قولته

هههههههههههه ضحكتني ياعمنا بجد عارف يامصعب ممكن بحد بعد مامنوت نشتهر والكل يسمع عننا


وانا معنديش مانع انك تبعتل لي وانا ابعت لك ياسلاام ده يوم المنا ياعمنا


ومستني رايك للرد علي النقط اللي انا اتكلمت عنها

dr.lecter يقول...

اسراء
انت بتقولي فيها ومازالوا
70
بالمائه منهم كده وعندهم حقد دفين ونزعات ماسوشيه غريبه وحب السياده

قله قليله منهم هي اللي محترمه بجد ماقبلتش منهم الا بس وكلهم رتب كبيره لكن الباقفيين ولاد تييت بجد

dr.lecter يقول...

مواطن

انا بحب اسميه فعلا انقلاب لان الشعب مشاركش في اللي عمله الظباط دوول

السادات للاسف استلم مصر وهي مخروبه مالحقش يعمل اصلاحات واتطخ عيارين وسلمها للي بعده اللي جاب اخرها

وادي نتيجه ميراث الظباط الاحرار

dr.lecter يقول...

محمد بيه حمدي

ياريتني كنت اعرف الخص يارتني ده انا مفقوع بشكل

اما ستنا فيروز دي طبعا مافيهاش نقاش

dr.lecter يقول...

مي

ماشي ياستي اي خدمه

انا فعلا بطلع نفسي دايما من الحاله دي بس زي ماتوقلي كده عندي ادمان عليها زي المخدرات بالظبط

شرفتيني بجد بزيارتك

dr.lecter يقول...

زهره

اخيرا ظهرتي انت بقالك فتره مختفيه واخر بوست ليكي كان مقلق شويه

متشكر جدا علي كلامك اخجلتم تواضعنا

dr.lecter يقول...

فنون

مانا عارف يافاطمه معظم الموجودين حاليا وماسكين مراكز كلهم كانوا ماركيسيين واشتراكيين بس تقولي ايه بقي دوام الحال من المحال ناس بتبيع مع اول موجه بحر

انا في اعتقادي ان مافيش حاجه في مصر اسمها ناس بتفضل علي مبادئها ولا معتقداتها الكل بيغير بمرور الوقت وبيضعفوا لان المصريين شعب عاطفي متحمس زياده عن اللزوم عامل زي الايطاليين كده


يااه ده كله عني؟ اتاريني معرفش نفسي بجد
لا ياستي اقري ماتخافيش وكويس والله اني بقدر احس بصحابي وهم يحسوا بيا

عارفه بجد بوستك بتاع يوم الجمعه كان بالظبط اللي جوايا وارتحت جدا لما رديت عندك هناك لان كنت مخنوق يومها وعاوز اصرخ بصوت عالي

dr.lecter يقول...

ابو ضياء

انا فيا عيب اني بيجيلي ياس بسرعه ساعات وسياعات بيبقي عندي امل وطاقه كبيره

انا بساهم بمجهودي والله في حاجات كتيره بس الاهم بالنسبه لي هو مشروع ادبي ضخم هدفه توعيه الناس وتغييرهم مش مجرد حاجه يقروها والسلام لا حاجه تحركهم وتغيرهم وتقومهم من اماكنهم

ادعيلي بس اعرف اعمله وهتشوف بنفسك ان شالله النتيجه

dr.lecter يقول...

قباري

يااه يامحمد لو كنت شاب فاكس وبتااع تامر حسني وحفلات وخروجات وهلس

كان نفسي ابقي كده علشان اروق الدي واكبر الجي وازيط الدنيا واضرب فيزا

بس قدرنا بقي اننا نتلعن بهموم البلد ونفكر في بلدنا ونتخانق علشانها

اما عن المستقبل ماحدش ضامن حاجه اكتر حاجه مخوفاني هي بكره ربنا يعيينا كلنا

mUsLiM يقول...

والله يادكتورنا انا كنت عارف انك بتكتب موضوع عادى مش رواية ولا موضوع أدبى

مجرد موضوع زى أى موضوع

لكن تقول ايه بقى

بتلكك علشان أتناقش مع حد فى الأدب وفنونه :)

وانا مصدقت بلاقيك بصراحه

حاسس ان عندى طاقة عاوز أطلعها فى النقاش حول الأدب والحياة والحب والكون والمساء والخريف والشتاء والشجر والدنيا

حاسس انى عاوز اتناقش فى الأدب وفن الكلمة وروحها

تعرف فى هناك فى دبى والشارقة أمسيات أدبية كتيرة بيتكلموا فيها عن الشعر والأدب والشعراء وفن الرواية والقصة وغيره

فبحضر أغلبها وبتناقش معاهم لكن مبحسش بالإشباع

أسأل الواحد منهم سؤال يتوه منى ويلف ويدور

يابنى جاوبنى انت بترد على ايه

تحس انه دايخ أول ما بكلمه

فالحين بس يمدحو فى بعض ده الشاعر الفحل وده الأديب الروائي الكبير وده مش عارف

لما تعبت وبدأت أحضر بالعافية

أما بالنسبة لكلامك عن مقدمة الرواية فانا مش معترض إن الروائي يهيئ الجو الأدبى فى روايته

لكن هذه التهيئة لابد وأن تكون بميزان من دهب

بمعنى تكون تدريجية غير صادمة بحيث إن القارئ يعرف منها غرض الرواية ونهايتها من مجرد الصفحات الأولى فيها

لازم الأديب يترك القارئ دايما فى شغف ورغبة فى التقدم كلما تقدم فى الرواية أكثر

لغاية ما يتركها وهو فى شوق لمزيد من الروايات من هذا النوع

وبالنسبة لموضوع الرسايل

تعرف كل الأدباء تقريبا عندهم العادة دى

لذلك انا نفسى الاقى حد أراسله

ههههههههههههه

مسألة الكتابة فى حد ذاتها متعة غير النت وغير المدونات

انك تكتب فى جواب وتبعته لصديق وتحدثه فيه عن الأدب وتنقله أخر أخبارك الأدبية وأعمالك الجديدة وحالتك النفسية والشعورية

وبعد كده تنتظر بشوق الرد بتاعه

مسألة غاية فى الإحساس والروعة على الأقل بالنسبة ليا

أفتكر قرأت فى خطاب لأبى القاسم الشابى كتبه لأحد أصدقائةالأدباء فى إحدى رسالاتهبيقوله يمكن لما نموت يتم نشر هذه الرسائل كما يحدث مع الأدباء الكبار

واهو حصل فعلا وتم نشرها

فانا بجد ياريت نعمل كده يا محمد

مش علشان ممكن تتنشر ولا للا ، مش عشان كده خالص والله

بس دى متعه جميله جدا

انا محروم منها حاليا

ياريت توافق وانا بتكلم بجد

وانا هاخد عنوانك وانت خد عنوانى

وصدقنى حاجه زى كده هاتحس فعلا بقيمتها

على كل حال

فى انتظار ردك يا حبيبى :)

السلام عليكم

Yasmine يقول...

قلبت عليا المواجع يا محمد والله و انا ما صدقت لصمت نفسي اليومين دول
الواحد بقى عامل زى اللى متعلق فى نص السلم..لا عارف تبقى عنده لامباله و برود ولا عارف يعمل حاجة يغير بيها اللى مش عاجبه

تصدق بالله انا من امنيات حياتى انى اعيش فترة ما قبل الثورة و لو حتى ليوم واحد..حاسة ان الفترة دى الوحيدة اللى كانت فيها مصر مصر بجد قبل الغزو الصحراوى الغربى المتطرف فكريا اللى بقى شغال الله ينور دلوقتى
كل حاجة بقت متشوهة..الشوارع و المبانى و الناس و القلوب و النفسيات حتى الاحلام ما بقاش ليها مكان

على فكرة اغنية فيروز دى انا ما كنتش عرفاها بس بقالى كام يوم بسمعها فى مكان اروحه :D
شجعتنى ابتدى فى قالت ضحى مع انى كنت ناوية اخد فاصل من بهاء طاهر بعد نقطة النور

موضوع هايل كالعادة :)

leeno يقول...

انا بس عايزة اعلق على نقطة مهمة جداااا

الثورة مش الوحيدة الغلطانة !
مدينة اسكندرية مفقدتش رونقها من تبعات الثورة و بس ! فين مسؤولية الافراد عن غياب الرونق دة؟ اللي بيرمي زربالته فوسط البحر دة الثورة مسؤولة عنه؟ مش معقول كدة حاجة الثورة الثورة ! كلامي دة مثل مش للذكر مش للحصر

التغير اللي صاب المجتمع مصابش مصر لوحدها ! مظنش الثورة هي المسؤولة عنه لوحدها ! ... انا نفسي بتساءل يوميا احنا شو صارلنا من ايمتى صار التخلف الفكري معشش في عقولنا و بنسميه الأخلاق و الدين و العرف ! و هو مجرد سكر بنحطه على امرار الغباء عشان بس نحليه في عنينا ! و نديله قيمة ؟ !

انت اتكلمت عن تغير شكل البنت المصرية لكن مذكرتش تغير فكر الرجل المصري للي من رأيي أهم كتييييييييييير من تغير الأشكال انا بجد مش ادرة افهم !

ممكن العيب مكنش في النظرية لكن العيب في التطبيق و في المطبقين للنظرية

مش عارفة بصراحة انا مش شايفة الغلط غلط الثورة لوحدها و لا الناس لوحدهم يمكن في اسباب كتير و مسببات اكتر و مسؤوليات متشعبة جداااا


على فكرة الموضوع رااااااااائع

leeno يقول...

اااه نسيت اسأل بتقرا ايه حاليا لبهاء طاهر ؟

انا مجددا بس لقيت واحة الغروب بالصدفة و مستنية اقراها لما أخلص الكتاب اللي بقراه دلوقت

اتشوقت لبهاء طاهر من حبكم ليه على فكرة !

mohamed ghalia يقول...

المدونة بجد روعة يادكتور
سعيد انى اتعرفت عليها وعلى حضرتك
ربنا يكرمك دايما

dalia يقول...

البحث في العصور شيئ متعب من رأيي يكف ان تقرأ فتتعقد كل واحد شايف حاجه من وجهة نظره ،كفاية علينا كتب التاريخ بالمدرسة هي عملت غسيل مخ تمام في الفترة ديه بس خليتنا نكره كل حاجه تاريخية معلش اصلي كنت ادبي فقرة اعتراضية انا دايما بقول ان كل رجل مناسب لفترة تاريخية يعني مينفعش نقارن بين محمد علي ويين الملك فارق بين جمال عبد الناصر ومبارك حاليا لان المقارنة ظالمة
لو بسطتها شويه انت نفسك يا دكتور حاول تقارن بين محمد زمان ومحمد دلوقتي حتلاقي ان عنصر الزمان بيفرق كتيير والظروف هي اللى بتحكم الشخص انا مش بدافع عن حد ماسك السلطة دلوقتي انا بتكلم عن وقت الثورة هناك مئات الكتب لم تحسم رأيها عن اهميتها أو فشلها
تحياتي لاسلوبك الشيق

micheal يقول...

يسلم فمك
أنا عن نفسي بعتبر الانقلاب ده اسوأ ما حدث بتاريخ مصر مع الإعتراف ان الفترة اللي قبليها كان لها عيوبها بس مقارنة بالوضع حالي وبوعود الإقلاب الزائفة فكانت أرحم بكتيييير
ع الأقل كان فيه تداول سلطة بين الأحزاب
تحياتي

احمد سعيد يقول...

استااااااااااااااااااااااااذ
:
:
:
استاااااذ


انا كنت ناوى اسافر على نص الليل بس الطريق كله شبورة فرجعت البيت تانى
علشان اقرى البوست دة
:)


ميا مسا

dr.lecter يقول...

مصعب

ياباشا انت تتلكك براحتك زي مانت عايز

وانا والله يامصعب زيك عاوز اتناقش بس انا مش معتمق زيك انت باين عليك دارس وفاهم اكتر مني انا مجرد محب للادب وعاوي والعين ماتعلاش علي الحاجب ياعمونا

انت عندك ايميلاي عاوز تبعت حاجه ابعتها وانا في انتظارك

dr.lecter يقول...

فله

مصر قبل الثوره كانت بلد بجد لها وجود وكيان وبلد الواحد يتمني انه يعيش فيها وكان فيها انتماء مصري حقيقي

انا دايما اقلب علي نفسي وعلي غيري المواجع مش عارف لييه

انا لما بشوف العمارتت القديمه اللي في مصر الجديده اللي في الكوربه وروكسي بتوهم بجد ولسه نظيفه زي ماهي بس حولها بقي وساخات وقباحات نفس الشيء قي شوارع طلعت حرب ووسط البلد

انا مابحبش اشوه تاريخ حد ولا اللي سابه لينا اللي الناس اللي قبلنا

بحب احتفظ واتتمتع برونق الجمال بتاع الماضي

اغنيه فيروز دي لقتها في مدونه احمد المصري بالصدفه ومن ساعتها وانا بموت فيها بجد بسمعها حوالي 4 مرات يوميا

قالت ضحي حلوه وعجبتني جدا فاضل لي روايه واحده ليه هي شرق النخيل بس هاخد فاصل دلوقتي علشان انا ابتديت في روايه لصنع الله ابراهيم اسمها امريكاننلي

نورتيني

dr.lecter يقول...

بصي يالين

الثوره ادت شعور لكل مواطن انه بقي حاجه عظيمه وبقي باشا ومش عارف ايه حلو اووي ده كله
لكن انك تدمجي كل الطبقات ببعضها مع اختلاف ثقافتها باسم ان مصر بلد واحده ده اسمه خرف



ده خلي ناس زي معلمين الخضار والادوات الصحيه يبقي معاهم عمارات وفيلل ويهزئوا الناس بفلوسهم خلي الامي زي المتعلم خلي فيه حماس زياده عن اللزوم بشكل عاطفي اعمي من غير تفكير ولا حسبان للعواقب
صدقيني الثوره لو كان دورها اتوقف علي طرد الانجليز كان يبقي زي الفل لكن اللي حصل بعد كده هو سبب اللي احنا فيه في 2009


انا اتكلمت عن الراجل المصري بشكل عام انا ماقصدتش اهاجم شكل المراه بس هي جت كده علي بالي لاني مش راضي عن المراه في مصر



انت معاك حق طبعا ان الناس مسئولين والناس دول هم نفسهم الناس اللي عملوا الانقلاب يعني من الاخر احنا وبس


انا اخر حاجه قريتها له هي قالت ضحي

بصي عاوزه تبتدي لبهاء ابتدي له بالحب في المنفي وبعد كده قالت ضحي وخالتي صفيه والدير وبعد كده واحه الغروب

dr.lecter يقول...

محمد

وانا اكتر يامحمد وان شالهه متبقاش اخر زياره

dr.lecter يقول...

داليا


ماهو المشكله ان التاريخ مكتوب علي هوي كل واحد ودي مصيبه والواحد محتار في النص ماتبقاش غير ان تسالي الناس اللي انت تثقي فيهم وعاصروا الفتره دي


محمد زمان كان باله مستريح ومتهني ومتحمس وكان عنده دافع

محمد بعد 2007 بقي لا باله مستريح ولا متهني ولا مبسوط بس بيحاول يضحك علي نفسه وعلي الباقيين ويوقلهم انه مبسووط

نورتيني بجد

dr.lecter يقول...

مايكي

اهو روح قولهم يامعلم علشان ماحدش يتهمني اني متحامل علي الثوره ىاوبس اقصد الانقلاب

dr.lecter يقول...

احمد سعيد

ويلكم باك ياكبيير

اقراه ياعم وقولنا رايك

فكرة من الزمن ده يقول...

ايه يا ليكتر
مش عارفة ابدأ منين ولا منين
عملت دخلة جميلة على الواقع اللي احنا فيه وزي مايكون بلغة السنيما فلاش باك على احداث عدت من سنين علشان تبين للمتفرج تراكمات السنين وصلتنا لفين بالاخطاء الفادحة وبعدين رجعت تعدد البلاوي اللي حاصلة دلوقتي علشان نشوفها من وجهة نظرك انها مرتبطة باللي فات واللي انا وجهة نظري متفقة تماما معاه وسعيدة لاني لقيت اخيرا حد من الجيل الحالي بيشوف الثورة بمنظارها الحقيقي ومش بيمجد في ابطال من ورق

لكن انا مش معاك في انك بتقول


البشر الذين تغيروا بفعل الزمان

الزمن مش بيتغير الزمن بس بيمر احنا اللي بنتغير وبنشوه الزمن بافعالنا وخطاينا على مر السنين
ونرجع نقول العيب من الزمن وهو مظلوم
انا لكيت كتير بس بجد قصتك تحفة وطلعت مشاعر كتيرة
والاجمل انها حالة بتعيشها وبرغم جروح القلب اللي هي السبب الرئيسي للحالة اللي انت فيها الا انك عرفت ترتب افكارك وتقول كل اللي اتزاحم جواك وتحطه ع الورق من غير زحمة ولخبطة
تحياتي

فكرة من الزمن ده يقول...

نسيت اقول لك ان الطاوس انا مش مربياه ياريته كان بتاعي
دي صور وصلت ليا من شخص قريب

leeno يقول...

يبني انا عترت بواحة الغرووب دي بالصدفة هنا بعد طووول بحث :)

كل ما اروح مكتبة اقله بهاء طاهر يتنح هههههههههه لو عرفت اجيب الحب في المنفى حقراها لاني حاليا مندمجة مع مريد البرغوثي في رأيت رام الله و حكمل الجزء التاني ولدت هناك و لدت هنا

شكراااااااااااااا

dr.lecter يقول...

فكره

نعيب زماانا والعيب فينا

ده باختصار اللي احنا بنتكلم عنه

مش عارف احنا ليه متميزين في افاساد اي حاجه حلوه ومافيش حاجه بتعمر معانا

اما الطاووي يابخت صاحبه بجد وهمي

dr.lecter يقول...

لينو


للدرجه دي بهاء مش مشهور بره مصر؟ مع اني فاكر العكس

بصي فيه روايه قريتها زمان حلوه اووي لالياس خوري اسمها باب الشمس واتعملت بعد كده فيلم

الجواز و سنينه يقول...

جميييييييييل جمييييييييييل المغازى
هههههههههههههه
لاء طبعا
بوست هايل و الله
و بصراحه شدنى جدااااااااا
بس مش عارفه اعلق على ايه و لا اه كالعاده
انت بتفتح مواضيع كتير
بس هاحاول
فعلا موضوع النقاب و شيخ الازهر هبل فى عبط
و إذا كان النقاب مش من الاسلام
فكمان الخلع مش من الاسلام

و اللى يهاجم النقاب يهاجم العرى

نور الشريف بقى
فأنا مش مصدقاه مش عارفه ليه
حتى كلامه فيه حاجه كده مش مظبوطه و واقفه مش راضيه توصل برأته ليه
بس الله اعلم طبعا
بس برضوا ماهواش موضوع ذا اهميه
اما بقى حال البلد
فأنا عايزه اقولك ان مش ضحى هيه اللى قالت
فاسياتك قلت كل حاجه
كل الجيل القديم بيحب عبد الناصر
الله اعلم احنا اللى مش فاهميين و لا هو سوء تطبيق منه
و لا عيب فينا اننا مالناش فى المعامله النظيفه
و نجرى على الكدب و النفاق و السرقه بعنينا
احنا مع الاسف ماينفعش معانا غير كده
حتى بره عارفنا
و فى الغالب اننا بنديهم انطباع يعاملونا كده
طيب ليه بنشتكى ؟؟؟ احنا السبب
لو الثوره خلتنا فى الوضع اللى احنا فيه
فالايه القرآنيه ما معناها ان الارض براح لينا نروح في ما احنا عايزين
مصر خلاص قفلت على شويه الفنانين و لاعيبه الكوره و الحراميه
مالناش فيها خلاص
بتقلب المواجع ليه بس

donya يقول...

اول زياره للمدونه
محتاجه شهر تتقري فيه
البوست جيد جدا
وكل كلمه صح
واضيف ان الثوره مسخت الشخصيه المصريه
وسفر المصريين للخارج كمل عليها
المستعمرين من كل شكل ولون ماقدروش علي الشخصيه المصريه لما جونا واستعمرونا
لكن لما المصري سافر بره
رجع مستعمر نفسه بنفسه ونقل هذا الاستعمار لباقي افراد المجتمع
وخصوصا ان اغلب من سافر من الطبقات الشعبيه الفقيره اللي بلا ثقافه
احيك علي البوست
وكنت اتمني اعلق اكتر
لكن علشان مااكنش ضيفه تقيله كده من اول زياره

*تحياتي

خوخه يقول...

دي اول زياره ليا ف البلوج
بس هتكرر ان شاء الله
البوست حلو جدا
وفيه تلخيص لحاجات كتير
واستمررررررررر
تقبل مروري
تحياتي

dr.lecter يقول...

الزواج وسنينه

انا موضوع نور ده صدمني بس المشكله ان فيه ناس بتقول انه له علاقه بصداقات مع بعض اعضاء الشبكه دي فعلا ومش عارف اقرر هل هو فعلا متهم ولا ولا ولا هي مجرد ازعرينه من الحكومه بيشغلوا بها الراي العام علشان ماحدش ياخد باله من البلاوي التانيه اللي بتحصل في البلد

dr.lecter يقول...

دنيا

كلامك في الجون وصحيح ميه في الميه ياريت مالمصريين خرجوا من البلد ولا رجعوا بالافكار اللي دخحلوها علينا وغيروا كل حاجه

لا ياستي عادي خليكي تقيله انا بحب الرغي والتطويل علشان اناقش بتعمق

dr.lecter يقول...

خوخه

ان شالله تشرفينا المره الجايه ونواصل التواصل

z!zOoOo يقول...

السلام عليكم

ازيك يارب تكون بخير

علي فكره واحشني جدا

مش عارف ارد علي اخر بوست مش لاقي التعليقات

بس عارف ايه اكتر حاجه عجباني في البوست الاخير

إني اطمنت عليك

ومبسوط إنك بدأت تطلع من المود الي انت كنت فيه

ليا بقي عوده اقري فيها واعلق وارغي براحتي

يارب تكون بخير

واسمع عنك دايما كل خير

ربنا يكرمك يارب

:)
تحياتي

dr.lecter يقول...

zzzzzzzz

معلش انا عارف اني مقصر معاكم بس انا مفتحتش باب التعليقات علشان موضوع جمال مبارك ومش عاوز حد يعلق عاوز الكل يشارك في الحمله وبس علشان الموضوع بقي شبه شخصي بالنسبه ليا انا

!!! عارفة ... مش عارف ليه يقول...

الف مبروك لصديقك

ومستنين بوست السينابون :)

وحلو الموود بتاع الفروسية ده

فين إحنا وفين الايام الجميلة دي

وبالنسبة ل 23 يوليو

اللي حصل يا سيدي من وجهة نظري

إن كان في حالة تحلل في البلد

وكانت حركة الجيش دي لم يكن المقصود بها ما وصلت إليه

لكن الترهل الحادث أوصل الأمور إلى ما وصلت إليه

بمعنى إن أحلامهم لم تصل إلى تلك المرحلة

ولما مكنش في مقاومة من أي نوع

طب ليه لأ منحكومش !!!

تحياتي
وليد

dr.lecter يقول...

ولييد

ياسلاام مانحوكمش؟ ده قمه الاستبداد من الجيش انه يعمل كده ومن غير ماياخد راي الشعب ويفرض سيطرته عليه بنفسه؟

احنا نطلع من مصيبه ندخل في مصيبه اكبر ولا هو مش مطتوب علينا نعيش عيشه نظيفه؟.

معلش ياوليد انا اتعصبت شويه لان الموضوع ده فاقعني جدا

غير معرف يقول...
أزال أحد مشرفي المدونة هذا التعليق.