الأربعاء، 8 فبراير، 2012

اضرب لو سمحت




سنه كامله فاتت علي يوم فرحنا بحلم اتحقق
سنه كامله فاتت علي اجمل تمنتاشر يوم عشناهم في حياتنا
سنه كامله فاتت علي شهداء في سبيل الحريه
سنه كامله فاتت علي انتظار التغيير وتعمير البلد
سنه كامله فاتت علي انقسامنا وتحولنا لليبراليين واسلاميين
سنه كامله فاتت علي الفتنه الكبري بتاعه التعديلات الدستوريه
سنه كامله فاتت علي التباطيء في محاكمه رؤووس النظام
سنه كامله فاتت علي استمرار المجلس العسكري في الحكم بعد وعوده الكدابه
سنه كامله المجلس العسكري بيستمر في قتل شباب الثوره والقبض عليهم وتعذيبهم وكشف عذريه بناتهم
سنه كامله ولسه اعلام النظام الحكومي والخاص بيكدب
سنه كامله والناس بدات تكره الثوره وتلعنها والناس جالها اكتئاب اكتر من ايام حسني مبارك
سنه كامله انا اتغيرت فيها وبتحول لشخص سيء وبقيت شخص غريب شخص شكاك وموسوس ومليان حقد وعندي بارانويا وعقده اضطهاد
سنه كامله كنت عايش فيها حلم جميل والحلم بدا يتحول لكابوس
سنه كامله متردد اسافر واطفش من البلد دي ولا لا
سنه كامله محققتش فيها حاجه في حياتي بسبب الانتظار
سنه كامله عملنا فيها مجلس شعب مش عارف ياخد بحق الشهدا بتوع محمد محمود وشهدا ماسبيرو ومجلس الوزراء وبورسعيد من العسكر
سنه كامله نزلنا فيها مليونيات مالهاش لازمه وبتقلب بكارثه
سنه كامله سلمنا السلطه للاخوان المسلمين وبنديهم فرصه لكن واضح ان فيه صفقه بينهم وبين العسكر
سنه كامله نقول هنثور ضد العسكر ومنعرفش
سنه كامله نطلع في مسيرات من كل شوارع مصر نغضب ونصرخ نهتف ونحشد
سنه كامله محدش بيتحرك الا الشباب والشباب هو اللي بيدفع التمن من دمه ووقته واعصابه وراحته
سنه كامله فاتت لما كنا قدام قصر العروبه وامل اتصلت بيا تقولي عمر سليمان اعلن بيان التنحي وطلعت اجري في شوارع مصر الجديده برقص من الفرحه
سنه كامله عدت لما صحيت تاني يوم وقلت اني شايف الدنيا جميله وزي ماكون نمت في ليله دخلتي
سنه كامله عدت من فقا عيون الثوار وسحل البنات وضربنا بالغاز والخرطوش
سنه كامله عدت وبقينا مرضي بالاحتكاك مع العسكر وبقينا مدمنين علي النزول للميدان مابقيناش عارفين مكان تاني غيره يضمنا وياوينا
سنه كامله نقول زهقنا ونرجع ننزل نقول اتخنقنا ونتمسك بالامل
سنه كامله نقول الشعب يريد اسقاط النظام
الشعب يريد اعدام المشير
يسقط يسقط حكم العسكر
لغايه امتي؟ هنعتمد علي النخبه؟ علي الصفوه؟ علي مجلس الشعب اللي احنا اخترناه وخليناهم ييجوا عن طريق مجهودنا احنا؟
سنه كامله ونقول يانجيب حقهم يانموت زيهم وفي الاخر بنموت زيهم

سنه كامله اتولدت قصص وماتت قصص وجه ناس ومشيت ناس
سنه كامله ودم الشهدا لسه مبردش
سنه كامله والموتي في قبورهم مش قادرين يطلعوا للسما لان العداله متحققتش
سنه كامله وصور الشهدا بتطاردنا في احلامنا وكوابيسنا
سنه كامله ولسه عداد الشهدا شغال
سنه كامله وبنقول ثوار احرار هنكمل المشوار

مابقاش في ايدنا حاجه لان خلاص اخدوا كل حاجه وماسابوش لينا ولا حاجه
علشان كده لازم نعمل اضراب وعصيان مدني

متروحش شغلك متروحش جامعتك متتشتريش بضاعتهم متركبش مواصلاتهم متشغلش تلفزيونهم

متطلبش اكلهم متدفعش فواتيرهم متدفعش تذاكر متستخدمش تليفوناتهم متنزلش من بيتك
متسمعش كلامهم متردش عليهم طنش وجودهم تجاهلهم

مبنطلبش منك تنزل وتثور في الشارع ولا تروح وزاره الدفاع او الداخليه ولا تعتصم

بنطلب انك تعصيهم وتضرب عنهم
دي اقل حاجه علشان يسلموا السلطه دلوقتي علشان نجيب رئيس ودستور جديد يحكمنا ونبني به البلد اللي خربت
ايوه خربت وضاعت لكن لسه في امل نلحقها

انا خدت وعد اني متكلمش في السياسه تاني ومش ناوي اتكلم وتقدروا تعتبروا ده البوست الاخير

لو مش هتعملوه علشانكم اعملوه علشان الناس اللي ماتت ونزلت علشانكم

.....................



" ياللي بترمي علينا النار مهما ضربت ومهما قتلت العصافير في الهوا احرار
دم الشهدا علي الاسفلت
يطرح ورد ويطرح نور
شمع منور ست شهور

شهدا اعتصموا شهدا شهود شهدا بيييجوا من ماسبيرو ويروحوا محمد محمود

"



هناك 5 تعليقات:

فاتيما يقول...

زى مانتا يا ليكتر

هتفضل زى مانتا يا بنى
مهما دقت على راسك وقلبك طبول

هتفضل رقيق وحالم
وعندك أمل ... ف وطن حر
وأمل ساكن او ساكنة .. ف قلبك
:)


لسه زى مانتا جميل وطيب
ومش عاوز تتخلى عن حلمك
ومسئوليتك
و بتعترف بضعفك و عاوز تغيره
وبتحلم ...

عارف يا ليكتر
انتا الورد اللى قالت عليه الغنوة
انتا الورد اللى بيفتح
و متمسك بحقك وحق كل اللى زيك

انتا عارف انى معاك ف الإضراب طبعا
ورغم ان شغلى كله فلول
فيما عدا الاتنين مديرين بتوعى لحسن الحظ ...
لكن هوزع عليهم الدعوة ...
و يمكن حد يختشى على دمه
وبفتكر ان ناس ماتت عشان هوه يملك حق الاختيار والحرية ودلوقتى بيدوس عليهم ومبيفكرش غير ف نفسه وبس


اجمل ما الثورة دى
واللى مخليك ومخلينى ومخلى كل حد فيها
مصر ومتمسك كدا .. لآخر نفس
انها حق
وصح
وخير بجد
عشان كدا كل ما تخبو تقيد
وكل ما يشتتوها تتلم
وكل ما يفطسوها ربنا يحييها من تانى


المفروض كنت تسمى التدوينة
اضرب لو عندك دم
يللى لسه بتفكر متضربشى ...


ربنا يجعلها بفايدة
زى كل خطوة قطعناها ما جابت نتيجة
ولو لم ترى بالعين المجردة
السنة دى لا تقاس ف اعمار الشعوب والاوطان بشىء ...
فصبرا جميلا
وربنا هينصر هذا البلد المتكالب عليه كل طماعين الدنيا ...

هافف على بالى الغنوة
اللى سمعتها ف آخر مسيرة ...
على نغمة بلادى بلادى

كفاية
كفــاية
كفــــاية
كل ظالم
وله نهـــاية

خلى بالك من نفسك يا غالى

منجي باكير يقول...

سعيا منها لتطوير النقاش و الاستفادة من المدونين العرب ، مدونة الزمن الجميل تدعوك لإبداء رأيك في موضوع : الشباب العربي بين ما أرادوا له و ما اختاره !

تقديري للتفاعل الايجابي

http://zaman-jamil.blogspot.com

sony2000 يقول...

كلنا كدا

بس عندي امل
ان بكرا ربنا هيعدلها

فافى يقول...

:(

sony2000 يقول...

اسمع دي

بأسم مدونتك

http://www.youtube.com/watch?v=sU6gRM_576Q&feature=related