baaaaaaaaaaaack

عدنا بعد تعسيله مؤقته ولااستكمال باقي امتحاناتي اللي هتقعد شهر اضافي وللكفاح مره اخري في العيشه الفل بتاعتنا والعوده للعمل في صفوف وزاره الصحه بعد فتره من الاستجمام في المانيا مع الرفيق توم كروز ومحاولتنا لعمل انقلاب ضد الطاغيه هتلر عن طريق عمليه فالكيري

واخذ راحه من القتال في غرب اوروبا مع قوات الحلفاء في تدمير النازيين في لعبه call of duty


الجامده مووت


وبعد ان تخرج محمد صاحبي من كليه ظباط احتياط والتحق بالخدمه في احد المواقع الامنيه الخطيره المريبه واصبح الواحد علشان يكلمه لازم يتعمل له سين وجيم وياخد معاد ويتم التقصي عن فضله واصله قال يعني الوااد بقي ابو فله السكري
( ماحدش قدك ياواااد بقيت من بتوع السلطه ههههههههه)

وبعد ان تم تاجيل سفري للاسكندريه



نبتدي البوست المجيد

ان تذهب لمعرض الكتاب

حد عاقل يروح المعرض يوم مامصر كلها تاخد اجازه من الدراسه والاهالي يروحوا من منطلق مافيش حته نفسح فيها العيال فتاعالوا نوديهم المعرض
يوم الجمعه 30 يناير

ولا اتنين مخطووبين عاوزين يقعدوا يحبوا لي في بعض هناك ولا واحد رايح يقابل الجو بتاعه او واحده رايحه تجيب شويه جرايد قديمه من سور الازبكيه علشان تفرش عليها الاكل

ولا اللي رايحين رحله ويتفرجوا وبس
( مع ان الفرجه مش حرام بس لما تبقي رايح وعمال تضحك علي شكل الكتب ولا بتتريق علي العناوين او المؤلفين يبقي ياريت تقعد في بيتكم احسن ياعم المثقف)

بس السنه دي كانت اوفر فعلا

رحت مع احمد ابن عمتي وعلشان نعرف نركن العربيه طلع ترابيتتنا بجد وطلع تيتتنا وستنا وابونا وامنا وكل ال ال ال ال بالي بالك ياعم البيه

زحمه رهيبه

بقيت حاسس اني مااشي في سوق العبور ولا شارع رمسسيس
ايه البشر دول كلهم
معقوله بقينا مثقفين للدرجه دي؟
معرض الكتاب هو فرصه للمه وتضييع كام ساعه وتشوف مصر بكل انواعهم
طبعا معظم الناس عارفه انا بتكلم عن ايه وياما راحوا المعرض وجربوا زيي كده

بس المره دي اخنقت فعلا اكتر من اي سنه تانيه بالاضافه ان لغايه يوم 1 فبراير مكانش فيه اي كتب تستحق انك تجيبها للاسف باستنناء بعض الكتب ومعظمها قديم كمان

ويمكن وانا باكتب السطور دي يكون كتاب دكتور جلال امين نزل بتاع مصر في عهد مبارك اللي هاجيبه بكل تاكيد

بالاضافه لاعجابي ببعض دور العرض المميزه مثل دار عرض الجامعه الامريكيه المليانه كتب قيمه فعلا ومترجمه للادباء والمفكرين المصريين والعرب

ودار عرض مكتبه الشروق المنظمه جدا والدقيقه

ودار عرض ميريت والدار المصريه اللبنانيه وبعض القله القليله

وللاسف بعد مكان سور الازبكيه المكان المفضل لي لاقتناء الكتب القديمه النادره اصبح مكان فوضوي جدا وغير محتمل والناس هناك بتتعامل مع الكتب كانها لحمه والكتب بتتهان فعلا اهانه لدرجه ان كان فيه روايه لفيكتور هوجو مرميه علي الارض والناس عماله تدوس عليها كانها فار وعمالين يدوروا علي علم الابراج وكيف تقتنين غريسا ياسيدتي والباقي بيدور علي كتب سلاح التلميذ القديمه او مجلات اجنبيه فيه صور مايوهات او كتب طبيخ

حاجه زي الفل اوي

ياخسارتك ياسور الازبكيه كنت كنزي الفريد

طبعا دخت جدا يومها وماجبتش حاجه من هناك الا كتاب قديم لعلاء الاسواني وكتاب دوله الفيس بوك الجديد

روحت علي عمتي وانا مكتئب شويه لاني كنت بدور علي كتابين كده والوقت مااسعفنيش اني الاقيهم ولازم يوم كامل علشان ده بس اللي خفف من معاناتي حبتين اني طلعت بعدها علي مكتبه ديوان وجبت حبه حلوين كده اقعد لي 3 اشهر اقرا فيهم عما اقرر انزل قبل نهايه المعرض ولا لا؟ واجرب حظي تاني؟

يوم الاربعاء 4 فبراير 2009

خلصت محاضرتي علي 12 كده لقيت نفسي زهقان مش عاوز اروح
قلت ادخل سينما واروق نفسي مع الاخ جيم كاري
علي الساعه 2 كده قباري كلمني قاللي انا في المعرض
قلتله ساعه وابقي عندك
وطلع تيتي علشان اطلع من مكرم عبيد لغايه ارض المعارض علشان سواق التاكس النبيه راح مخرم علي مصر الجديده معرفش لييه وزنق نفسه زنقه مايعلم بها الا ربنا في وقت الذروه

المهم اتقابلنا ادام دار الشروق ولفينا المعرض وورمنا بجد بس كله كووم وحفله التوقيع بتاعه دكتور جلال امين ودكتور احمد خالد توفيق دي كوم تانني في دار ميريت
بجد كنت هاطير من الفرحه علشان شفت الاتنين دوول

وبعد ماجبنا اللي احنا عاوزينه طلعنا علي رمسيس واحنا مش شايفين ادامنا من كتر التعب وكل واحد كت علي الساعه 9 كده بس كان يووم جامد بصراحه عوض لي يوم الجمعه اللي فات

ان تكون عاشقا لديستوفيكسي

حدوتتي معاه من سنه كام؟
امممممممم بيتهيالي 2001
او يمكن دي دايه حدوتتي مع الادب الروسي عامه
معرفش هل انا كنت مرتب قبلها اني اتوغل في الادب الروسي ولا جت بظروفها كده مره واحده ولا ايه الحوار؟
ماتفهمش السبب

بس اللي فاكره ان اول حاجه قريتها للروس كانت ددكتور زيفاجو ومن وقتها وقعت زي العاشق في اجواء روسيا في القرن التاسه عشر ومنتصف القرن العشرين

الروس عامه واقعيين جدا يمكن اكتر من الانجليز والمصريين في الادب بتاعهم
تحس كده بانهم اختبروا الحياه اكتر من اي شعب تااني

وخاصه عندما نروح لاخينا
فيدودور ديستوفيسكي
بدايتي معاه كانت الجريمه والعقاب

اللي باختصار اعظم روايه قريتها في حياتي واللي بتعتبر تحفه الادب العالمي
ديستوفيسكي مش هاعرف اتكلم عنه لانه محتاج كتب عديده لكن باختصار ماحدش عرف يوصف النفس البشريه بكل عقدها وتوجهاتها وفطرتها ودوافعها ومعتقداتها زي ماعمل الاخ ديستوفيكسي

ده اللي تقدر تقول عليه قرب وشاف كويس زي مالامريكان بيقولوا
ديستوفيكسي ادبه عذب جدا وقاسي وانساني لاقصي ماتتخيل
بيغوص في البشر ويحللهم ادامك ويخلي شخصيات رواياته اقرب لك في حياتك ويمكن تلاقي نفسك فعلا قريب جدا من واحد من الشخصيات دي بشكل مخيف

من وقتها وجالي سعاار ديكي واتهبلت وبقيت اجري ورا اي عنوان له
الا ان قريت بالصدفه كلام لدكتور سيجموند فرويد المحلل النفسي الشهير المجنون بيقول ان اعظم روايه في التاريخ هي الاخوه كارامازوف
الكلام ده كان في 2003
من 2003 لغايه يناير 2008 كنت بدور في كل حته عن الروايه دي وخاصه اللي بتطلع من دار نشر رادوغا الروسيه واللي بمتاز بترجمتها الرائعه والطبعه الفاخره
مافيش حته في مصر ماسبتهاش الا وقلبت الدنيت عليها لدرجه اني فكرت اراسل العنوان في روسيا واطلب انهم يبعتوا لي النسخه رغم انها قديمه جدا
وللاسف مالقيتهاش برده واضطريت بعد استسلامي اني اتواضع واجيب نسخه تانيه صدرت عن دار نشر لبنانيه علي جزئين كانت حلوه بس مااظنش انها هتبقي في جمال النسخه الاصليه اللي عدد صفحاتها 1200 صفحه

يمكن بعد ماجبت الروايه دي لقيت نفسي بقول كده مبقاش ليا حافز بعد كده اني انزل المعرض بس طلعت غلطان

كان برده النهارده حفله توقيع ل3 مدونات شباب في دار الشروق ل 3 بنات ويظهر كده والله اعلم ان البنات قادماااااااااااااااااااااااااااااااااااااااااات
مكتسحين في كل حته الله اكبر يعني خمسه وخميسه في عينك يانفيسه

دوله الفيس بوك

مجموعه من الشباب المدونين المعروفين زي الزميله قطه الصحراء اصدروا عملا يستحق القاراءه واللي باعتبره رحله في دهاليز جروبات الفيس بوك العربيه والمصريه ونظره علي افكار هوؤلاء الشباب اللي بيياسسوا الجروبات واللي بتعبر عن احلامهم وافكارهم وعن شباب اليومين دول وعن الجروبات الهامه فعلا والتافهه فعلا فعلا فعلا

ساديزم

المدون محمد الغزالي اصدر مجموعه قصصييه بتحمل اسم ساديزم قريت اول واحده فيهم جالي حول في دماغي بس حبيتها في الاخر
لسه هاكملها

روايه عزازيل

اكتر روايه عملت ضجه السنه اللي فاتت وثيقه تاريخيه مترجمه من راهب عن الصراع بين الطوائف المسيحيه والمهازل اللي ارتكبها رجال الدين والكنيسه في القرون الاولي بعد انتشار المسيحيه بشكل روائي رهيب عن احداث حقيقيه

فيرتيجو

صدرت السنه اللي فاتت عن دار نشر ميريت
في يناير 2008
طلع منها 3 طبعات لغايه دلوقتي
اللي هيقراها هيصعق من جراتها السياسيه وتنبؤها لاحداث فعلا حصلت في نهايه 2008
بالاضافه للرموز الجريئه للشخصيات العامه

زي شخصيه هشام فتحي وعمرو حامد وخالد عسكر والباشا الكبير وولاده
ده كله في سياق مثير وممتع يمكن المؤلف احمد مراد حاول يقلد علاء الاسواني في عماره يعقوبيان وفعلا تحس ان فيهم شبه باستثناء ان فيرتيجو مافيهاش محتوي جنسي زي ماحصل في يعقوبيان

الروايه بترصد كل المتغيرات في مصر في القرن الواحد والعشرين في المجتمع والاخلاق
يمكن اكتر جزء جابلي غيظ وكنت هاولع في الروايه الخاص بموقف البطل لما استوقفه 3 ظباط شرطه مع حبيبته واحرجوهم بشكل سخيف

والجزء الخاص بقبضه النظام الخانقه علي حريه الصحافه

مصر والمصريين في عهد مبارك
عن دار ميريت
دكتور جلال امين

كتاب هام جدا وخطيير ماقريتش منه الا 30 صفحه بس لكن فعلا وثيقه هامه

مقارنه بين احوال المصريين في عهد ناصر والسادات ومبارك
وطبعا مافيش داعي للتخمين مين هو الانيل؟
من غير قله ادب ابراهيم عيسي ولا تجاوزات مجرد سرد لحقائق تؤكد ان حالنا ماتصلحش فعلا في عهد مبارك

ولا انا غلطااان؟؟؟؟؟؟؟؟؟؟؟؟؟؟؟