الخميس، 19 مارس 2009

watchmen


this city afraid of me....i have seen its real face
ساعات كده مابنحبش نبص لنفسنا في المرايه ونقف ادامها كتيير علشان احيانا بنشوف لمحه من الماضي والمستقبل
بشكل
او ساعات نشوف وشنا الحقيقي من غير القناع اللي احنا ماشيين به وسط الناس
ساعات اكتر نفكر في معتقداتنا وافكارنا هي جت ازاي وهل احنا فعلا مؤمنين بها
وهل المباديء دي مزروعه فينا ولا احنا اقتنعنا بها؟
كل واحد فينا راسم لنفسه منهج معين في الحياه وناس تانيه مش راسمه اي حاجه بتاتا
فيه ناس مننا بحكم منصبهم وسلطتهم بيشوفوا العالم من وجهه نظرهم هم وفاكرين انهم هم اللي اقدر بتوجيه العالم في الطريق اللي شايفينه صح
والتحكم في مصائر البني ادمين زي ماهم عاوزين تحت مسمي احنا عارفين بنعمل ايه
سواء الناس دي كانوا اهلنا او رؤسائنا في الشغل او حكامنا او رجال الدين الخاصين بنا اواولي الامر عامه
بس ياتري الناس اللي في السلطه دي لو كانوا هم المكلفين بمراقبه حياتنا مين بقي اللي بيراقبهم
ماحدش يقولي الله لان ده شيء مفروغ منه انا بتكلم عن سلطه بشريه مش الهيه
تخيل كده ان رئيسك اللي في الشغل مافيش رقابه عليه او بتحركه اهوائه الشخصيه وان مافيش كبير عليه
لكنه لازم تحتاج له وتطلب حمايته وسنده رغم كل ده علشان انت عارف انك ضعييف ولا حول لك ولا قوه وهو اللي يقدر يوجهك
بس و كان الشخص ده او الاشخاص دوول بشر زينا وزيكم وزي عم عبده البواب والست صفيه بتاعه الملوخيه اللي علي ناصيه الكورنيش
ناس بيخطئوا وناس يمكن يكونوا افظع مننا ومن الصوره اللي احنا راسمينها لنفسنا
لو فرضا ان الناس اللي مفروض يكونوا مسئوليين عننا اخطئوا مين هيحاسبهم؟
هتقولوا حد يحاسب اهله؟ ده انت ماعندكش دم يااخي
حد يحاسب شيخ الجامع؟ انت فجرت ولا ايه؟
حد يحاسب ولي الامر بتاعه ؟ انت هتعصي ربنا؟
وهم دول كلهم ايه؟
مافيش حد يراقب اعمالهم
ولو فيه حد يراقب اعمالهم لو فيه حد هعيراقب مثلا حاكم دوله او ظابط شرطه او مسؤوول ما
مين بقي اللي هيراقب اللي بيراقبوا المسئوولين؟.
ولو فيه حد هيراقب اللي هيراقبوا المسئوولين
مين بقي اللي هيراقب اللي هيراقبوا اللي هيراقبوا المسئوليين
متاهه مش كده؟
....................
انت بتخضع لسلطه الاهل وهم يخضعوا لسلطه الشغل وتللتانين يخضعوا لسلطه المسئولين واهم بيخضعوا لسلطه الاكبر سلطه رئيس الجمهوريه ورئيس الجمهوريه بيخضع لسلطه الامم المتحده ومجلس الامن
ومجلس الامن بيخضع لسلطه الكيانات تالاقتصاديه العملاقه والكيانات دي بتخضع لمصادر الطاقه
ومصادر الطاقه بتخضع لسلطه استهلاك البشر والبشر بيحخضعوا لسلطه متطلباتهم الجسديه سواء دفء او سكن او جنس او غذاء ودول يخضعوا لسلطه قوانين الكون وقوانين الكون تخضع لسلطه معادلات رياضيه بحته والمعادلات تخضع لسلطه الخالق اللي هو احكم واقدر واعلم كيان واصل الكيانات واصل الوجود واصل كل شيء
المصدر باختصار
................
افرض اني انا ياللي اسمي انا والعياذ بالله من قوله انا
افرض اني فعلا غلط في كل حاجه رغم ان جوايا حاجه بتقوول اني لا اانت صح يااض انت مش غلط ولا حاجه
بس محتاج انك تتحدي الناس دي كلها
لكن افرض ان الصوت ده سكت من زماان واني فعلا ماشي عكس الاتجاه الصحيح؟
علشان تبقي بطل او محبوب او زعييم او رمز او قدوه بص علي التاريخ
مرورا بشخصيات زي جيفارا او المسيح او عبد الناصر او جون كيندي او الصحابه رضي الله عنهم ( مع انهم بشر برده )
او حتي شخصيات معاصره زي حتي شخصيات علي مستوانا المحلي او الاقليمي زي عمرو خالد او حسن نصر الله او الشيخ ياسين او عمرو موسي او اردوخان او حتي المفتش كرومبو مع اختلاف ثقافات كل واحد فينا وحبه للناس الي بتشبهه
نفترض انهم عارفين انهم اخطئوا او بيتكتموا كارثه حصلت وراسمين صوره مزيفه لينا علشان لو عرفنا الحقيقه مش هنستحملها وهتتسبب في دمار حياتنا؟
فرضا ان في حياتنا اشخاص خارقين زي شخصيات الكوميكس
انا عن نفسي من صغري وانا معجب بالكوميكس مش علشان هي خياليه لكن علشان كل واحد فينا بيدور علي رمز وقدوه وشخص قريب من افكاره
فرضا ان فيه فعلا اشخاص بيعتبرو سوبر هيرووز بس بني ادمين زينا مش بيطيروا ولا بيختفوا ولا الهجص ده
شخص ممكن يكون مدرس او محامي او دكتور او عربجي او زبال
لكنه قرر انه يكون في خدمه الناس ويكافح الظلم والشر ويكون بالمرصاد للفاسدين
احنا بنحتااج اننا نلاقي ناس زي دول فوق طائله القانون
لان القوانين اتخلقت علشان مايحصلش فوضي في الدنيا وعلشان كمان تخدم اصحاب المصالح في نفس الوقت
االقوانين معموله علشان تحمي الناس وتحمي اللي كتبوها في نفس الوقت
وفي نفس الوقت بستعين بناس يعتبروا من وجهه نظر المجتمع خارجين علي القانون لكطن وجودهم حتمي
ساعات بنضطر لو كنا اصحاب سلطه ونفوذ نستعين بالناس دوول علشان اغراض معينه يمكن تبان للي عرفها وشافها علي حقيقتها انها افكار شيطانيه ومظلمه ومخيفه
لكنه لو عنده بعد نظر وبص لادام هيلاقي انها كانت في مصلحه كل النااس
وقبل كل ده المفروض يبص لقوانين الكون والقدر لان لهم دور اكبر
كل حاجه بتحصل لها دور معين في حياتنا هيبان بعد كده
انت بترمي ورقه من ايدك الورقه دي بياخدها الزبال ويحطها في الزباله يوديها مقلب الزباله يتم التخلص منها بالحرق تتحول لدخان الدخان ده يوصلك يتسبب في حكه ليكي واختناق تروح المستشفي تتعالج تدفع فاتوره اد كده يتستنفع منها مدير المستشفي ويصرف بها مرتبات الموظفين
الكموظفين دول بيشتروت حاجات من السوق وتكون انت واحد من الباعه االلي هيتم شراء منك البيضاعه وكده لفيت لفيت مع عجله الكون والمتااه ورجعت لييك
............................
دخلت مع اصحابي امبارح فيلم المفروض انه من نوعيه كوميكس بووك ومع طوله الفظيع ساعتين واربعين دقيقه
ومع الملل اللي اصاب اصحابي واحباطهم لانهم تقوعوا فيلم كوميكس اكشن مش توقعوا فيلم جواه كل الافكار اللي انا زكرتها دي
ماتوقعوش ان مجري افلام الكوميكس بقت واقعيه ومظلمه ولها نظره مستقبليه ومليانه اسقاطات علي واقعنا وتاريخنا المعاصر
مليان بنظريه ماذا لو؟
لو امريكا انتصرت في فيتنام ؟ لو نيكسون مازال رئيس جمهوريه حتي الان
لو اصبح العالم علي شفا حرب نوويه ونهايه العالم قربت وبقت لا مفر منها
لو الاشخاص الصالحين المسئوولين عن حمايتنا والاشخاص القدوه لينا تخلوا عن واجبهم وعن مسولياتهم واعتزلوا الحياه او انشغلوا بماديات الحياه وسابونا لمصييرنا
احنا محتاجين ليهم لاننا مانقدرش نعيش من غيرهم علشان اتعودنا عليهم
لو الاشخاص دول مش زي ماحنا متخيلين وارتبكوا فظائع في حياتهم زي شخصيه الممثل الهزلي اللي ارتكب مجازر في فيتنام وكان بيعمل بشكل سري مع الحكومه في عمليات قذره والناس فاكراه بطل قومي
او شخصيه رورشاك اللي بيطارد من القانون لانه ارتكب جرايم قتل كتيره رغم ان اللي قتلهم دول مجرمين ومغتصبين وسفله وقوادين لكنه من وجه نظر المجتمع مجرم حقير مجنون
فعايش متخفي وسطنا وكاتم كل الافكار السوده جوااه
او شخصيه العالم الذكي صاحب نوبل المليونير اللي بيملك معظم اقتصاد العالم وساهم في نهضه بلاده العلميه وبيملك اهم اسلحه متقدمه يقدر يردع بها اعدااء امريكا ويقدر يحقق بها السلام
طلع في الاخر انه علشان يحقق السلام ويمنع الحرب العالميه التالته انه يرتكب جرايم بشعه ويتسبب في موت مليون شخص في كارثه نوويه ينتج عنها ان السلام هيتحقق خاصه مع اتحاد امريكا مع اعدائها لتحقيق السلام بعد الحادثه دي
او شخصيه دكتور مانهاتن اللي اصبح منعزل عن البشر وفي نفس الوقت حاسس انه لازم يكون جانبهم لكنهم بيبصوا له علي انه مجرد سلاح يحميهم لكنه خطر عليهم في نفس الوقت ورغم انه بريء تماما من اي تهمه نسبت له لكنه بيقرر انه يتخلي عن الناس ويرحل بهدوء
ليه لو كنا فعلا ملوثين من جوانا بشكل مقزز ونصر اننا صح وانننا مش غلطانين واننا رغم خطايانا ونستمر فيها شايفين انده الاصلح بوجه عام لكل الناس
شعارات ومباديء معتنقينها لكننا ممكن نسيبها في اي وقت بعد انهيارنا الحقيقي ومواجه نفسنا ورويه جانبنا المظلم
الفيلم مشكلته انه واقعي جدا بشكل مخيف ويمكن اللي ماعجبهوش الفيلم وكان مستني فيلم تجاري هيصدم طبعا من كم العنف والجنس اللموجود فيه
للدرجه دي انا جوايا ده كله علشان يبعجبني فيلم زي ده؟؟؟؟؟؟؟؟؟؟؟؟
.................
عمرو : منك لله سايب خطيبتي وخارج معاكم علشان اتفرج علي فيلم زي ده
عمرو مهندس اتصالات في وةزاره الاتصالت
شريف : يعني انا مخنوق من فرقه الحراسه وعاوز افرفش ومااكلتش وتعباان وجاي تدخلنا فيلم زي ده
شريف ملازم اول شرطه
عبد العاطي : روح ياشيخ انا طالعان عيني
عبد العاطي ملازم اول ظابط احتياط سلاح مهندسين
طارق : فيلم ايه ده اللي كله سكس وناس معقده
طارق طالب في كليه حقوق وانتيمي
انا : طب وانا ذنبي ايه ياخواننا انتم اللي عايزين فيلم هلس اعملكم اييه هو انا كنت اعرف ان الفيلم هيبقي كده
بس بزمتكم مش جامد ؟
هم في نفس واحد سبه وشتيمه يعاقب عليها القانون ولقيت كل واحد بيطلع حزامه بس علي ميين
كنت اختفيت من ادامهم في لمح البصر
( كله بسبب كشري التحرير ياطارق يااهبل )
والي اللقاء في هلوسه من هلوسات اخوكم المغيب علي راي واحد صاحبنا

هناك 48 تعليقًا:

mUsLiM يقول...

عندك قدرة غريبة على الكتابة يا لكتر ،،

وكمان قدرة أجمل على صياغة الأفلام واستنباط الأفكار منها ،،

كنت تنفع تشتغل مخرج يابنى والله ،، :)

على كل حال ،،

إصبر وما صبرك الا بالله ،،

ومتخفاش التغيير قادم عن قريب

السلام عليكم

mera يقول...

فكرتني برواية عباس العبد بتاعة

(انا)داخل انا داخل انا,,بيقولك الناس اللي بتشتكي من تزمت السلطة بتبقي اكثر تزمت لما بتصل للسلطة عشان كده الواحد احسن حاجة يعملها يخرج من متحف الناس ويدخل متحف نفسه

peace

مواطن مصري يقول...

فكرتني بفلم land of the dead
انا عجبني الفل جدا اوي و اصحابي مفهموش الفلم و دعو عليا يوميها

Zika يقول...

يا اخبي الفيلم ده ده انا دخلته انا واتنين صحابي واحد قعد يقنع فينا انا وصاحبي ندخل الفيلم
وانا متردد
وفي الاخر
كنا قاعدين في السينما بننهار من البيض لا مؤاخذه
ماكنتش قادر استحمل كل هذا العته في فيلم واحد وكمان طويل
حاجه كده من علي وش القفص زي ما بيقولوا
انا مش قادر اعلق علي البوست لانك للاسف فكرتني بالفيلم وده خرج جوايا مشاعر زباله اوي من الفيلم ههههههههههه
فكرتني اما اتصل بهشام اكمل شتيمه
اصل انا وانتيمي بنشتم انتيمنا التالت صاحب فكرة دخول الفيلم من يوميها
معلش طولت عليك بس الفيلم حرق دمي هههههههههههههههههههه
سلام يا فندم

micheal يقول...

علي فكرة تهييسك ده عجبني جدا وفكرة أن مين مسئول عن المسئولين عننا ده شيء في غاية الخطورة والأهمية بس علي المستوي العام أقلوك أن فيه حاج إسمها مؤسسات وده اللي بيفرق دولة عن التانية
أنا مشفتش الفيلم بس الصراحة بثق في رأي صديقي العزيز زيكا
:)
تحياتي

احمد سعيد يقول...

بقولك ايه
معلش انا عارف انى رخم واستغلالى
ماتعرفش نسخه ترجمه نضيفه لفيلم:
donnie darko
اصل مافيش على النت غير نسخه ترجمه واحدة
وكلها اخطاء

Ahmed Salem يقول...

شوف يا سيدي,
الفيلم لو هتبصلوه كعمل سريالي و فلسفي فهو الصراحة جامد قوي و عالي. لكن من ناحية الكوميكس و البطولة و الحوارات فقد استطاع بجراءة انتزاع خنقتي و أشياء أخرى!

لكن أكثر حاجة خنقتني هو الاعتزاز بالشخصية الأمريكية في الموضوع. على سبيل المثال كان في مقابلة تلفيزيونية بيقول فيها محلل صحفي عن شخصية دكتور منهاتن
" انا زمان كنت بقول ان في سوبرمان و ان السوبرمان ده طلع امريكاني, لكن دلوقتي انا بقول الله موجود و انه امريكاني".

ولاد كلاب حقيقي!!


عموما لم شفت صفحة الكوميكس بتاعتهم على الويكيبيديا, هتلاقي ان المؤلف آلان موور كان أصلن عاملها للانتقاد من شخصيات السوير هيرو و كده و ايضا لانتقاد السياسات الأمريكية وقتها في عهد نيكسون.

في الأخر الموضوع نجح في خلق حالة من الجدال!

Unknown يقول...

بيعجبنى الناس اللى بيشوفوا حاجة من ورا حاجات تانية الناس التانيين شايفينها معاهم بس مش شايفين الحاجة اللى الناس الاولانيين شايفينها
فهمت حاجة؟؟

dr.lecter يقول...

مصعبنا

ياسدي مش للدرجه دي ساعات كتيره بابقي غلطاان وبخرف اسالني انا

اه والله مش كده برده كمان سنتين هاقدم واشوف يمكن ابقي يوسف شاهين الجديد

dr.lecter يقول...

ميرا

طبعا قريتها بس العايدي عمل حاجه تانيه خالص لا يمكن اوصل لمكانتها

انا بتكلم عن مجال تااني يمكن متلخبط بس لو دققتم هتفهموها

dr.lecter يقول...

مواطن مصري

كل مره ييجي الفيلم ده اخاف اشوفه مابحبش افلام الزومبي بصراحه وكمان مساله ثوره العبيد وكده علي اد ماهي جامده علي اد ماهي مخيفه جدا

dr.lecter يقول...

زيكا

ولا يهمك يابيه مانا خدت دوش محترم من الشتيمه والتريقه من اصحابي بس الغريبه ان الفيلم مش وحش اووي للدرجه دي هو يمكن بييض شويه بس مش بييض اووي

dr.lecter يقول...

مايكل

المشكله بقي فيه حد بيراقب المؤسسات دي وفيه حد بيراقب اللي بيراقبوا المؤسسات؟ هو ده اللي عاوز اوصله

dr.lecter يقول...

احمد سعيد

ياعم الفيلم جه في التلفزيون عشرميت مره بس صدقني ولا ترجمات الدنيا هتفيدك لانهم بيترجموا غلط ومش المضمون

اتكل علي الله وشوفه من غير ترجمه واللي يحصل يحصل لان ابلفيلم ده معقد جدا

dr.lecter يقول...

احمد سالم

اخيررا حد عجبه

بص مانهاتن ده بيرمز للمسيح زي مافهمت في قدراته الخارقه وتضحيته وانعزاله عن البشر وبيرمز للرب عندهم لان اصلا مافيش ايمان عندهم من الاساس


نهايه الفيلم بقي مثيره هل معني كده انهم لما انكروا مانهاتن وكرهووه يبقي الحدوا ؟

الفيلم فيه سلخ للابطال الامريكان والشكل المعتاد للبطل الخارق مؤلف الفيلم هو نفسه مؤلف سلسله v for vendetta

dr.lecter يقول...

انجي

طبعا يافندم مش حضرتك بتتكلمي عن الناس التالتين غير الاولانيين والتانيين طبعا هههههههه

أنا حر يقول...

حمدالله على سلامتك ومبروك نجاتك من هجوم اصحابك عليك
:)
تحياتي

dr.lecter يقول...

انا حر

الله يسلمك نجيت منهم بمعجزه

!!! عارفة ... مش عارف ليه يقول...

الفيلم مع الاسف مشوفتوش بس واضح تأثيره على البوست

وافكاره المتلاحقة والعشوائية واللي ممكن تحتاج لفيلمين تلاته علشان تناقشهم

إنما بجد النوعية دي من الافلام تستحق المشاهدة حتى ولو على سبيل الارشفة الفنية


تحياتي
وليد

dr.lecter يقول...

وليد

هو مشكلته انه محشي افكار كتييره اوي انا يمكن ناقضت جزء منها عاوز يتشاف كمان مره علشان تعرف تتعمق فيه كويس

نورتني بمرورك ياباشا

صيدلانيه طالعه نازله يقول...

انا حاسه ان الفيلم كان فيه زحمه كتيره
انا ما شفتوش بس من كلامك حاسه انى تهت و عايزه اقرا البوست من الاول

dr.lecter يقول...

صيدلانيه

هو الفيلم مافيهوش كل الكلام ده

انا كاتب اللي استنبطته من الفيلم وبرؤيه خاصه ليا مش لازم تكون متوافقه مع نفس الاحداث لكنها بتتكلم عن مضمون واحد

adel يقول...

انا الفيلم معاجبنيش لكذا سبب و ان شاء الله كاتب مقال عنه و هبعتلك اللينك

بس انا معاك ان الفيلم ليه فلسفة عالية

بس مش ده الفليم اللي كنت منتظرة من المخرج بعد 300 كنت منتظر فيلم يغير اسلوب افلام السوبر هيروز زي دارك نايت كده

بس محصلش :(

dr.lecter يقول...

عادل

ممكن يكون معاك حق

دارك نايت مختلف تماما وبيتكلم عن نظره تانيه خالص تتعلق بفلسفه الشر والجانب المظلم

نورتني بجد

... amr يقول...

ايوة يا جدعان .. يعني م الاخر ندخل الفيلم و لا نجيبة على الكمبيونر و حرام فية ال30 جندي ؟

*******
لكتر ... عجبني منطقك بصراحة :)

*SosSoOo* l'o'l يقول...

د. لكتر انا حاسة انك بدأت تفهم معنى الكوسة ... نشأتها وبدايات ظهورها والعوامل التي أدت الى ذلك

عمرو يقول...

البوست ده أكل دماغى و خلانى أقراه مرتين علشان أستوعبه و ده نادر لما بيحصل معايا
الضمير يا صاحبى
الضمير هو اللى بيحاسب الاٍنسان كبر أو صغر على كل تصرفاته كبرت أو صغرت برضو
الضمير ده مهم أوى يا أخى ..

Desert cat يقول...

جميل اوى ربط الاحداث ببعضها يا دكتور
وبستمتع جدا خصوصا وانا بقرأ طريقة حكيك للفيلم

تحياتى

dr.lecter يقول...

amr

ههههههههه لا استني لما ينزل دي في دي احسن

اي خدمه

dr.lecter يقول...

soso

الكوسه؟
احنا بلا فخر ماعندناش كوسه
عندنا قرع وبدنجان احنا وصلنا لمرحله متقدمه جدا عاوزه مراجع علشان نفهمها

dr.lecter يقول...

عمرو

الضمير ؟ ولو انعدم الضمير ؟ ولو اصلا انعدمت الاخلاقيات هنعمل ايه

ولو فيه ضمير ومع ذك هتعمل عكس مابيقولك ؟

انت متخيل الماساه اللي احنا كبشر وصلنا لها ومدي الانحطاط اللي غرقنا فيه

dr.lecter يقول...

قطه الصحراء

اخجلتم تواضنا والله ونورتيني بجد

leeno يقول...

انت يبني بتكتب حلو اوووي

يعني انت ازاي عرفت تكتب المتاهة دي انا لسة مش عارفة!!

طبعا انا قريت البوست و انا في الشغل
فحاسة اني اتكروت و دخلت فبوست محتاج روقان عشان افهم صح !!

بس هو بعد كل دة ايه النتيييجة


احكيلي بقى على ما ارجع البيت و اقاره على مهلي هههه

dr.lecter يقول...

لما تروحي ابقي اقريه تااني لاني ممكن فعلا اكون لاخبطت في الكلاام وعمال اكتب بدون وعي زي المغيب

انا عن نفسي معرفش النتيجه ايه هي متاهه زي مانت قلتي

روابط يقول...

أنت عامل زى, اتفرج عالفيلم وابحث عن الأسقاطات آى كان نوعها, وأبدا بتحليلها, ومقارنتها بالواقع ...الخ الخ


تحياتى

dr.lecter يقول...

حازم

اعمل ايه بس مبعرفش اشوف اي حاجه الا لما اتعمق فيها غصب عني والله داء وحش جدا علي فكره يخليك تفهم ساعات الامور اكتر مما تتحمل في الحقيقه

City-Of-Angels يقول...
أزال المؤلف هذا التعليق.
Fatma يقول...

الحساب يوم الحساب يا محمد

لحدي وم الحساب احنا انكتب علينا نعيش في فوضى

كل واحد مسؤول عن نفسه وبس

طبعا مش هتكلم عن اسلوبكواستنباطك لانه كالعادةرائع

انا كمان بحب الكوميكس اوي

dr.lecter يقول...

فنون

اخيرا ظهرتي فيينك ياستي؟

اه كل واحد مسئوول عن نفسه اه لكن لو انتي بقي مسئوله عن ناس تحت ايدك زي ابنك ولا بنتك ولا موظفين عندك ولا خلافه

ومصيرهم متعلق بقراراتك ونيتك وفطرتك السليمه؟

معضله صعبه جدا

Unknown يقول...

بوست جميل

احييك عليه

dr.lecter يقول...

اسلام ديو

نورتني بجد

Fatma يقول...

في الموضوع اللي انت نزلته وشيلته ؟!

City-Of-Angels يقول...
أزال المؤلف هذا التعليق.
The Seagull يقول...

أنا برضه بسأل نفس السؤال؟!

micheal يقول...

بوست جديد يا أستاذ
:)

dr.lecter يقول...

فاطمه

هانزله بعديين علشان لقيته مش مناسب دلوقتي

dr.lecter يقول...

مايكل

حبه كده وهتشوفه قريب

dr.lecter يقول...

يسرا

شوفي ردي علي فاطمه