الثلاثاء، 17 يناير 2012

النور هييجي اكيد




زي السنه اللي فاتت بالظبط كتبت بوست كان عن الامل لينا قبل الثوره

حياتي كانت بائسه قبل يوم خمسه وعشرين وبعدها حياتي اتحسنت وبقي ليا رغبه في الدنيا
حتي علاقتي بامل بقت وثيقه وبقت اقوي من الاول

وبعد كده بدات الثوره تبوظ معرفش باظت من ايه باظت من الاستفتاء ولا باظت من توحش التيار الاسلامي ولا من الصفقه اللي بين المجلس العسكري والاخوان ولا من انانيتنا او غباء الليبراليين ولا من ان الشعب بتاعنا بيهيج مره واحده وينام بسرعه

احنا اتغيرنا كلنا والكل ساعد علي قتل الثوره بس حاولنا اكتر من مره نحييها حاولنا اكتر من مره الوحيدين اللي حاولوا هو جيلنا جيل شباب الثوره اول ناس نزلت لغايه اللحظه دي
وفي نفس الوقت علاقتي باظت بامل وحاولت اصلحها اكتر من مره بس انا كنت غبي واناني
معرفش ايه اللي هيحصل يوم الاربعاء المنتظر
انا كنت بحب الاربعاء زمان جدا وكان افضل يوم في الاسبوع
بس مؤخرا بقي يحصل لي فيه كوارث

انا مخنوق جدا ومابقتش حاسس بطعم اي حاجه ويمكن حالي بقي اسوا من ايام مبارك
انا محتاج امل اي امل يخليني اتمسك بالحياه
محتاج الظلمه تروح من ادام عينيا

انا نازل بس معرفش هل انتم هتنزلوا ولا نازلين ليه ولا ناويين علي ايه
كل اللي اعرفه ان انا كنت باعيش بحاجتين واحده منهم بتضيع مني والتانيه بحاول ابعثها من موتها
التانيه دي هي الثوره لو فشلنا يبقي ماتبقاش حاجه لينا خلاص بعد كده

احنا مستنيين النور في اخر النفق المظلم واتمني انه يطلع نور القطار اللي هياخدنا لمحطه الامان والنهايه



هناك 4 تعليقات:

فاتيما يقول...

ان شاء الله
هنلاقى النور يا ليكتر

انا شخصياً نازلة اكيد
بس مقدرش اجاوبك على الجزء الاهم
وهوه ...
نازلين نعمل ايه تحديداً

انا عارفة ليه اكيد
بس هنعمل ايه ؟

معرفش

مش لأنى تايهة
لكن لإن الثورة دى ملهاش قواعد محددة
والحركة ف الشارع هيا اللى بتفرض عليك
الخطوة الجاية ايه ...

انا بتمنى يبقى فيه اعتصام
بس مش زى كل مرة ..
يخترق وينفض بخساير اكبر من حجم المقابل ليها ...

لسوء الحظ ان لسه بدرى
على ما العقل الجمعى يفوق
ويرضى بالخسارة القريبة مقابل المكسب البعيد ...

احنا لسه ف نص السكة
بتاعت فئة قليلة عارف هدفها
و بتصعد ف الحدث الدرامى لحد ذروته
ووقتها يتحقق اكبر مكسب
زى قبل 11 فيراير


انا متفائلة بطبعى
ولو لم يكن هناك ما يدعو لذلك
لو مش المرة دى
مش مهم
هييجى مرات بعدها

كل مرة نزلوا فيها الثوار
عملوا حاجة هتنكتب ف سجلات التاريخ
بجد ومش كلام
اروع ما ف هذه الثورة
انها ادتنا فرصة نعيد اكتشاف روحنا
ونغير فيها
وكمان نشارك ف تسييرها
بعد ما كانت بتسيرنا الدنيا اللى حوالينا على مزاجها وبتتسعنا إلى أبعد حد ....

أمل ...
لو دا اسمها الحقيقى
فمش هقولك حاجة عنها
ولا عنك
انا هقول ...
يا رب يريح قلوبكم
ويجمع الشتيتين مكانا بعد كل الظن
الحاصل كل مرة دا

انتا غالى عليا قوى يا ليكتر
مش كل مرة هقعد اقولك بقى
بس بفترض انك عارف
ما وراء الكلمات
اللى معرفش اقولها كلها
لضيق المساحة
وانتى عارفنى تعليقاتى
اربع خمس كلمات يا دوووووب

:)))))

خلى بالك من نفسك
و الأمل والنور راجعين ... يوم25

Tarkieb يقول...

يا مسهل يارب

dr.lecter يقول...

ربنا يكرمك يافاتيما انا والله نفسي اشوفك وكلامك بيخفف عني


تراكيب

يسمع من بقك ربنا

نصيرة تختوخ ---Nassira يقول...

http://www.youtube.com/watch?v=rnUc3Y-DfLw&feature=related
هناك أمل تلمع عيونه مادامت قلوب المصريين تنبض بحب مصر .
تحياتي ومتمنياتي بالخير لمصر.