الأربعاء، 14 نوفمبر، 2012

the19 th of november



remember remember the  19th of november
 

"ياللي بترمي عليهم نار مهما ضربت ومهما قتلت 
 
العصافير في الهوا احرار دم الشهدا علي الاسفلت يطرح ورد ويطرح نور شمع منور ست شهور 
 
 صوت الشهدا ادان الفجر.. صوت الشهدا يقولك اصحى..اسامينا فى حبات السبحه..عد صوبعك على اسامينا..خالد احمد ماجد مينا..شهدا يغنوا شهدا يطيروا..شهدا اعتصوا شهدا شهود.. شهدا بيجوا من ماسبيرو..ويزوروا محمد محمود"
 
 
.................
 
 
 
 
سنه كامله عدت كانها امبارح  سنه عدت ولسه فاكر اللي خانونا ومش هسامحهم ولا احط ايدي في ايدهم ومش هقدر احبهم
 
الحمد لله اني عمري ماتصورت جنب دبابه ولا قولت الجيش والشعب ايد واحده ولا انتخبت مرسي 
 
الحمد لله اني ماتغيرتش زي الباقيين
الحمد لله اني بطلت احلم بكوابيس واشوف نفسي في شارع محمد محمود في الكابوس اللي كنا فيه واقدر اتغلب علي مشاعري لما اتمشي في الشارع وماسمعش صوت الشهدا 
 
الحمد لله اني بطلت اعيط قبل الفجر واحس اني خاين واتخليت عن زمايلي 
 
الحمد لله اني عرفت الناس علي حقيقتها واني نزلت اول يوم علشان رجاله بيحبوا البلد زي احمد حراره ومالك مصطفي وقبفوا جنب مصابين الثوره 
 
الحمد لله انه فضح لنا حازم ابو اسماعيل واصحاب مشروع النهضه 
 
الحمد لله  ان الثوره لو كانت ماتت في الواقع فهي لسه عايشه في قلوبنا وعقلنا 

الحمد لله ان الشهدا ماتوا وهم مؤمنين انهم عملوا الصح والدور والباقي علي اللي ضيعوا دمهم واتخاذلوا عن القصاص لهم

الحمد لله اننا حاولنا باضعف الايمان القصاص لكن اولي الامر واصحاب البلد سدوا كل الطرق واحنا لا حول لنا ولا قوه وكرمنا المشير باننا حطينا اسمه علي المحور واديناه قلاده النيل هو وكلاب المجلس العسكري


الحمد لله ان لسه فيه ناس فاكره ومنسيتش ومش هننسي ولو معرفناش نجيب حقهم يبقي احسن لنا نموت زيهم موته شريفه 


انا مافيش حدث في حياتي قهرني ولا كسرني زي الخمس ايام بتوع محمد محمود علي قد ماشوفت وساخه الناس علي حقيقتهم واتفضحوا قدامي علي قد ماثبت ناس تانيه علي مواقفهم 

انا ماكسرنيش الا الغش والخيانه والنداله ومكسرنيش لا مطاطي ولا غاز ولا خرطوش 

افتكروهم وانزلوا الاتنين الجاي تخليدا لذكري افضل مافينا 

مش بطلب منكم الا انكم تفتكروهم بالخير وتدعوا لهم انزلوا ولعوا شموع اقراوا لهم فاتحه فكروا الناس انشروا صورهم  فكروا اللي عصروا علي نفسهم لمون بان لولا الشباب دول كان زمانكم تحت حكم العسكر لغايه دلوقتي 


مافيش حد يقدر يكسرنا مافيش حد يقدر يكسرنا قولولهم ده 

شكرا لكل بنت اسعفتني في اليوم ده ولكل حد حماني بظهره ولكل حد خلاني اثبت في مكاني
 
 
 

ليست هناك تعليقات: