الأحد، 30 ديسمبر 2012

عام طويل






2012

انا عايز اتكلم عايز افضفض 

انا جوايا كلام كتير لان السنه دي مكانتش سهله 
كان فيها حاجات حلوه طبعا بس كان فيها حاجات اوحش


بالاضافه اني قعدت مستني نهايه العالم زي ماقبائل المايا تنبات وفي الاخر محصلش حاجه 

بس علي الاقل بعتبر السنه دي هي الفراق بيني وبين السياسه للابد وبين حاجات تانيه

اعتذر لو فيه خلط بين احداث عامه او شخصيه بس انا متاثر بالاسلوب ده من عمنا صنع الله ابراهيم


اممم بدات بالنسبه لي في السينما كنت بشوف فيلم اسماء لعمرو سلامه  مع خالد  وطلعت اعيط منه

كان نفس اليوم لذكري احداث كنيسه القديسين 
ونفس ذكري اول مره اروح اسكندريه مع امل

خسرت صديق ليا بسبب انه خانني وكدب عليا

احمد عبد العزيز صديق وزميل اتوفي وهو نايم علي سريره وجالي اكتئاب وكان داخل علي زواج  واصغر مني بسنه

بقيت اشك في كل الناس وبقيت انسان لا يطاق ,وبقيت مههوس وعلاقتي بامل بدات يحصل فيها شرخ اكبر من اي مره

دخلت فيلم هيوجو بتاع مارتن سكورسيزي اللي بعتبره تحيه الي صناعه السينما

بدات اقرا لدكتور عز الدين شكري فشير  اول روايه كانت غرفه العنايه المركزه ومن ساعتها ادمنته 

قريت روايه انين لشريف ثابت اللي بقي صديق بعد كده  

العسكر والاخوان حضروا قداس 7 يناير بدعوه من الكنيسه المصريه وبعض شباب الاقباط انتفض وهتف بسقوط العسكر اشاره لموقعه ماسبيرو ولاموا البابا شنوده علي ده

شاركنا في احياء الذكري الاولي ل25 يناير وكانت المسيرات عظيمه ورائعه  وبعد كده حضرت كتب كتاب طارق بن عمتي وقابلت ولاد عمتي سميه وقابلت زوجه احمد الكولومبيه اللي اسلمت وصاحبتها ايلانا وقضينا يوم حلو في الحسين ووصلت ايلانا للدقي وبعد كده طلعت علي ماسبيرو مع الثوار 

حصلت احداث بورسعيد ومات 77 من جمهور الالتراس ونزلت تالت يوم في شارع منصور عند وزاره الداخليه في الاشتباكات اللي قعدت اسبوع ومجلس الشعب الاسلامي نفض لها تماما وعمل انتخابات مجلس الشوري والشارع بينتفض طالب القصاص والمشير بيسخن الناس علي الفوضي ورامي عصام طلع اغنيته الشهيره اه يامجلس يابن الحرام بعت دم شهيد بكام



بعدها باسبوع نظمنا مسيره لوزاره الدفاع مع سته ابريل والالتراس وكفايه وائتلاف شباب الثوره نطالب فيها العسكر بالرحيل 

ومحاكمتهم علي جرايمهم 

 مجلس الشعب كان مجلس قذر  كله كدب وناس مرضي نفسيين وفضايح 

البلكييمي اللي طلع كداب وعمل عمليه تجميل

وونيس السلفي اللي كان بيفرش واحده معاه في العربيه علي الطريق الزراعي

وحازم ابو اسماعيل اللي امه طلعت امريكيه وكان بينكر ده علشان يدخل انتخابات الرئاسه وكان انصاره عاملين حمله بوسترات سنحيا كراما في كل حته في مصر

البرادعي انسحب من سباق الانتخبات واضطريت اؤيد ابو الفتوح لانه الاقرب ليا وبحترمه واعرفه من قبل الثوره وبيمثل لي الاسلام الوسطي اليبرالي 

دكتور عز الدين عمل تجربه لاول مره من نوعها بدا ينشر كل يوم حلقه من روايه باب الخروج علي جرنان التحرير وكان لسه مخلصهاش والاغرب الروايه كل اللي حصل فيها اتحقق في الست شهور اللي بعد كده بالظبط كانه مكشوف عنه الحجاب

بقي عندي اكونت لتويتر ولله الحمد

عملنا انتخابات النقابه الفرعيه  بتاعتنا وعملنا تحالف الثوره مستمره ضد تكتل الاخوان بس للاسف الاخوان اكتسحوا وفازوا

كان دكتور عادل مرشح النقيب وجاله اكتئاب بعدها لكنه اتجاوز ده

افتتحت مشروع العياده اللي شاركت فيها مع زمايلي وللاسف قفلناها بعد ست شهور

قضينا يوم في العين السخنه مع صحابنا كان يوم جميل مايتنسيش 

حصلت احداث العباسيه وكنت هاموت هناك عند وزاره الدفاع ويومها العسكر بطشوا بكل ماتوا من جبروت واعتقلوا ناس كتير مننا وكانت غلطه اننا نزلنا علشان نقف مع ولاد ابو اسماعيل وطبعا البيه كان نايم عند امه وسابنا نتفشخ  وفاطمه وبيرو عملوا مجهود علشان يوصلوا لي ربنا يخليهم ليا

حضرت مؤتمر الاسكندريه وبعدها حصلت خناقه كبيره مع امل سبنا بعض للمره التالته 

الفتره دي مكانتش بعرف انام كنت مبنامش الا الساعه سبعه الصبح وماكنتش بحب اروح من الشغل كنت بخاف اروح علشان هابقي لوحدي في البيت

كنت كل اسبوع ادخل سينما اروح عند عمتي المهم اغير جو اشتري كتب اكل بفظاعه لغايه ماتخنت دقني طولت وادمنت الشيشه 

ماكنتش عايش 

ماحدش يتخيل هي عملت فيا ايه ومكنتش اتخيل ان الفراق بشع بالشكل ده 

قابلت ربا 

معرفش ايه اللي خلاها تظهر في الوقت ده بس لها فضل كبير اني اتجاوز المحنه دي والوحيده اللي ارتحت لها وتدريجيا بدات احكي لها عن نفسي وهي تحكي لي وبقينا اصدقاء بس كنت حاسس ان الموضوع هيتطور لدرجه اني فكرت اتقدم لها وفاتحت اهلي في الموضوع بس حصلت ظروف كل حاجه اتاجلت

كان فيه صديقه تانيه حاولت تفوقني من اللي كنت فيه وانا مدين لها بالكتير  ضحا انت انسانه رائعه بجدومخلصه

اغنيه موبنييل اللي مصر كلها بقت تغنيها علشان نفضل نعيش مع بعض

اعلان اتصالات بتاع متقولش علي نفسك كده انت حد جميل 



امي اجلت العمليه لاجل غير مسمي واجلت العمره اللي كنت هطلعها معاها 
فيليب خطب 
نواره نجم اتزوجت واسماء محفوظ اتزوجت\
ابراهيم رجع اجازه قصيره من انجلترا 
 طارق بن عمتي خلف
طارق صاحبي رجع لرنا 

عمتي حفصه ماتت ومعرفتش اروح العزا ولا حضرت الجنازه

دكتور اكرم سافر بعد معلمني اشتغل حالات implant 


اشتريت الloupes  علشان شغل الاندو وكنت فرحان به جدا 

بدات اتقن الحالات الصعبه لعلاج الجذور

حضرت مؤتمر راس البر 

عمر سليمان اعلن انه داخل سباق الرئاسه وسبب رعب كبير ومجلس الشعب حاول يطبق قانون العزل عليه وعلي احمد شفيق وعمرو موسي باعتبارهم من الفلول

خيرت الشاطر مرشح الاخوان انسحب ودخل بداله محمد مرسي رئيس حزب الحريه والعداله 

الاخوان عملوا حمله دعم قويه جدا وضخمه وحشدوا انصارهم


عملنا حمله دعم ترشيح هياتم لرئاسه الجمهوريه


عادل صليب صاحبي بقي اسمه الشيخ عادل صليب علي تويتر 


انتخبت ابو الفتوح في الجوله الاولي وخسر لان السلفيين اتخلوا عنه  وروحت ابطلت صوتي في الجوله التانيه ومعصرتش علي نفسي لمون والكل حاول يقنعني اني ااجي علي نفسي علشان ادي صوتي لمرسي بدل شفيق لكني قاطعت الاتنين وعملت ده بضمير مستريح

البلتاجي طلع مع مني الشاذلي بيكشف حقيقه احداث موقعه الجمل وقال علي الهوا كلمه ياشراميط

خسرت محمد امين راضي واحد من اعز اصدقائي بسبب اني باركت للناس علي خساره شفيق 


بعد فوز مرسي في اول يوم من تسلمه الحكم عملنا حمله للافراج عن المعتقلين في السجون العسكريه اللي اتحاكموا ادام القضاء العسكري وروحنا للقصر نطالب مرسي بالوفاء بوعوده

من وقتها قاطعت اي نشاط ثوري وسياسي 

عمر سليمان مات في توقيت غريب تزامن مع مقتل عدد من الشخصيات الهامه في سوريا 
البابا شنوده مات
عمار الشريعي مات

جلال عامر مات 


مسلسل عمر كان اروع عمل درامي السنه دي في رمضان وطبعا استغليت رمضان في تطهير روحي ومسح الماضي

ربا بقت شيء اساسي بالنسبه لي لكن لسخريه القدر ظهرت بعد كده امل مره تانيه واتدمرت علاقتي بربا لاني ماقدرتش انسي امل للاسف وماشوفتهاش الا في عزاء والدها

حاولت اقنع نفسي اني ماحبتش ربا  لكن بالوقت اكتشفت انها كانت حاجه مهمه جدا ليا وضيعتها واتخليت عنها

مي خاطر اتزوجت محمد كمال صاحبنا
والد عمرو عبد العظيم اتوفي وزواجه اتاجل لفتره لكنه تم في النهايه
عمرو صلاح اتزوج

حضرت حفل زفاف قباري وياسمين وقابلت احمد عبد الماجد وفاطمه ومالك زوجها وكان يوم رائع  واللي رفع معنوياتي مالك

 اتخانقت مع اهلي وقاطعتهم وسبت البيت وسافرت الواحات قعدت اسبوع هناك بعيد عن الناس ومبردش علي حد

حضرت اول حفله لتجربه الايماكس في مصر مع فيلم جيمس بوند الجديد سكاي فوول وبعد كده جربت الثري دي بتاعهم

قريت روايه الفيل الازرق لاحمد مراد وارعبني وصفه لعلاقه يحيي بلبني اللي كانت بتنطبق علي علاقتي بامل

قرلايت روايه دكتور احمد خالد توفيق السنجه بس معجبتنيش اووي

لقيت روايه ورده لصنع الله ابراهيم اخيرا بعد بحث لمده 3 اعوام

لقيت روايه الابله لديستوفيسكي بس مخلصتهاش لسه

بقيت من مدمنين لعبه المزرعه السعيده

حصلت احداث الفيلم المسيء للنبي محمد وحصلت احداث عنف ووجدي غنيم طلع في فيديو بيشتم الاقباط وقالهم ياشراميط

مات 55 طفل مصري في حادثه قطار اسيوط 

جابر صلاح مات علي ايد الداخليه في شارع القصر العيني 
جابر كان من سته ابريل ومن اللي انتخبوا مرسي وايدوه 


قبل عيد ميلادي سافرت اسكندريه لوحدي وبالصدفه قابلت ضحا وجابتلي هديه من مكتبه ديوان بعتز بها جدا 

امل كلمتني يوم عيد ميلادي

بقي عندي 29 سنه وشعر ابيض طلع لي

اختي جابت ابنها التاني وحضرت الولاده لاول مره في حياتي اشوف عمليه قيصريه واشوف خروج طفل معلنا قدومه للحياه بصرخه 
كانت تجربه مذهله

حصلت احداث رفح ومات 13 عسكري مصري علي الحدود في سيناء

مرسي عزل المجلس العسكري وعزل طنطاوي وعنان لكنه كرمهم ودالهم قلاده النيل وعينهم مستشارين له

وعمل اعلان دستوري مكمل

يسري نصر الله عمل فيلم بعد الموقعه وشارك رسميا في مهرجان كان بس معجبش ناس كتيره لانه صادم بالنسبه للثوار

الاخوان واتشوفيسكي عملوا فيلم مبهر فيه كم ضخم من الممثلين علي راسهم توم هانكس واعتقد هيبقي له نصيب الاسد في الاوسكار الفيلم اسمه cloud atlas


حسن بن اختي بقي يعرف يجري ويتكلم 

مشروع النهضه طلع الفنكوش 

اوباما نجح في فتره رئاسيه تانيه 

اغنيه كوريه اسمها gandam style  عملت مليار ونصف مشاهد علي اليوتيوب

تميم يونس كشف سر علاقه بوجي وطمطم 


 احيينا ذكري محمد محمود

بعدها بفتره بكام شهر عمل اعلان تاني ادي لنفسه صلاحيات فشيحخه وحصن قراراته وحصن مجلس الشوري والتاسيسيه وشال النائب العام  والبرادعي كون جبه انقاذ وطنيه مع صباحي وموسي والفلول وبدالت مظاهرات في كل حته مصر ضد الاخوان 

نزلنا بعد كده عند قصر الاتحاديه في مسيره ضخمه ورغم الحواجز الامنيه قدرنا نتخطي والداخليه انسحبت من ادامنا وبعدها نزل الاخوان وحصلت اشتباكات ومات 8 مصريين وحصلت اشتباكات مع الداخليه عند بيت مرسي في الزقازيق

طلع المرشد بعدها بيقول ماذنب النباتات ومرسي طلع بيلوم اللي كسروا رفرف عربيه الرئاسه

تم الاعلان علي استفتاء الدستور وقاطعت الاستفتاء بعد ماقريت الدستور  

خسرت ناس كتيره بسبب تعصبي ضد الاخوان واتمهوني اني فلوول 


سما المصري الراقاصه عملت اغنيه بتتريق فيها علي الاخوان 

القنوات الدينيه بقت سافله

باسم يوسف خد حقنا من كل الاسلاميين وفضحهم ورفع معنوياتنا 

جربت الحشيش ومعجبنيش وماثرش عليا 

مابقيتش اقرا جرايد 

كتاب البرادعي اترجم للعربي وكتاب ثروت الخرباوي نزل بتاع سر المعبد اللي بيكشف فيه تنظيم الاخوان

مابقيتش اكلم والدي اللي شايفني من الخوارج علشان بؤيد البرادعي وبعارض مرسي

قدمت في الزماله المصريه لطب الاسره 


بدات افكر احضر كورسات الزماله البريطانيه 

قضينا حفله عيد ميلاد ابن عمرو مع كل صحابنا وكان يوم رائع قبل نهايه السنه في الشيخ زايد

شفت كميه افلام كارتون لديزني وبيكسار رجعتني عشرين سنه لورا


مروه اختي وانتيمتي مختفيه بقالها فتره وكان نفسي اشوفها قبل مالسنه تخلص

اه بيقولوا فيه اختفاليه في التحرير بكره بمناسبه راس السنه
غالبا هروح هناك

سنه طويله بس اهي راحت لحالها ولو لنا عمر يبقي الحال افضل وابقي غورت من البلد دي ومارجعش تاني 






ياللا كل سنه وانتم طيبين ياحلوين 













هناك 9 تعليقات:

Tears يقول...

كنت محبطة اوى و احبطت اكتر دلوقتى و السنة الجاية رقمها 13 كمان!

Unknown يقول...

مش عارف أعلق أقول ايه بصراحة؟!! غير إني أتمنى ليك عام جديد أفضل من اللي فات في كل الجوانب السلبية اللي أنت واجهتها.. وخليك نفسك .. وعن تجربة لو لقيت واحدة بتحبك بجد ما تتخلاش عنها ;)

dr.lecter يقول...

ربنا يستر

شمس النهار يقول...

كل سنه وانت طيب

ايه موضوع علاج الجذور ده :)

ومااعرفتش ايه سر علاقة بوجي بطم طم :)))

adel يقول...

:) انا سلفي سلفي وبطنطن

dr.lecter يقول...

علاج الجذور يعني حشو عصب الضرس

dr.lecter يقول...

تميم يونس قال ان بوجي وطمطم مش متزوجين

dr.lecter يقول...

دوله
ايها الوغد العزيز

Maad Maan يقول...

" قريت روايه الفيل الازرق لاحمد مراد وارعبني وصفه لعلاقه يحيي بلبني اللي كانت بتنطبق علي علاقتي بامل "
اللهي يخرب يت أم التشابه بينا
بس تعرف
الحمد لله انت ما اتزوجتش
انا بقي كنت بتمني يحصل بجوازي بالظبط ذي الي حصل لي يحيي بزواجه
موت الزوجه و الأبن
هههههههههههههه اشتم براحتك انا هنا بطلع شويه من شياطيني