اه عاوز ارجع تاني
اصل مش كل الناس تقدر تكمل
ازاي يابني؟
اقولك ازاي
كل واحد له حدود وله امكانيات
واكيد ربنا ماخلقناش كلنا زي بعض
كل واحد مختلف عن التاني
يعني انت مثلا اكيد تقدر تقاوم وتحارب لغايه اخر نفس
انا ماقدرش لان امكانياتي العقليه والجسديه لها حدود
علشان كده ماتستغربش من الناس اللي بتنهزم وترجع جوه جحورها
هم ماعملوش كده علشان هم عاوزين كده
لا هم عاملوا كده علشان خلاص كل حاجه راحت منهم
الدافع الاساسي اللي كان بيحركهم راح
بالظبط زي مقاتلين كانوا بيحاربوا وفجاه قالوا لهم الوطن اتخلي عنكم
او اللي انتم بتحاربوا علشانهم ماتوا
او المبدا اللي انت مؤمن به انتهي واتغير
ساعتها تتوقع ايه؟
هتكمل
لا طبعا انت كده بتضيع جهدك
يبقي احسن لك ارجع
لف وارجع تاني احسن لك
ادخل جوه وانعزل
اه ده مش حل طبعا
بس حاجه مؤقته
علشان تراجع نفسك وتقرر هتكمل الطريق ده ولا تبتدي من اول وجديد ولا تشوف طريق تاني خالص
اصل انت كده هترجع لمفترق الطرق من اول وجديد ياحلو
فاحسن لك تشوف حاجه جديده في مكان تاني باسم تاني وهويه تانيه
ممكن؟
اه ممكن تتولد من جديد
بس ياتري انت فعلا عاوز تتولد؟
اصل يابني المصيبله ان مابقاش فيك نفس تبتدي من جديد
انت كملت 25 سنه يعني ربع قرن هتبتدي فين تاني
وبعدين مكان من الاول
انت جاي دلوقتي في زمننا الاغبر ده وتقول ابتدي
وماتقعدش تعيط وتغني ظلموه
لا ماخلاص
ده مش زمن العياط
ماحدش اصلا هيسمعك كل بيقول يالالا نفسي
الاغرب يابني اني كنت شايف فعلا النهايه قريبه
بس قلت يمكن تتاخر شويه
دلوقتي كده مره واحده حتف وعرفت حقيقه نفسك
وبقيت تشك في نفسك هلانا كل اختياراتي صحيحه من الاول
هل انا فعلا انسان قابل للحياه في العالم ده ولا اللي زيك يروحوا يموتوا احسن ويريحونا جتهم البلا
يمكن ساعات يبقي الافضل لنا اننا نرجع اجنه ونمسح كل حاجه عرفناها وشوفناها
في حاله مشهوره اسمها وضع الجنين بتحصل للناس اللي مايقدروش يتحملوا المواقف الصعبه او يستحملوا الحياه
بينكبوا علي نفسهم
ويعتزلوا كل حاجه
بيتهيالي انا علي وشك ده بس لسه شويه
قلتله يابني لا ماتقولشكده
بعد الشر عنك
انت اصلا بقيت كده من زمان
هناك 9 تعليقات:
اه فعلا فيه ناس كتير اوي عايشين بوضع الجنين
من غير غيبوبة طبعا
بس وضع الجنين في التصرفات والافعال وردود الافعال
كاننا مش شايفين اي حاجة
او كان اللي بيحصل منقدرش نعمل فيه اي حاجة
كاننا متكتفين رغم اننا مش كدة
كاننا بعيد رغم اننا مش كدة
كاننا مش موجودين وشايفين الحدث من خلال بعد زمني رغم اننا مش كدة
بقي ده الحل بدل الانهيار
بس ياتري هل فعلا هننهار لو فردنا ضهرنا ورفعنا راسنا وتخلصنا من وضع الجنين ده ؟؟
رايي اننا نحاول الاول
وبعدين نقرر
تحياتي
أحيانًا الواحد من كم الضفوط و المشاكل والمؤثرات الخارجية بينتهج الوضع فعـلاً .. بيبقى في حاجة لفترة نقاهة عشـان يقرر هو هيعمل ايه و هيفكر إزاي .. و دي سنة الحيـاة .. مشاكل و خنقة و قرف .. لكن أتذكر مقولة لشخصية عزيزة جـدًا عليـا بتقول خلقت المشاكل لحلهـا :) .. و مافيش حاجة اسمهـا مستحيل .. المستحيل ده عايش في خيال العاجز بس .. يبقى الواجب علينـا ايه بقى؟ .. نستسلم و الا نقاوم؟ .. هتقول تعبت و مفيش فايدة .. هقولك انت مخلوق عشـان كدة .. عشـان تتعب و تجاهد و تحارب .. و انت و نصيبك بقى .. املهم تعمل اللي عليك و ماتقصرش .. ايه يعني مشكلة عويصة شوية قابلتك و لا حاجة .. تصرف معاها بحكمة و عقل و انت تلاقي لهـا مليون مخرج :) .. بس الإيمـان و الثقة في الله ..
يعني زي ما تفضل الأخ اللي قبلي و قال .. نخاول الأول و بعدين نقرر
ربنـا يوفقك إن شـاء الله :D
فعلا كلامك صح وعجبنى أوى كلمة ماكان من الأول كان فى واحد صاحبى رسب فى سنه أولى وسأل الدكتور انا لو اتجدعنت فى السنين الجاية وجبت امتياز هتعين فى الكلية قالوه ما كان من الأول الراجل انعزل ونفسياته انكسرت
ممكن ننهار فى لحظات بس علشان نبنى تانى محتاجين وقت أطول ربنا يسهل يارب
ليه بس كده يا دكتــور ..
حاول تعرف هدفك فى الحياه ايه واسعى له ..
وثق أنك لو أدركت الهدف الحقيقى منحياتك, لن تقول أبدا هذا الكلام ..
قد يتعرض الانسان احيانا لنكبات وعثرا ,ولكن على المسلم أن يقاوم ويلملم جراحه , فأن روح المسلم لا تموت أبدا ..
قال تعالى (( إنه لا ييأص من روح الله الا القوم الكافرون ))
وربنا يفرّج عنا كرباتنا آميــن
والله من وراء القصد
السلام عليكم
انا حاسس اني اكتر واحد فاهم وعايش اللي انت بتقوله ... للاسف حسيت بيه من قبلك بكتير جدا وكنت اصغر منك
فيه فيلم اسمه adaptation
انا عايزك تشوفه وعايزك تعرف ليه اسمه كدة من الفيلم.
يا خسارة شبابكم كلكم
طيب ما انت كاتب الحل فى البلوج
"ان مع العسر يسر"
يا دكتور مافيش حاجة تستاهل
بنزعل و نغضب و نكره نفسنا و نشتم فى الدنيا و اللى فيها
بس عيب اوى لما نضيع اكتر من يوم فى الحالة اللى لا بتودى ولا بتجيب دى
سيب وضع الجنين ده للى دماغهم فاضية و ما عندهمش حاجة يدوها..انت انسان مثقف و فاهم خسارة اوى لما تقفل على نفسك من دلوقتى
و بعدين 25 دى بداية اصلا احمد ربنا انك ما اكتشفتش انك ما بتعملش اللى انت عايزه و انت عندك 50 سنة مثلا
ابتدى من الاول و اعمل اللى بتحبه و سيبك من الجنين ده
تصدق
نفسى ارجع لوضع الجنين ده
بس مش عارفه خااااااااااالص
مليش بخت
انا يمكن اعصابي تعبانه وباحب ابقي في الوضع ده لانه بيخليني اعرف افكر من جديد واشوف الامور اوضح مش انهازميه ولا تخاذل لا هو حاجه كده مش لاقي كلمه توصفها بس الخلاصه انك بعدها بتعرف تقرر انت ناوي تعمل ايه
إرسال تعليق