غروب الفجر

fairy tales

هو شرس وعصبي جدا وبيغلي من جوه ولسانه لازع وناقد

هي طيبه جدا وهاديه ورقيقه وغلبانه وصبوره وكريمه

هو : انا لا يمكن ارتبط بقصه حب ده كلام فارغ وهجص وشغل مراهقين وبنات اليومين دول عاوزين الحرق وضرب البلغ ماتربوش جتهم البلا

هي : انا لا يمكن اخلي حد يضحك عليا بكلمتين ويعيشني في قصه وهميه انا ناضجه وعاقله وعارفه ان كل الرجاله غشاشيسن ومنافقين ومش بتوع جدا ولا بتوع زواج

هو : ده عند امها اللي هتقولي انا بحبك حبك برص و10 خرس انت بتعملي كده علشان عاوزه تصطادي عريس وخلاص اه منكم يابنات حواء شويه افاعي

هي : انا ليا زاتي وطموحي ومش هاخلي واحد ييجي يقولي اقعدي في البيت علشان العيال والطبيخ ويخليني خدامه عند اللي خلفوه لا انا ارقي من كده بكتيير

بعد شهر من اول مقابله

هو : غريبه البنت دي اول مره اقابل زيها عقلها حاجه روعه غير اي بنت تانيه بجد انا مندهش هل فعلا فيه بنات لسه زيها في زمننا ده؟ ثقافه ايه واداب ايه وتدين ونضج

هي : ايه ده؟ ده غير فكره الرجاله تماما عني راجل بجد طموح وواثق من نفسه ومتحضر ومثقف ومش له اي نيه سيئه ولا اي رغبه وسخه فيا

بعد اول شهرين

هو : ايه ده؟ في ايه؟ انا وقعت ولا ايه؟ انا مش بابطل تفكير فيها ايه اللي حصل لا لا لازم ااافوق وانهي علاقتي بها دي مجرد صداقه

هي : يالهوي معقوله قلبي اتحرك؟ لا لا اثبتي يابت اوعي تتهزي بس ليه انا عاوزه اسمع صوته واشوفه كل يوم واشوف عينيه الحلوه وماتكلمش خالص ادامه

بعد 6 شهور

هو : وبعدين بقي اعمل ايه ياربي

انا بحبها بحبها جدا انا ماتخيلتش ان اليوم ده هييجي بس انا فعلا مش قادر ابعد عنها خلاص اتعودت عليها ومابقتش شايف غيرها بس لازم اكون نفسي وابني مستقبلي معقوله هتستناني انا ماقدرش اتقدم لها دلوقتي خالص ياربي اعمل ايه بس ظروفي مش كويسه واهلي لا يمكن يساعدوني دلوقتي

هي ارحمني يارب انا باتنفس نفس النفس بااعه وباشوف من عينيه وباسمع من صوته هو كل حياتي هو املي ونوري وعقلي مش قادره ابعد عنه لحظه رحمتك يارب وصبرني بس هو ليه ماتقدمش لغايه دلوقتي انا خايفه وقلقانه مووت خايفه يروح مني

بعد سنه

هو : وبعدين بقي انا موقفي محرج جدا مافتحتش معاها موضوع الزوج لغايه دلوقتي ومكسوف جدا بس ماقدرش لان مش بايدي حاجه وخايف اقولها تسيبني مش قادر بجد اتخيل ده ده انا اموت لكن هي ذنبها ايه تستناني ده كله انا كده اناني جدا وبظلمها

هي : مش عاوزه اضغط عليه اكتر من كده بس موقفي محرج في البيت عماله ارفض كل العرسان علشانه وهو ماتحركش وبدات ازهق ويجيلي ياس مش عاوزه افتح معاه الموضوع علشان هو مش ناقص ربنا يكون في عونه وهو محتاجني جدا معاه

بعد سنتين

هو : هي مالها مابتتكلبمش ليه وبارده جدا ومابقتش تيجي في مواعيدها وكل شويه بحجه وبعدين مابقتش زي الاول وبقت تقعد ساكته معايا ايه التغيير ده ياتري انا عملت حاجه ؟ هي مش قادره تقدر اللي انا فيه حرام عليكي بجد ياشيخه فلقتيني

هي : هو مابقاش يحبني انا متاكده من ده خلاص اتغير وزهق مني وعاوز يخلع خساره بجد بيكنسل عليا ودايما مشغفوول وكل شويه يسافر وبيكدب ليه بس كده ده جزائي اني صبرت عليك واستحملتك

القلب : هتعانوا وهتتعبوا وهتزعلوا وتعيطوا بس ماينفعش تستمروا اكتر من كده علاقتكم بتموت

العقل : لازم تسيبوةا بعض خلاص الحدوته خلصت وحرام كده

القدر : يمكن مالكمش نصيب في بعض دلوقتي ويمكن الزمن كفيل انكم تنسوا بعض

توته توته فرغت الحدوته

out-of-such-world

مدونه من المدونات النادره اللي اول ماتدخلها تخلها ببطء وتحس بشيء غريب وانت جواها

ان صاحبه المدونه دي حساسه جدا من الصور والمقولات والامثال اللي مليانه حيطان المدونه

صاحبتها تحس انها هشه جدا وخايف وانت بتتحرك جوه المدونه تخدش اي حاجه او تكسر اي حاجه

تبتدي تبص علي المواضيع اللي كاتباها هتصدم ان رغم الشكل الخارجي الرقيق للمدونه لكن كلمات وسطور المدونه وعمق مواضيعها اكثر جاذبيه بكثيير ممكا كنت تتخيل

بتتكلم في كل حاجه الفلسسفه الشعر الفن السينما باسلوب عميق للغايه من غير زعيق او جعير بشكل سلس

صحيح انها بتكتب باللغيتين العربيه والانجليزيه لكنها متمكنه جدا منهم

من المدونات اللي وانت طالع منها هتحس ان انت ماضيعتش وقتك وانت بتتصفج اجوائها

لاعضاء ايجي فيلم هي عضوه مميزه جدا بمواضيعها وهنا اثبتت نفسها اكتر

عنوان المدونه

http://out-of-such-world.blogspot.com/2008/08/children-dangers-of-technology.html

من فيلم قص ولزق

في عز فرحتنا دايما نلاقي الخوف

واقف في سكتنا مشتاق لنا وملهوف

كاننا وحشينه مع اننا عايشينه

خوف خلانا واحنا مغمضين من شوقه

لا عمره خلا القلب يفرح فرحه بجد

ولا عمره خلا حد مطمن لحد

كاننتا واحشينه مع اننا عايشينه

خوف خلانا واحنا مغمضين بنشوف

ياما حاولنا وكان نفسنا

ننسي روحنا ونسيب نفسنا

بس تملي بيفوقنا شعور بالخوف

الاغنيه الجميله دي بصوت هدي عمار من الفيلم الرائع الجميل قص ولزق اللي بيعتبر افضل فيلم شفته في 2007

الفيلم ده بيعبر عن جيلنا وعن حياتنا عن الشباب اللي عايشين وميتين

بعد مهتشوف الفيلم هتتغير نظرتك للحياه ويمكن ماتتغيرش لكن لازم تشوفه

الفيلم متوافر حاليا علي نسخ دي في دي ومع باعه الجرائد وعلي مواقع عديده علي النت

نصيحه شوفوا الفيلم وقولوا رايكم

فوتكم بعافيه