الخميس، 13 أغسطس، 2009

حكايه







MusicPlaylist
Music Playlist at MixPod.com








مش بسببها هي لوحدها هابطل تدوين الفتره اللي جايه وابطل اكتب وافضفض
مش بسبب موتها ولا الصدمه اللي انا فيها لغايه دلوقتي خدت القرار ده


مش بسبب اني حاسس ان امي التانيه ماتت وراحت خلاص

يمكن بسبب اني مابقيتش قادر اتكيف زي الباقيين علي غيابها من حياتنا
بقيت اقرب لعدم المبالاه

اسمع عن فلان سافر اقول وماله
فلانه فركشت مع فلان والطريق فضي لك اقوله مابقاش ينفع
فلانه اللي انت كانت عاجباك بس ماتحركتش اتخطبت اقول الحمد لله
فلان عمل عياده اقول ربنا يوسع رزقه
فلان خلف وفلان خطب وفلان قرا فاتحه
اقول ربنا يتمم لهم علي خير
لي مش ناوي تتزوج يابني؟ انت اتاخرت اووي
اقولهم بكره ان شالله


اللي رماك في الغربه راميني بالنسبه لي البعد ساهيني بحلم يوم ماتشوفك عيني بحلم ودموعي تصحيني"
"
حميد الشاعري اغنيه قلبي معاك


يقولوا لي جمال بقي عنده 3 مليون مؤيد من الشباب في جمعيه جيل المستقبل مش ناوي تدخل معاهم علشان تضمن مستقبلك
اقولهم وماله مايضرش اهو احسن من غيره


يقولوا لي جوه لجنه السياسات عمالين يحلموا ان الشعب المصري يبقي 40 مليون بس او 30
اقولهم قريب ان شالله هنبقي زي ماهم عاوزين

يقولوا لي رايحين بكره نعمل اعتصام سلمي اقول ماليش فيه
يقولوا لي عاوزين نحتج ادام دار الحكمه علي مستوي الاطباء الهزيل اقولهم انا مش طبيب

ييقولوا لي البلد ناقصها شراره اقولهم معييش ولاعه
يقولوا رايحين نعمل حمله توقيعات تبع الائتلاف المصري من اجل التغيير
اقولهم مش فارقه معايا

يقولوا لي فيه ندوه للمدونين في وسط البلد وهيديرها فلان وفلان عن الوضع القائم الحالي
اقولهم وبعدين

يقولوا لي فلان عجبه مجموعتك القصصيه اياها وبيفكر ينشرها لك
اقوله مش حلوه ومش هتعجب حد ومش عاوز حد يشوفها

تعالي نطلع الحته الفلانيه
لا
تعالي ندخل سينما
لا
ده فلان نزل روايه جديده
اقولهم لا
يقولوا نام لك شويه
اقولهم مكنتش بعرف انام الا عندها ولا احس بالشبع من النوم الا هناك وهي موجوده
حتي لما قعدت اليومين بتوع العزا هناك البيت مابقاش زي زمان صامت زي القبر

تعالي
سيبوني في حالي
انا تعبان وفاقد الاتصال معا اي حد

الاول كنت اقول هاخد مناعه من الصدمات من ساعه ما عمي توفي وبعد كده حصلته جدتي وجت عمتي قضت عليا بجد
الحزن اللي جوايا زي البحر مش راضي يخلص حاسس اني متخدر وعايش في حلم بشع
يقلوا لي شغلك مابقيتش مهتم به زي الاول
يقولوا لي خلص حتي الفيرست بتاع الماستر
اقولهم سيبوها بظروفها
مش زعلان علشان الموت زعلان علشان جزوري وروابطي بالدنيا والناس اللي انا متعلق بهم 26 سنه عماله اروح مني وتتفك واحده ورا التانيه
ماقدرش كده في يوم وليله اتقبل الوضع ده
كله الا ده


عزائي الوحيد ان الاسبوع ده اتلمت كل العيله اللي ماحدش لمهم من السنه اللي فاتت وحسيت ان فيه امل مره تانيه نرجع زي زمان
نفسي بجد نرجع نتلم علي طرابيزه واحده وهاتخيل ان اللي راحوا قاعدين معانا وشايفهم
يقولوا الحي ابقي من الميت
اقولهم وفين الحي ده اصلا؟

انا مجوف من جوه شكل من بره وفاضي من جوه باكل واشرب وانام وامشي لكن من غير روح
اقولهم الموضوع مش علشان الموت الموضوع مش هتفهموه اصلا علشان انا حاسس ان وجودي بيتلاشي
مش قادر اتخيل ان لمه زمان وسهرات زمان ده كله راح واني لما هازور ولادها بعد كده مش هلاقيها في البيت وهاشوف صوره غيابها في عيون ولادها
مش قادر اتخيل ان السرطان قرر يرجع يلعب لعبته البطيئه مره تانيه بعد 20 سنه من التوقف
عارف ان كلها اسبوعين والكل هينشغل وينسي ويابختهم بجد انهم بيعرفوا ينسوا
قاعدين انا ومحمد وخالد وطارق واحمد بنتفرج علي احلي الاوقات
وللمره
الاولي كلنا نركز في فيلم عربي مع بعض وقاعدين ساكتين ادامه ماحدش بيتعرض ولا يقوم يغير الفيلم


" ان الحياه مرحله ان الحياه مساله"
" وقلوبنا مسكونه"
كفايه نعرف بقي ان الحياه سكينه مسنونه"
حميد الشاعري من اغنيه مجانين



خالد وهو بيوصلني انا ومحمد
محمد قال له لف بينا في الحتت اللي كنا بنروح فيها زمان روحنا لقصر البارون وركنا العربيه ادامه وقعدنا ساكتين
لمه عيال كانت من 20 سنه رجعت تاني بس ناقصها ناس كتيره في نفس المكان
مضطر ابطل اكتب علشان النوبه جت ليا مره تانيه وماصدقت خدت حبه مهدئه

معلش يابراهيم كان نفسي اتكلم عن فرحك انت ومها
معلش ياعبد العاطي كان نفسي اتكلم عن خطوبتك انت وروده

كويس ان رمضان جه خلاص يمكن نفسي ترتاح وربنا يهديها ويخفف اللي انا حاسس به
ربنا يصبرنا كلنا علي اللي حصل لنا ويتقبل دعواتي علشان اللي راحوا

" واصل الدم مش ميه "
حميد الشاعري من البوم حكايه

هناك 29 تعليقًا:

ســـــاره يقول...

رحمة الله عليها يا محمد
انا ايمان قالت لي ان عمتك اتوفت
بس ماكنتش قادره اعزي وانت ماقلتش انها عمتك..
في كل الأحوال عظم الله اجرك
واحسن الله عزاك

Appy يقول...

البقاء لله وحده ربنا يرحمها برحمته يا رب

محمد فوزي يقول...

البقاء لله , ربنا يرحمها ويجعل مثواها الجنه ان شاء الله ويصبرك وتتجاوز الحاله اللي انت فيها دي قريب

El - Shandwely يقول...

البقاء لله يا محمد ..

محمد عتلم يقول...

شوف يا دكتور
احنا منعرفش بعض
قريت التدوينه دى بالصدفه وحسيت حالتك .. طبعا اسوأ شىء فى الحياه هوا الفراق ... مش الموت فى حد ذاته .. عارف ليه ؟؟ .... عشان الموت رحمه ... من حاجات كتير اوى سواء من مرض او من عيشه او من الدنيا او من الناس ..
ربنا عايز كده
وله حكم كتير اوى اهمها هى الرحمه والانتقال من عالم ردىء الى عالم جميل احنا منعرفش نوصفه
انا ابويا واختى ماتو فى شهر واحد وبعدها بكام سنه امى واخويا واعز اصدقائى .. دول اللى من الاسره يتخللهم طبعا اموات كتير من العيله والاصدقاء .... الحياه قفلت لدرجة انى بطلت اشتغل حتى وقعدت فى البيت وكان عندى حالة لامبالاه وتضييع من كل حاجه حتى من الناس المقربين عندى لدرجة انى سافرت وسبت مصر رغم انى مش مشجع الفكره دى بس حصل ... ليه ؟؟ مش عارف
بس الحياه بتستمر .. بمزاجك غصب عنك هتستمر مش هتقف عليك ولا عليا ولا على الجن الازرق حتى
بس انا لقيت الحل المناسب بعد تفكير خد سنين ... لازم تعمل حياه جديده وتعيش ولازم يكون ليك دور فى الدنيا .. مش عايش وخلاص . ولازم تبنى نفسك بجد عشان الوقت بيجرى والعمر قصير ولو ماعملتش حاجه هيكون شكلك وحش وانتا كبير ادام ناسك وجيرانك واصحابك واولادك . ويديك طولة العمر
طولت عليك جدا بس انا كتبت اللى انا حاسه

مي يقول...

البقاء لله ربنا يرحمها ويسكنها فسيح جناته

Founoon يقول...

انا عارفه انت كنت بتحبها قد ايه
يمكن ناس تستغرب تأثرك الشديد بموت عمتك هي في الاخر عمه يعني بعيدة بردو الى حد ما بس انا عارفه هي كانت بالنسبة لك ايه وبيتها وولادها يبقولك ايه
الدنيا كدا يا محمد ماحدش قاعد فيها وكلنا ماشيين بس بمواعيد
الفراق صعب والموت اصعب بس دا العادي بتاع الحياة
بيوجع بس لازم يحصل
انا فكرة الموت الحاجة الوحيدة في الدنيا اللي ما بستوعبهاش نهائي
ما بفهمهاش
مش عايز اقول كمان اني ما بحسهاش
انا بفضل تحت تأثير الصدمة باستمرار
بنسى واو بتناسى بقعد اقول موت موت موت كأني بفكر نفسي او بغصب نفسي تستوعب وانا مش حاساه ولا فاهماه ولا مدركة منه غير اني مش هشوف الشخص دا تاني ولا هقدر اكلمه
بخرف في الكلام باين انا ولا ايه
احزن براحتك وخد وقتك ما تستعجلش تطلع من الحالة دي بس حط في دماغك انها مش لازم تطول وما تستسلملهاش ارجوك
الحياة بتستمر
ربنا يصبر اولادها ويصبرك على فراقها
كلام محمد علتم وجعني اوي
ربنا يصبرك ويعوضك خير باسرة بتاعتك تفرح بيها
عديها هتعدي يا دكتور وهونها تهون وفكر انها النهاية الطبيعية لينا كلنا الفرق مش اكتر من مواعيد

... amr يقول...

و الله أنا مكسوف منك ! انا مش عارف اتابع حد ولا حتى اعرف أخبارالناس من اللي حواليا ..
البقاء لله يا محمد و شد حيلك .. انا عارف ان الواحد لما بيكون متعلق بشخص بيبقى صعب علية انة ميشوفوش تاني
بس خلي عزائك انها راحت مكان افضل من هنا .

البقاء لله

Romaya يقول...

البقاء لله يا محمد

ربنا يرحمها ويغفرلها بأذن الله

ويصبركوا على فراقها

محدش بيحس بمرارة الفراق وفقدان اعز ما لينا الا اللي جرب الاحساس دا

والموت اكبر فراق وبُعد عشان حتمية وجوده اللي لابد منه

ربنا يصبرك

samamasr يقول...

ربنا " يرحمها :) " يارب :)

كيكى عوووووو يقول...

يااااااه!!!!!
انا حاسه شوفتى نفسى فى حكايتك خوفى من ان ستى تموت وقتها كل نبض فيا هيختفى ووقتها لمتنا هتنتهى مع خالتى وولاد خالتى والعايله كلها
**وسط كل لمة بينا اقول بينى وبين نفسى ياااارب متنكش الاخير ولمة بعبر لحد عن مشاعرى تكون مشاعر هيفا!!!
انا عارفة ان الاحساس دة فى يو م هحسة او كل يوم بحسه!!
انا خايفة!!
مش عارفة اقولك ايه؟؟
انا عايزة اترمى فى حضن ستو
انا اسفة مش عارفة اقولك حاجه غير لازم تكتب ولازم تعبر

egyboy يقول...

البقاء لله يادكتور محمد والله انا حاسس بكل كلمه قلتها كلنا مرينا بالمرحلة دى فى يوم من الايام اتذكر ايام الثانوي الاستاذ قال الفراق صعب يا ولاد معرفتش معنى الكلام ده إلا لما ذقت طعمه فى أعز الناس
وأسأل الله تعالى أن يتغمدها برحمته ويبدلها اهلا خيرا من اهلها وزوجا خير من زوجها وولدا خير من ولدها فى جنته ومستقر رحمته انه القادر على ذلك
نعم المولى ونعم النصير

انا حرة يقول...

البقاء لله يا محمد و باذن الله تكون من اهل الجنة

انا عارفة احساس ان حد قريب منك كدا يموت و عارفة قسوة الاحساس بانك مش هتشوفه تانى بس بجد ربنا بيهون كل دا و بالوقت هتلاقى سكينة غريبة دخلت قلبك و خلتك تتقبل الوضع دا و تتعامل معاه على انه واقع و حصل

و اهم حاجة زى ما فاطمة قالتلك ما تستعجلش و خد وقتك بس ما تخليش الحالة دى تاخدك لفترة طويلة

ربنا يغفرلها و يرحمها و يثبتها عند السؤال و يصبرك و يصبر اهلها كلهم يا رب

Tarkieb يقول...

الموت هو الحاجة الوحيدة الحق في الدنيا...يمكن في ناس مش بتؤمن بربنا بس بتؤمن به.... ....ربنا كرمها مين عارف كان ممكن يحصل ايه لو عاشت مش كان ممكن تمرض وتتعزب.....ساعات الواحد بيبقى اناني اكتر من اللازم ....واللي يحب حد يتمني السلام له...الله يرحمها ويصبرك

عمرو يقول...

معاك اٍن الفراق صعب .. صعب جدا ..
لكن من رحمة الله بينا أن الحزن هو الشىء الوحيد فى الدنيا اللى بيتولد كبير و بيصغر عكس كل الكائنات اللى بتتولد صغيره و بتكبر ..
ربنل يصبر قلوبنا على فراق الأحبه و الزمن الجميل اللى أرتبطنا بيه من خلالهم و يرحمها ..

mojo jojo يقول...

البقاء لله ... بص ولا كلمه هتعرف تطلعك من اللى انت فيه .. حاول انك متقعدش لوحدك و ربنا يرحمها و يرحم موتانا جميعا

واحد من زمن الرسالات يقول...

صدقني يامحمد انا بعاني من نفس اللي بتعاني منه انا اكتشفت انها لها ذكريات كتيرة اوي معايا من اول الكاسيت الاحمر اللي اشترتهلنا من السعودية لطبق السلطة اللي كانت بتعملهولي لما كنت بروح هناك للخاتم اللي فيه فص ازرق اللي ادته لاختي لنبرة صوتها المميزة للكعك اللي كانت بتجيبه كل سنة في العيد الصغير واللي كنت انا واحمد بناخذه ونستولي عليه ونقول البقاء للاقوي كل اغاني حميد بتفكرني بيها لايام لما كنا بنتجمع كلنا عندكم في العيادة او نلعب بنك الحظ واونو وكينت لايام لما كنا بنلعب في مستشفي الشرطة من 18 سنة وايام لما كانت بتتصل بامي وتقريبا هي الوحيدة هي وستو اللي كانوا بيتصلوا بامي ويسالوا عليها وكنت بحط ودني علي السماعة واسمع هم بيقولوا ايه هم كانوا فاكرني بعمل كده عشان اتصنت عليهم وميعرفوش اني كنت بعمل كده عشان احس بالالفة والرحمة كنت لما بعدي علي الخضراوية وانا مسافر من قويسنا لمصر اترحم علي ستو وسيدو وخالوا دلوقتي زادوا واحد عامة انا سعيد بكل الذكريات دي حتي لو كانت مؤلمة لانها في الاخر جذوري
ياريت تستمر في الكتابة لان انا واحد من الناس اللي بتعجبني كتاباتك

غير معرف يقول...

الله يرحمها يا محمد انا حاسس فعلا ان رمضان هيخفف عنك لان مهما اي حد قال حاجة مش هيخليك تطلع من اللي انت فيه ربنا يقويك

انا دلوقتي بحمد ربنا ان مكنش ليا علاقة بقرايبي ولا بحبهم ولا اعرفهم اصلا عشان متالمش دة كله

بس ايه حكاية الحبة اللي هتاخدها دي؟ انت عندك ايه

سومه...مجنونه فى بلد عاقل يقول...

ربنا يرحمها يا رب البقاء لله ربنا يصبرك
وكل سنه وانتى طيبه
ادعيلها احنا فى ايام مفترجه

z!zOoOo يقول...

السلام عليكم

ازيك يا محمد يارب تكون بخير

سبحان الله مش عارف ليه ولا إيه الي جابني

بس حاجه كده قالتلي اعدي ابص عندك

اولا انت واحشني علي فكره

ثانيا : انا عارف كويس إيه احساسك

لأاني فقدت عمتي ومن بعدها جدي ومن بعدها والدي ودول كانوا من اكتر الشخصيات الطيبه والي كنت بحبهم ومتعلق بيهم قوي

في كل مره كنت بحس إن العالم وقف بيا
وبحس اني خلاص ماليش وجود ماليش لازم في الحياه

لكن برجع وبفتكر ربنا وبقول لنفسي

كل إنسان ربنا جابه في الدنيا لغرض ولهدف ولحكمه ولدور

فيه إنسان بيقدر يسيب بصمه في الحياه مهما كان نوع البصمه عمل او حب او ذكري او سيره او عمل مخلد او صدقه جاريه

فيه إنسان بيقدر يفهم ويعرف ويقدر ويحدد الدور ده ويمشي فيه لحد ما يحققه

ولحد هنا بيكون إنتهي دوره ورسالته

وهنا بييجي سؤال لو واحد صاحبك إستلف منك حاجه وبعد فتره قالك انا محتاجها هتقوله إيه ؟؟

الطبيعي انك هتقوله اتفضلها وشكرا ليك

مابالك بربنا لما يدينا روحناأمانه وييجي الاوان إنه يستردها تاني

هنقدر نقوله لا او نعترض ؟؟

ما باليد حيله غير إننا نحمد الله ونشكره ونحتسب ونرضي بالي قدره ربنا

وفعلا عمر الحياه ما بتقف علي حد ولو كانت بتقف يبقي كانت اولي تقف يوم وفاه النبي عليه الصلاه والسلام

ولا انا غلطان ؟؟

وفيه إنسان بيعيش دنيته من غير ما يفهمها عايزه ايه ولا عرف يفهم نفسه او يروضها ويحبها ويخليها تروح للهدف الي ربنا خلقه علشانه

ويكتشف في الاخر وفي أخر عمره إنه عاش عبث عمره من اوله لأخره مكانش ليه قيمه

يمكن يكون فاز بحب الناس وديه الحاجه الوحيده الي بتشفعله قدام نفسه

وماشاء الله شكلكم كلكم بتحبوها وإنها فعلا ست طيبه الله يرحمها ويغفر لها ويعفو عنها

لازم يا محمد نفوق مش هقولك ماتبكيش
لا إبكي وإنهار كمان إفتكرهم إدعيلهم
وكل ماتعوز تبكي ابكي لكن لازم يكون للحزن نهايه

زي ما كل شيء ليه نهايه

الحزن في القلب

وأظن إن لو عمتك كانت عايشه هل كان هيرضيها الي انت بتعمله ده

وكذلك كل الي بيحبوك بذمتك مكانش هيزعلوا منك

هترضي تزعلهم منك

انا في رأيي تاخد فتره النقاهه الي إنت عايزها وترجع من تاني مفعم بالحيويه لمواصله حياتك

وأحسن شيء تعمله كل ما تفتكرهم تدعيلهم قوي ومن جوه قلبك

والرضا بالقضاء والقدر والصبر من مفاتيح الايمان

ومعلش بقي بمناسبه الاغاني رغم اني عارف إنه مش وقتها

لكن فيه اغنيه احب إنك تسمعها :


الصبح طفل برئ ومساه يبان تجاعيد
وفوق طريق الايام تجرى الحياه مشاوير
ونشوف ملامح الزمن متعاده فى المواليد
واحنا البشر كلنا اعمار ورق بيطير

دايره تدور بالبشر وياّ الزمان بتفوت
دمعه على اللى مضى و دمعة فرح بالجاى
يا حىّ طول مانت حىّ مسيره ييجى الدور
دى حكايه متكرّره من يوم ولادة الضىّ

ياللىّ انت عايش حياه بص لها تلقاها
سبحة هنا و تنفرط بالعمر مانشوفهاش
ولا شئ يعطّر حياتنا يمد فى مداها
غير سيره عاشت هنا اكتر صاحبها ما عاش ..

وفعلا إقري تعليق محمد عتلم هتعرف إن فعلا ربنا مش بيعمل إلا الي فيه الصالح لينا

جايز مانكونش إحنا شايفين

لكن ربنا عز وجل قال
" وانتم لا تعلمون " صدق الله العظيم

وفرصه إن رمضان جه عشلان تقدر تقوي روحانياتك وعلاقتك بربنا

أتمني أسمع عنك كل خير

وتزورني وتطمني عليك

ده ضروري

ورحم الله عمتك وأبي وجميع المسلمين الذين شهدوا لله بالوحدانيه ولنبيه بالرساله وماتوا علي ذلك

تقبل تحياتي وعزائي

dalia يقول...

يااا خبر اروح وارجع اجدك في الحالة ديه يا دكتور البقاء لله ،الحزن مش حيعملك حاجه اقولك تعمل حاجه أحسن اقرأ لها قرآن وتصدق على روحها وادعيلها ولو تقدر ومقتدر سافر اعملها عمرة ود أحبابها هي في الوقت ده حتحس بيك والله صدقني وحتكون فرحانه بيك قوى لكن لو استمريت على حالة الحزن ديه انت حتسبب لها الالم والشقاء بدليل انت عارف ليه ان الاسلام مثلا حرم الصراخ على الميت لانه في الحقيقة بيسبب لروح الميت اللى بتكون حوالينا ألم شديد وفزع كبير وربنا وصانا بالصبر على فراق الاحباب وفي كل الاحوال وقال فيما معناه ان صبر العيد ربنا هو اللى بيجازى بيه لعظم ثوابه انا مش عايزه اطول معاك بس انا عجبني تعليق محمد عتلم جدا بصراحة مش قادرة ازود عليه حرف ربنا يهديك ويثبتك

ReEm يقول...

ربنا يرحمها و يجعلها في فسيح جناته

و الله يهون غليكم ويصبركم على فقدها

و الحمدلله اننا في رمضان لانه بيهدي

النفس اوي و يطيب القلوب

ربنا يغفرلها و اعذرني على التأخير

الازهرى يقول...

كل سنه وانت وكل أحبابك فى ايمان وامان وامن وخير وسلام وطمأنينه

اعتذر عن الغياب ولكن لظروف خارجة عن الإراده

Beeky يقول...

حاسس بكل كلمة قلتها و افتكرت جدتي اللي اتوفيت من كام شهر بجد وحشاني بجد محتاج اترمي في حضنها

الله يرحمها يامحمد هي و جدتي و كل موتى المسلمين انشاء الله

Hossam يقول...

صديقى االجميل
مع انى مش قادر افهم البوست من كتر مفى مشاعر مختلطة تماما ادمجتها بطريقة فظيعة جدا وجميلة جدا
الا انى بقول البقاء لله فى والدتك التانية وانشالله شمل العيلة يتلم تانى
واتمنى انك ترجع التدوين بسرعة
كل سنة وانت بخير ورمضان مبارك
تحياتى

بيطرية ومش بايدى يقول...

انا اول مرة ازور المدونة دى
مش عارفة اقول ايه الصراحة
انا جربت نفس احساسك ده جت عليا فترة وناس كتير اوى من حوليا ماتوا اولهم كانت اختى وبعدها عمى وبعدها ستى وبعدها جوز خالتى والله اعلم الدور على مين بس انا هاقولك حاجة انا بعملها بتصبرنى
انا كل ما افكر فيهم واقول وحشونى اوى اقول اسسكتى يا بت زماانهم دلوقتى ف الجنة فى قصرهم والولدان المخلدون بيخدموا عليهم وبيظبطوا القصر وتلاقيهم كمان شوية طالعين يشوفوا حبيبهم محمد عليه الصلاة والسلام
عارف بجد بعدها بقعد ابتسم واقول يا بختيكم يارب تكونوا سبب فى دخولى معاكم هناك
كان نفسى اقولك كل سنة وانت طيب
بس مسير الامور تتعدل

كلام على بلاطة يقول...

كل عام وانت بخير
تحياتى

كلام على بلاطة يقول...

كل عام وانت بخير
تحياتى

hind ga3fer يقول...

الله يرحمها

عارف فكرتنى برواية مرتفعات وذرينج لما كاترين ماتت

عارف كان شعور هيثكليف ايه انه بينسى يتنفس وبينسى ياكل ويشرب نسى وجوده وعاش معاها

فترة بسيطة وهتمر

بالمناسبة انا دى سيكا من ايجى