السبت، 3 مارس 2012

الوقت




ليله شتويه
كان فيه خطط كتيره منها اسافر اسكندريه الحق الجو هناك

او ادخل سينما واجيب كتاب وائل غنيم الجديد علشان افتكر ان كان فيه مشروع اسمه الثوره المنحوسه

لكن لسوء الاحوال الجويه والجو الممطر ولاصابتي بالبرد قدر الله ان اقضي الليله مع صح0ابنا بتوع بيت الشمس

في جو اسري حميم اتعشينا مع بعض وشربنا شاي مع بعض مابين متزوجين ومخطوبين وعزاب بس افتقدت اللمه دي من فتره

زي مانا مفتقد حاجات كتيره مفتقد خروجاتنا ومفتقد اني اسافر حتت جديده مفتقد نفسي

مفتقد الفتره اللي قبل الثوره ومعرفش ايه اللي جرالنا من بعدها بس انا متبسطتش من بعد الثوره او بالتحديد من بعد مارس الفين وحداشر

مفتقد المدونه وجو المدونات ونتابع الاخبار عن بعضنا وننزل بانشطه سياسيه او ثقافيه او فنيه

مفتقد الكتابه مفتقد ارجع اكتب واقرا مفتقد الخيال

مفتقد ايام الجامعه فيليب وحسن وهشام وايام الماستر
مفتقد ايام ماكنت بقرا لمحمد امين راضي سيناريوهاته ونقعد نتناقش فيها

مفتقد ايام ماكنت بروح كورسات ومفتقد ايام ماكنت حاطط خطط لبكره

مفتقد ايام ماكنت بنتجمع في البلد قبل ماكل واحد يتزوج وينشغل

مفتقد ايام المظاهرات في عهد حسني مبارك لما كنا ننزل خايفين بس مؤمنين باللي بنعمله

مفتقد صحابي في ايجي فيلم

مفتقد سهرنا يوم الخميس انا وطارق وعبد العاطي وعمرو

مفتقد ايام ماكان ليا مشاعر نظيفه بريئه مفتقد دقات قلبي بحراره

مفتقد ال تمتنتاشر يوم بتوع الثوره لدرجه نفسي ارجع اعيشهم كااحسن فتره في حياتي علشان كانوا حلم جميل

مفتقد شخص كان في حياتي بس اختار طريق وانا اخترت طريق

انا مبحسش بالدفء الا هنا في المدونه ومابقيتش احب الفيس بوك زي زمان

انا مفتقد حاجات كتيره بس هارجعها وارجع اعيشها وفي نفس الوقت هاكمل حياتي مش هوقفها



انا فيه قرارات هامه هابتديها من الليله باذن الله


هناك 5 تعليقات:

NOHA يقول...

رغم انى معرفش حتى اسمك بس حسيت ان تقريبا اننت بتكتب اللى حاسه بيه بالضبط بالنسبه لأفتقاد ناس فحياتى حتى نفسى بالنسبه لأن فعلا اخر وقت كنت فرحاننه بجد كان مارس 2011 وبالنسبه لأن الفيس بوك بقى ممل وبالنسبه لأن فعلا الحياه مبتقفش....ولا حتى فيها pause نجمع فيه نفسنا بدون ما نخسر وقت!!
بس الجميل فى الموضوع انك قررت تبدأ ودا امل جديد لييك ان فعلا الجاى احسن بأذن الله....بشرة خير ليا انا كمان :)
شكرا على الموسيقى والكلام..بجد مهدئ للاعصاب جدا...وبيدخل فى موودد ابداعى
مستنيه النوت الجايه تبقى تفائليه اكتر من دى

غير معرف يقول...

ربنا يكرمك يا دكتور

السلام عليكم

adel يقول...

واحشني ياوغد ياوغد

dr.lecter يقول...

نها
كلامك اخجل تواضعي

ايمان نورتيني

عادل
انت واحشني من ايام مظاهره وزاره الدفاع

شمس النهار يقول...

نلف ونغيب ونروح ونيجي
وبنرجع هنا بلوجر
مدوناتنا
هي بيتنا
وملاذنا اللي لما بنتعب من الدنيا
بنيجي نكلمها وتكلمنا