من اسبوع كنت في الاسكندريه بسترجع ذكريات لوحدي مع نفسي روحت كل الاماكن اللي كنت بروحها مع حد عزيز عليا
روحت القلعه والمكتبه واتمشيت في محطه الرمل وشارع النبي دانيال وكلت سمك في بحري ودخلت سينما وكلت سينابون وشربت قهوه
اه حسيت بحنين حسيت بشوق دمعت عيني بس خلاص الواحد لازم يفوق ويشوف حياته
اللي هون عليا اليوم ده انه شاركني صديقه مخلصه لي فوقتني من وهم النوستالجيا وانا شاكر لها ومدين لها بكتير
.........................
من يومين سمعت خبر مسح رسومات محمد محمود
الجرافيتي
مش عايز اقولكم اني قعدت اعيط وحسيت اني بموت لان ليا ذكريات اغلبكم عارفينها
انا بقيت جزء من الشارع ده من ايام الثوره في كل مظاهره وكل معركه وكل احتفال وحتي كنت اقابل الناس فيه وحتي ليا ذكريات حلوه فيه من قبل الثوره
حسيتهم عايزين يمسحونا ويمحونا وينسونا تاريخنا وتراثنا لانها مش مجرد رسومات دي حياه كامله وخاصه
واتبسطت لما سمعت ان فيه ايفنت اننا ننزل نرسم تاني وقررت انزل يوم اشاركهم هاجيب فرشه واسبراي اللي اقدر عليه
انا مابقاش ليا اي علاقه بالثوره وكل حاجه انتهت بالنسبه لي مع تولي مرسي اول يوم الحكم ومع المسيره اللي عملناها للقصر علشان الافراج عن المعتقلين في السجون الحربيه
اللي فرحني برده هو فيلمين نازلين قريب
فيلم بعد الموقعه بتاع يسري نصر الله وفيلم الشتا اللي فات لابراهيم البطوطي لان الفيلمين دول مرتبطين باهم حدث في حياتي
......................
يوم سته اكتوبر هيبقي يوم خاص جدا لاتنين من صحابي ياسمين وقباري
يوم الفرح بتاعهم هاشوفهم تاني وهاشوف احمد وفاطمه زي ماقابلتهم السنه اللي فاتت في فرح فاطمه ومالك
متبقاش الا احمد ونفسي بقي يتزوج هم مايعرفوش انا بحبهم اد ايه وبعزهم انا زكرياتي معاهم متتعوضش
.....................
في ليله عيد ميلادي جبت حلويات ومشروبات في العياده لزمايلي زي مانا متعود كل سنه اعمل لاني كنت عارف اني هاقضيه لوحدي مكنتش مهتم بالشغل اوي اليوم ده بس كان فيه صدفتين
واحده منهم ان فيه حد انا كنت متردد ناحيته من فتره قابلته يومها ونويت خلاص اعمل اللي ماجله ناحيته لانه الاصلح لي
الحد التاني قصه قديمه سبب اكتئابي ومعاناتي النفسيه قابلته وروحنا اتعشينا مع بعض بس ماحسيتش ناحيته بنفس المشاعر القديمه حسيت ان القصه خلصت خلاص وبعدها قابلت طارق روحت اشيش وقررت تاني يوم منزلش الشغل بتاع الحكومه لاني مش ناقص
انا كل سنه بقول اني هاموت في ليله عيد ميلادي بس السنه دي اللي مات فيا حاجات كتيره من اهمها اني مابقيتش اهتم اقوي علاقاتي مع الناس ولا معارفي او اصحابي ولا بقيت اتصل بحد بقيت منعزل جدا
كل سنه اقول ان يوم عيد ميلادي هيبقي جديد وابتدي بدايه جديده وانا فعلا ابتديت بدايه جديده اني هابقي صارم وقاسي اني هابقي بارد
انا مفتقد زكريات حلوه كتيره بس في نفس الوقت انا هاكمل حياتي لان الحياه بتستمر ومابتقفش علي حدث او شخص
السنه دي اتوفت عمه ليا في رمضان حزنت عليها لكن ماقدرتش ابكي وماروحتش العزا
خسرت صديق عزيز بسبب ارائنا في السياسه بعد نجاح مرسي في الانتخابات
اكتشفت ان ليا صديق خانني للاسف
خسرت فلوس كتيره في العياده اللي كنت مشترك فيها وربنا هيعوضني عنها ان شالله
خسرت فرصه سفر رائعه ابعد بها عن البلد دي واكون مستقبلي وابتدي صفحه نظيفه
خسرت حد وكفايه اقول عليه حد
السنه دي اختي ولدت ابنها التاني بس مش قادر احبه لاني لسه بحب ابنها الاول وبحسه ابني
فيليب خطب وعمرو اتزوج وعبد السميع خلف وطارق ابن عمتي اتزوج وابراهيم سافر ومحمد عبد الرازق سافر برده
السنه دي كنت هاموت اكتر من مره وعملت حوادث كتيره بس معرفش هو موتي هييجي امتي ولا ربنا بيبلغني رساله
بس حاسس اني هاموت في حادثه عربيه معرفش ليه علشان بكرههم وبحلم بهم كتير
اول امبارح كان فرح عمرو عبد العظيم
روحت متاخر علشان كان عندي شغل بس انبسطت من اني شوفت كل الناس كل صحابنا شله بيت الشمس وشله الطفوله اكتشفت اني اعرف ناس كتيره جدا وناس حلوه جدا الناس دي انا مرتبط بهم جدا وبحب اشوفهم
مش عارف ليه حسيت انها اخر مره هاشوفهم فيها
بعد الفرح روحت انا وطارق عبد العاطي نتعشي وقعدنا نتكلم كنت عايز اقعد اكتر كنت عايز اكلمهم عن قد ايه انا تعبان
انا مبسوط من الدنيا وزعلان منها
انا يمكن حظي احسن بكتير لكني حظي وحش في حاجتين الرزق والقلب
الرزق ده من عند ربنا والقلب برده بايد ربنا
انا اسف لو كلامي بينكد عليكم بس انا محتاج ابعد ومش محتاج ابرر او اتحجج انا هاعمل كده ليه
انا هابقي موجود دايما علي تويتر للي عايز يتابعني او علي المدونه اما الفيس فغالبا هاهجره
https://twitter.com/mon_moe
شكرا لكل حد من صحابي وكل حد عرفته وكل حد اثر فيا
هناك 5 تعليقات:
لفت نظرى وضايقنى فى نفس الوقت انك بتقول علاقتى انتهت بالثوره من ساعة مامرسى كسب وكأنك بتخلى مسؤليتك وبتوهم نفسك ان الثوره كده نجحت و100 فل و14
عموما انا مش عايزه اضايقك انت مش ناقص :)
البوست كله يوحى بإنك مكتئب عموما انا مش عارفه انت ليه زعلان بس اكيد بسبب الرزق والقلب :)
ربنا يزيح عنك ان شاء الله
تحياتى :)
كانت هنا فوفاااااا
انا مش راضي عن مرسي ومانتخبتوش ويوم مالاخوان وصلوا الحكم عرفت ان الثوره انتهت
ايوه كده وضحتلى :)
انا لا انتخبت مرسي ولا كرسي بس بصراحة بعد كل الاحداث اقدر اقولك وعسى ان تكرهو شئ وهو خير لك....كله اونطه والبلد دي كل ناسها للاسف اي كلام واونطجية...من اول عيل صغير لحد اكبر واحد مربي دقنه...سياسين وعاشقى كاميرات وميكرفونات التلفزيونات ...وده طبيعي لفترة تلاتين سنه جفاف لم ينمو فيها الا الميوتانتس اللي تأقلمت على العيشة الضنك...كل ثورة وانت طيب...ومن يطالب بالديمقراطية فليعرف ان صوت بتاعة الفجل مساوي لصوت استاذ العلوم السياسية وخريج اكسفورد,,,ومن فرح بحل مجلس الشعب عليه ان يتوقع ان المجلس الجاي حيكون كله اخوان وسلفيين برضه...هي دي مصر
معاك حق في كل اللي قلته
إرسال تعليق