الأربعاء، 1 مايو 2013

النصف المظلم من القمر









الفيديو الاتي يحوي  مقاطع قد لا تناسب الاطفال والاسر المحافظه وبه بعض الالفاظ الخادشه للحياء ويوصي باشراف عائلي

...................






   "   بص انا مش بعرف اتكلم قدام الكاميرا ومش هعرف اركز  بتلخبط سيبني براحتي واسال اللي انت عايزه بس اصبر عليا



 اعتبرني زي اسر ياسين في  فيلم الرسايل بحر لما كان بيقولك انا بتهته لما بتكلم مع الناس بس مبتهتش لما بتكلم مع نفسي بس انا مش عايز اتكلم مع نفسي انا عايز اتكلم مع الناس


- احنا ممكن نذيع صوت بس مش لازم صوره لو مش عايز الناس تضحك عليك
لا مش للدرجه دي



- انت شكلك اتغير؟
اه طبعا انا وشي عجز جدا  فيه تجاعيد هتلاحظها لو قربت وركزت وهتشوف كمان شعر ابيض كتير بيببان لما شعري بيطول
حتي بشرتي اغمقت بقت داكنه

-ياعم متقولش كده انت لسه صغير 
بلاش تقعد تقول الكلام ده ادام الناس علشان بيفتكروني لسه طالب امتياز



- شكلك تعبان

لا انا مبقيتش عارف انام زي زمان ولو نمت بنام كتير فوق ال 12 ساعه


-لسه مخلعتش ضروس العقل؟

قبل ماموت ان شالله


-باب النجار مخلع
معندكش فكره بخاف من دكاتره السنان وبكرههم اد ايه 

-اهلك ظلموك لما دخلوك اسنان
اه والله كان زماني دكتور نفساني قد الدنيا زي هاننيبال ليكتر 



-بس بتكسبوا  كتير واغلب البنات بيحبوا دكاتره السنان

ياعم ده وسط معفن اغلب زمايلي مصلحجيه وكل واحد همه نفسه قليل جدا لما تلاقي دكتور محترم وكلهم بينفسنوا من بعض وبيحقدوا علي بعض ومتكبرين جدا انا بجد بحتقر الوسط ده  والبنت اللي عايزه دكتور سنان دي تبقي مش طبيعيه دكاتره السنان لازم يتزوجوا بعض علشان يطلعوا عقدهم علي بعض مع احترامي لزميلاتي دكاتره السنان

انا غالبا كده اقل واحد بيكسب ومبعرفش اعمل علاقه كويسه مع المرضي بتوعي واغلب المرضي بيستهيفوني مع اني شغلي الي حد ما كويس  بس انا باعذر برده ان الفلوس بتخلي الناس ببتصرف بشكل جشع ومثقه الحياه وتطلعاتهم بيخلوهم كده ومسؤولياتهم


- كتبت الروايه اللي كنت عايز تنشرها؟
محتاج تفرغ سنه علي الاقل وبعدين انت عارف اني ضيعت سنتين في كلام فارغ


- اخبار الثوره ايه؟ مستمره ؟
مكافايانا زفت بقي ايه لزوم السيره دي

متياسش اكيد مكملين بس المهم لفين
تعاالي وانا اقولك فين


- طيب اخبارها هي ؟
معرفش بس اتمني تكون كويسه وراضيه ومقتنعه

بقالك فتره مبتدونش ؟
مبقاش عندي حاجه اقولها  الكلام مش هيفيد بحاجه في الظروف اللي احنا فيها


انت مالك قرفان كده؟
مابقتش طايق البلد دي بتقتلني وكارهها بلد ملعونه

_ نيجي للمهم فاكر اول مره بدات تدون

كنت بدون الاول في منتديات زي ايجي فيلم وبعد كده اصدقاء اعزاء منهم فاطمه عابد اقنعتني ان الافضل ليا ادون واسجل كل حاجه خاصه بيا واتكلم براحتي علشان تبقي ارشيف ليا  اول مره كانت في مايو   2008
بعد ماشاركت في اضراب سته ابريل وكنت بدعو الناس له في المنتدي  وكنت حاسس اني بعمل حاجه ضخمه ولازم اساهم واكون جزء منها


- سمتها نوستالجيا ليه؟

علشان بحن دايما للمااضي من صغري  حتي الفعل الحاضر باستني انه يخلص علشان يتحول لماضي فاحن له وافتكره واكتب عنه
بحب الذكريات بحب اسجل كل حاجه بالصور او فيديوهات اي حاجه تفكرني بزمان علشان انا عارف ان اي لحظه هتعدي مش هتتكرر تاني ولو معشتهاش علي الاقل افتكر ان اللحظه دي كانت موجوده

النوستالجيا مرتبطه باماكن بالناس مش بالايام وبس 

ممكن نسمه هوا بعد الفجر تعدي عليك تحرك فيك النوستالجيا ممكن صوت ده كله يخليك تكتب عنها


ممكن علشان تفتكر انت كنت ايه وبقيت ايه ممكن علشان تلاقي اجوبه لاسئله انت بتدور عليها دلوقتي

-مين اللي كنت بتحب تدوينهم؟

محمد علاء الدين
احمد مختار عاشور
رحاب بسام
ياسمين اباظه
فاطمه عابد
احمد شقير
احمد العايدي
اسامه الشاذلي
 
هتلاقي اغلبهم عندي في الليسته اللي بتابعهم



_ التدوين بالنسبله لك ازاي؟

ممكن تحط صوره واحده تكون كفايه ممكن تحط فيديو او اغنيه

ممكن تكتب سطرين بس او كلمتين بس تقدر تعرف تتوصل بهم وتاثر في نفس اللي هيقرا لك

انا مبكتبش علشان الناس انا بكتب علشان نفسي بكتب علشان اطلع افكاري  ولو انت لاحظت هتلاقي اغلب اللي بكتبه فصحي مع انه صعب بس بتحدي نفسي به


- لغتك ساعات حاده وجارحه باحس ان فيها غضب وبتنتقد بشكل عنيف

ده حقيقي لاني مبستحملش اني اشوف الناس بتعمل شيء بشكل جماعي وهو غلط او تنقل مفهوم او تمارسه 

حتي لو الناس دي صحابي او بيمثلوا التيار المثقف الواعي زي اللي كتبوا في مره عن التحرش كل واحده قعدت تحكي تجاربها عن التحرش بس بتحكيها من وجهه نظرها هي لكن ماسمعتش وجهه نظر التاني حتي لو هو غلطان لازم تسمعه ومش معني كده اني بقف جنب المتحرشين بالعكس انا بحتقرهم بس من وجهه نظري انا شايف انهم بيعملوا كده علشان يوجهوا ضربه للمجتمع ويعلنوا وجودهم او تقدر تعتبرها رساله منهم وتحذير للمجتمع اللي هيلاقي موجه غضب من المهمشين طول مافيش عداله اجتماعيه وطول مافيش طبقه وسطي تحفظ التوازن بين الاغنياء والفقراء  والموجه دي هتحصل هتحصل سواء علي شكل تحرش او حوادث سطو 

حتي الناس اللي عايشين دور الثورجيه انا بقعد افشخ فيهم تريقه لان اللي بيعملوه ده مش هيغير حاجه من الواقع انتم لبستونا في الحيط باخلاقكم العاليه وعصر اللمون فمش طالباها خراب اكتر من كده البلد بقت خرابه والناس في الشارع لا بقت طايقاكم ولا طايقه الاخوان فاتلموا كده

انا قاسي بس مؤخرا مابقيتش اكتب ولا اقول رايي بقيت اكتفي بالمتابعه وبس وبحتفظ بارائي لنفسي

اغلب كتابابتك كئيبه ؟

علشان لحظات الفرح عندي قصيره وقليله  انا مش بحب الحزن بس هو صفه ملازمه ليا

- بس انت  كده بقيت مممل من كتر التكرار
طيب اعمل ايه بحاول ساعات اخرج بس غصب عني

طيب ايه هي السعاده؟

السعاده ماينفعش يتكتب عنها دي تتحس وبس تتعاش تبقي راي تحمد ربنا انه خلاك تحسها  تحاول انك تستثمر كل لحظه سعيده وتستفيد منها وتحاول انها متنتهتيش بسرعه تخليها تمر ببطء تشااركها مع اللي انت عايزهم يشاركوك فيها وبتبقي احلي بكتير
السعاده مابتدومش بس شطارتك انك تفتكرها وتخليها ذكري تلجا لها لما تحزن وتطلعها من دولابك وارشيفك وتعيشها تاني

انا ساعات بحاول اصنع نفس الواقف واللحظات السعيده بنفس الاماكن ومع نفس الاشخاص وفي نفس الشهر اللي حصلت فيه



والاحلام؟-
انا ساعات مابقاش عايز اصحي من الاحلام علشان ممكن تتعود عليها  انت ممكن تحقق كل اللي انت عايزه في الاحلام  وساعات انت ممكن يختلط عليك الامر متعرفش تميز مابين الحلم واللواقع والحلم يبقي الواقع اللي انت بتنتمي له  متبقاش عايز تصحي من الحلم لانك عارف ان الواقع مافيهوش اللي انت بتحلم به ومش هتقدر تستحمل زي ماحصل في فيلم inception

فيه كلام بياثر فيك او بتفتكره كشويه؟

بفتكر الايه اللي في سوره غافر
 وافوض امري الي الله والله بصير بالعباد "

وباحب حته من توشيحه صوفيه
"
ان كان حظي في الحياه قليلها فالصبر يامولاي فيه رضاك"

والايه المحببه ليا من سوره الكهف

"قل هل ننبئكم بالاخسرين اعمالا الذين ضل سعيهم في الحياه الدنيا وهم يحسبون انهم يحسنون صنعا"


 
-بتكتاب كتير عن اسكندريه

لو ماكتبتش عن اسكندريه اكتب عن مين؟ الزقازيق ولا قاهره المعز ؟
تصدق بالله انا كنت هناك من اسبوع مكنتش عايز  امشي منها وكنت بقول لاحمد عبد الماجد صاحبي اني بفكر انقل الزماله بتاعتي من شبرا لمركز الابحاث عنهم في اسكندريه وادور علي شقه ايجار 

- بس فيه حتت انت بتحبها في القاهره
كنت بحبها زي المقطم بس بقي عرين الشيطان دلوقتي  وزي الحسين والقاهره القديمه وزي التحرير زمان قبل مايبقي مرحاض عام  لكن القاهره بجد مدينه لازم تحط عليها فنيك علشان ريحتها بقت لا تحتمل

- طيب ومصر الجديده؟
هتفضل غاليه عليا  رغم قصر الاتحاديه




_ كنت بتكتب بشكل جريء في السياسه

بص انا زمان ماكنتش مهتم بالسياسه الا في 2005  كنت بدات اتخنق من كدب الحزب الوطني والنفاق والتدليس اللي كانوا هاريينا به
وكنت بقعد اتفرج من بعيد علي وقفات حركه كفايه واتريق عليهم مين دول اصلا علشان يعملوا حاجه  بس من جوايا كنت بغلي لغايه 2006 في مره دخلت فيلم v for vendetta  في وسط البلد طلعت منه طاير علي الارض مش مصدق اللي شفته كنت مبهور وعديت بالصدفه جنب نقابه المحاميين كان فيه مظاهره لكفايه والامن المركزي مطوقها ساعتها شوفتهم انهم يستاهلوا احترامي وتقديري كفايه انهم عملوا فكره واللي شاف الفيلم هيفهم انا اقصد ايه ووكان وقتها مستني فيلم عماره يعقوبيان ينزل سينما وعايز اعرف هيطلع زي مانا متخيل ولا لا لانه كان هيفرق معايا كتير وتعمدت ماقراش الروايه علشان انا عارف ان مافيش روايه بتتحول لفيلم ناجحوكنت عارف ان النظام سمح للفيلم انه يتعمل علشان يقولك فيه حريه وديمقراطيه 

كان فيه معارضه بتعرص للنظام من امثال مصطفي بكري وبتوع حزب التجمع رفعت السعيد بس مكنتش باهتم بالنخب اووي رغم اني كنت مبسوط بوجودهم كنت بهتم بناس زي علاء عبد الفتاح ووائل عباس

ومخبيش عليك انا كنت منحاز للتيار الاسلامي كنت معجب بالاخوان وشايفهم قوي تقدر تغير وتقف ادام النظام بس كنت بتخنق من حدود طموحاتهم وتحركاتهم اخرهم وقفات ومسيرات او مظاهرات علشان غزه والاقصي او مظاهرات اسلاميه اسلامه لا شرقيه ولا غربيه   وقربت منهم وكنت ملتحي وقتها  ( عارف انك هتتريق وتقول عليا ساذج)  بس مالقيتش نفسي معاهم كنت بحلم بنموزج اسلامي تاني   لقيته بعد كده في دكتور عبد الوهاب المسيري ودكتور محمد سليم العوا  وعلشان كده حبيت حزب الوسط وكان لسه تحت التاسيس وكل شويه يترفض من لجنه الاحزاب بتاعه صفوت الشريف بحجه ان ماينفعش حزب يقوم علي مرجعيه دينيه  وياما طبعنا توكيلات افتكر ان في 2007 كان معايا فيليب صاحبي واتمسكنا من امن الدوله في معرض الكتاب بس سابونا بعد ماخدوا التوكيلات 


وطبعا سبتهم بعد كده لاني مالقيتش نفسي مع حد فيهم او بالاصح انا ماينفعش انضم لاي تيار او حزب او حركه 

انا كنت بكره النظام كنت بكره الزيف اللي فيه كنت بكره ان الناس خايفه وراضيه وكنت بكره الاستغلال والنفاق والكدب والمجاملات وطريقه مشي مصالحك معلش كنت بكره المجتمع اللي رضي بده حتي الاغاني مكنتش طايقها كل حاجه كانت مزيفه ومالهاش طعم 



- بس انت مكنتش ناشط

انا عمري ماكنت ناشط انا نشاطي في الشارع مبداش الا في 2010 مع رجوع البرادعي وانضمامي للجمعيه الوطنيه للتغيير وبعد كده مشاركتي في مظاهرات خالد سعيد وسته ابريل  لما كنا منكملش 100 واحد بس قدام 1000 عسكري امن مركزي في قدام مجلس الشعب او علي كورنيش اسكندريه 

كان صحابي بتوع الزقازيق يقعدوا يتريقوا عليا ويقولوا انتم مش هتعملوا حاجه ومافيش ولا واحد منهم فكر ينزل في مره 
مكانش حد مهتم بالسياسه كل واحد بيفكر في نفسه وبس في شغله وحياته وقتها كنت بغضب منهم وشايفهم انانيين بس بعد كده اكتشفت بعد سنتين من الثوره انهم كان معاهم حق لان مافيش حاجه تستاهل تضيع فيها وقتك وحياتتك ومستقبلك علشان في الاخر محدش هيقدر اللي عملته واخرتها انت الخسران  وان فعلا خساره نزولي وكنت هاموت اكتر من مره علشان كلام فارغ 


مكنتش بعمل ده وقتها علشان بحب مصر والكلام الفار غ ده كنت بعمله علشان العدل لاني مبستحملش الظلم 


_ كنت بتخبي عن اهلك
طبعا ومازلت   خاصه والدي لانه ناصري قديم واخواني حاليا  بس الحمد لله تبنا خلاص بقالنا خمس شهور

ليه تبت؟

علشان الثوره اظهرت اوسخ مافينا بالذات انا اكتشفت اني كان جوايا حد مشوه وقبيح ظهر بوضوح بعد الثوره وشفت ده في عيون ناس كتيره وشفت ناس تانيه علي حقيقتها بالاضافه ان مات من لم يكن يستحق الموت من اجل ان يحيا من لا يستحق الحياه 



 
- بتحب السينما؟
مقدرش اعيش من غيرها لو كانت السينما امراه لتزوجتها

السينما هي كل حاجه حلوه  خليط من مزيكا ونص ادبي واداء ممثلين وصوره حلوه وفكره وتاثير نفسي بالاضافه انك بتشوفها جوه معبد كانك رايح تصلي تتلقي طاقه روحانيه تخليك احسن 

حتي لما تشوف فيلم علي التلفزيون تلاقيك سبت كل حاجه وقعدت ادامه حتي لو شفته ستين مره بس بتقعد ادامه وانت عارف هيخلص علي ايه
 

- القراءه
مدمن كتب وللاسف مسلف نص كتبي للناس منهم واحده واخده مني 10 كتب لوحدهم بقالها سنتين القرايه بالنسبه لي بتخيل اللي بقراه خاصه لو روايه وكانني شايفها  القرايه مهمه وبكره موضوع ان الناس تقرا من علي الكمبيوتر نسخ pdf  مافيش متعه زي متعه النسخه الورقيه بريحه المطبعه وتقل الكتااب حتي لو الكتاب غالي بس بتحس انه شيء قيم وكنز


المزيكا؟

غذاء الروح
واقصد الموسيقي مش الاغاني   وخاصه ناس زي عمر خيرت وعمار الشريعي الله يرحمه وجون ويليامز وهانز زيمر

ربنا؟
بيحبني جدا وساعات كنت بغضب منه واحس انه ظلمني بس كان له حكمه في كل اللي بيحصل بس يكفي انه حفظني من شرور كانت بتتربص بيا واداني فرص كتيره علشان اتوب
علاقتي به زي اب وابنه انا عارف هو عايز مصلحتي  
 


ايه الكلام اللي شبه كلام المسيحيين ده ؟

مانت متخلف اقول ايه 



بتتظلم؟
من الناس مش من ربنا 
رؤسائي في الشغل مابيقدروش تعبي ولا اخلاصي وزمايلي بيظنوا فيا ظنون غلط حتي اهلي مش فاهميني 
وحتي اللي باحبهم بيفتكروا اني زباله 

الناس بقت بتاكل بعضها علشان كده اغلبنا مابقاش يستريح الا ف عوالم افتراضيه زي تويتر والفيس
زمان كانت المدونات هي ملجانا
 
 
_ بتحب الستات

محدش يقدر يعيش من غيرهم الستات مصدر النضج لاي راجل بتسببهم في اسعاده او حزنه  افضل من علموني في الجامعه كانوا ستات عميدتنا كانت واحده ست بس فيه ستات تانيين عايزين الحرق بالجاز او ضربهم بمترليوز عندي مشكله ان كان نفسي يبقي ليا اخت اكبر مني اصاحبها واحكي لها واخد نصيحتها  امي مهما كانت من جيل غير جيلي مش هتفهم حاجات كتيره بس مبحبش البنات اللي اصغر مني دايما بحب القريبين مني في السن او اللي ااكبر مني يمكن عندي عقده نفسيه ومابحبش البنات البيور او الخام غالبا بحب واحده كان لها تجارب او كانت متزوجه او مخطوبه  بحس انهم انضج واعقد ويقدروا يحتوووني  مش مؤمن بالبراءه بحس انها مزيفه يمكن كلامي مش منطقي بس انا كده 
مبحبش البنت التقليديه اللي من وهي في صغرها مجهزينها تبقي عروسه وست بيت وفي نفس الوقت مبحبش البنت اللي كل همها شغلها ودراستها ومستقبلها نفسي في بنت تجمع الاتننين 
مبحبش الرومانسيات اللي مقضيينها اشعار واغاني وكتب للوليه احلام مستغانمي او احسان عبد القدوس ويوسف السباعي 
ومش عايز واحده تكون بتسمع ميتال مثلا وداخله عليا بسيجاره ماريجوانا او بتخمس بعربيتها ( بالمناسبه بكره سواقه البنات ومبحبش البنت اللي بتسوق )



 
_ حبيت كام مره

 مره واحده  قعدت تلات سنين

_ مكملتوش ليه؟

علشان الناس بتتدخل وعلشان الزمن بيغير وعلشان انا عملت غلطات وهي كمان وفي الاخر ربنا عايز كده مافيش نصيب



- بيقولوا مش لازم كل قصه حب تخلص بالزواج

بيقولوا الوقت بيقتل الحب علي راي فيروز 

اتدايقت علشان فتحت السيره دي ؟
اه بصراحه

- انا اسف
ولا يهمك

.................

.................


- هنفضل ساكتين
لا اتفضل انا معاك

جرحت حد؟
اه ومكانتش تستاهل اللي عملته فيها استغليتها علشان اداوي نفسي من حد جرحني  وكمان هي بريئه جدا ومكنتش متخيل ان لسه فيه حد محتفظ بنقاوته للدرجه دي وخلتني احتقر نفسي

وواحده تانيه بعزها وطول عمرها جدعه بس بابقي قاسي معاها مش عايزها تتعلق بيا لاني بعتبرها صديقه عزيزه

بتعرف تكتب قصص قصيره حلوه
بس مابقتش اعرف زي زمان موهبتي راحت للاسف  وزي ماقلت لك فيه ناس اصغر مني موهوبه فشخ  الكتابه محتاجه ممارسه علي طول وانا مبطل كتابه بقالي اربع سنين  من بعد ماماتت عمتي الله يرحمها علشان كان فيه قصه عنها وكنت حاسس احساس طفولي اني واحد من اسباب موتها


_ بتحب تكتب امتي ؟

الساعه 3  الفجر وانا بسمع مزيكا البرنامج الموسيقي العام ا


-انت دقنك مش مشذبه  مع ان شكلك احلي بكتير من غيرها
مش فارقه وبعدين  انا شكلي بيبي فيس للاسف


-انت مريض نفسيا

ده حقيقي



- الجنس ؟
مش هعرف اتكلم عنه بس مهم وضروري مش علشان افراغ طاقه وشهوه لكنه وسيله تخليك تحس انك حي وبتتنفس وسعيد مع الانسانه اللي بتحبها وطبعا يفضل يكون في اطار شرعي مش علشان خوف من ربنا  وكده لا بس علشان الاستقرار  النفسي وعلشان متكونش نزوه مؤقته  مافيش اروع من انك تصحي كل يوم جنبك الشخص اللي انت اخترته وفي حضنك  اللي انت بتستريح له ونفسك بتسكن له   والناس اللي بتمارس الماستربيشن  ده مش جنس دي حاله اكتئاب انت بتحاول تطلع منها  بس مش هقدر اقولهم حرام او بطلها  لان اللي فيهم مكفيهم




الرقص؟

انا مبشوفش الا رجاله بترقص بيستعرضوا طاقاتهم الجامحه في الافراح وبيبسببوا عقد للبنات لان فيه نسبه كبيره من البنات مابتعرفش ترقص ومعرفش هيتزوجوا ازاي ويبسطوا ازواجهم  فعلشان كده تلاقي اغلب صحابي بنقعد نتفرج علي التت قبل مايقفلوها علشان نندب حظنا

 

- بتؤمن بعوالم تانيه؟
طبعا انا قعدت لغايه تالته اعدادي مؤمن بحلقات ال x files  واننا مش لوحدنا في الكون ونظام افلام سبيلبرج بقي

- لا اقصد عوالم في كوكبنا؟
اكيد بس مابحبش احطها تحت مسمي الجن والشياطين  انا مش خبير بده بس احمد خالد توفيق  وتامر ابراهيم اكتر ناس يقدروا يشرحولك


 
_ اعظم روايه قريتها؟

الجريمه والعقاب والمقامر  لديستوفيسكي  والبؤساء لفيكتور هوجو  وقد خاب وخسر من لم يقرؤهم
ثلاثيه غرناطه لرضوي عاشور 
غرفه العنايه المركزه لدكتور عز الدين شكري فشير
ذات و ورده لصنع الله ابراهيم
مائه عام من العزله لجابريل ماركيز 


مبتحبش باولوا كوييهلو؟
شايفه بيتفلسف زيلاده عن اللزوم وبعدين انا مؤمن ان اي روايه تحقق نجاح في الوسط النسائي اعرف علي طول انها مش حقيقيه لان النساء عاطفيات بيحبوا اللي بيغازل كبريائهم او مشاعرهم زي المسلسلات التركي كده مع احترامي لاي واحده بتحب باولوا كويهلوا بس واحد زي ديستوفيسكي  اعتقد ان مافيش اديب وصل لعظمته في الكتابه عن النفس البشريه بكل تقلباتها وسبر اغوارها    من الاخر باولوا ده راجل بيض



لك صحاب ملحدين؟
طبعا زي ماليا صحاب شيوعيين ومسيحيين وجهاديين اسلاميين
علي فكره انا اقدر اتعامل مع كل التيارات  معنديش مشاكل معاهم انا بتعامل معاهم كبشر مش كعقيده او فكر



انت شايف ان كتابااتك متواضعه؟

هو انا شايفها عاديه وحقيقيه مبحاولش اتصنع او ادعي انا بكتب ببساطه وبصراحه انا بتعلم من اي حد بيكتب احسن مني وبحب اقرا وبتبسط لما الاقي حد عرف يعبر عن اللي عايز اقوله بشكل افضل


انت بتكتب بايد واحده ليه؟

معرفش انا بكتب بصباع واحد بس بقالي تمن سنين بايدي اليمين مبعرفش اعمل زيكم 



شايف نفسك مدون ناجح؟
لا مش ناجح بس جت فتره مابين 2009 و 2010 وبقي ليا ناس بتتابعني وتعلق عندي وبقيت موجود عندهم في ليسته الفولو وناس تحكي عني  لغايه ماوصل عدد اللي بيتابعوني ل 173 وعو عدد ضئيل بس انا راضي بيه زي عدد اللي عاملين لي فولو علي تويتر 118 بس  


معملتش ليه زي المدونين اللي بيحولوا تدويناتهم لكتب؟

محبيتش الا رحاب بسام وغاده عبد العال الباقيين فشلوا ومتفاعلتش معاهم ورقيا  يمكن الافضل لهم يخلوم رقميا او ديجتال

وبعدين انا مش هضيف جديد  الكلام ده كان ممكن قبل الثوره لكن دلوقتي كل الكتابات متشابهه  





انا سمعت انك كنت هتتعاقد مع دار نشر؟

ده حقيقي كان مع يحيي هاشم صاحب دار دون  كنت هشارك في معرض الكتاب بتاع يناير 2011  وكنت هطبع علي حسابي  اتعرفت عليه عن طريق ياسمين ومحمد اصحاب كتاب ماوراء الزجاج  بس الظروف بقي اللي حصلت وانت عارفها




الاخوان؟

ربنا يسامحهم ا  بكرههم علشان بوظوا الثوره بكرههم علشان الاستفتاء وعلشان التخاذل اللي عملوه معانا في محمد محمود  اللي كانت فرصه لاسقاط المجلس العسكري وتصحيح مسار الثوره  وطبعا بكرههم علشان جابوا لنا مورسي 


انت شايف البلد رايحه علي فين؟

معرفش بس هي راحت خلاص ممكن تسال دكتور عز الدين شكري فشير لو كان مخبي عننا اللي حصل بعد احداث روايه باب الخروج 
بس انا فعلا مابقتش احب البلد بقيت كارهاا ومش عارف اتواصل معاها بقت مكان قميء او يمكن انا اللي بقيت سوداوي زياده عن اللزوم

ناس تدين لهم بالشكر والفضل؟

عمتي الله يرحمها  اسماء
امي
ستيفن سبيلبرج
اسامه انور عكاشه
محمود قاسم بتاع سلسله اجمل حكايات الدنيا لو حد فاكرها 
وحيد حامد
احمد خالد توفيق
مارتن سكورسيزي
دكتور مصطفي محمود
ابويا رغم انه دكتاتوري
دكتور عادل
ولاد عمتي خالد واحمد وطارق
صحابي
انتوني هوبكنز
بطوط
 خالد الصفتي
طنط دريه شرف الدين
ابله جيهان بتاعه العربي في خامسه ابتدائي


_ انت بتهرج؟

والله انت متعرفش دول اثروا فيا ازاي


- اهم سنه اثرت فيك ؟

2010  السنه اللي سبت فيها الماستر واللي حسيت فيها بالامل وعرفت ناس كتيره غيروا حياتي بعد كده سواء بالسلب او الايجاب واتطورت جدا فيها  وشيلت مسؤوليه لاول مره تجاه انسان والسنه اللي اتولد فيها حسن ابن اختي السنه اللي خلص فيها مسلسل lost  واللي حضرت فيها حفله عمر خيرت في الاوبرا واللي اتعمقت فيها صداقتي بشله بيت الشمس وقضيت احلي رمضان فيها والسنه اللي اتنقلت فيها في مجال تخصصي في الشغل لنقله افضل


اجمل ايام عشتها؟

1 يناير 2011  في اسكندريه بغض النظر عن الحادث المؤسف بتاع القديسين

25 يناير 2011 لغايه 11 فبراير

رحله الواحات بتاعه نوفمبر 2011
اول يوم من محمد محمود 18 نوفمبر 2011
فرح فاطمه ومالك مايو 2011

يوم القاهره الفاطميه في ديسمبر 2009



-كلهم في 2011؟ يبقي اكيد كانت سنه حلوه؟

يمكن تصدق اول مره اخد بالي 



امال ماش شايف ليه انها سنه مهمه؟
-بحاول اسقطها من الحاجات المهه 



لا والله؟
اه والله 


- حبيت الشتا اللي فاات
فوق ماتتخيل

غلطه الثوره؟
ان احنا مطلعناش علي قصر العروبه بعد 28 يناير وكنا خلصنا الموضوع وكان لازم نعمل محاكمات ثوريه ومجلس رئاسي  وان احنا سكتنا علي طنطاوي 


اخر مره عيطت ؟
يوم مامات محمد يسري سلامه علشان الكلام اللي اتقال عليه والناس اللي جابت في سيرته  والمره التانيه علشان حد مايستاهلش
اكتر فيلم حبيته السنه دي ؟

les miserables  لانه بيتكم عننا  من اول مشهد
انا شفت الفيلم حوالي تسع مرات ورا بعض  المزيكا اللي فيه مش طبيبعيه الاغاني حماسيه جدا 

-بتحب تسمع لمين"
فيروز وام كلثوم طبعا 


بتشيش ليه؟
لما بحس اني وحيد ومكتئب بشيش انا مبشيششش كل يوم انا بعملها مره في الاسبوع  جت عليا فتره كنت مش قادر ابطل وكنت هموت بسببها  بس الشيشه بتخلي دماغي صافيه وبهدي انا ماقةلتلكش اني بشجع التدخين بالعكس هي مضره بالصحه ومبنصحش حد بها  بس مخبيش عليك بستمتع بها 

الشتا؟
لو كنت بتحكم في المناخ كنت خليت  كل ايام السنه شتا  فكك من الصيف والربيع والخرف ده مش ناقصه عرق وحر ورطوبه وبنات بتلبس ياحبيبي مافيش وكفايه علي دهان جسمها بالورنيش

_ الحجاب
هو ده حجاب اللي انت شايفه؟
النقاب؟ مبحبهوش  بس بحترم المنتقبه  بس ياريت متبينش عينيها المتكحله ورموشها الصناعيه والبرفايوم بتاعها وبلاش عبايات محزقه علشان كده  بتهيج اكتر
 
انا حصلت لي مشكله بسبب واحده منتقبه في الشغل وعلشان كده قافش منهم
 
- بس الحجاب فرض ولازم علشان عفه المراه وكده
ده بجد؟ العفه مش مرتبطه بحجاب ولا نقاب المهم النفس عامله ايه من جوه 
 
انا مبتدخلش في حريه حد بس ميكونش بيتك من ازاز وتحدف الناس بالطوب متدعييش يااختي المتدينه انك ملاك وتهاجميني وانتي فيكي كل العبر علي الاقل انا مبدعيش اني متدين ولا قولت علي نفسي كده  ومش معني اني متحرر او زي مابتحبي تطلقي عليا ليبرالي  اني عايز واحده عربيده او زنديقه  متحاوليش تبقي مزيفه لان اغلبكم بيعاني من التناقض  لو الناس تخليها علي طبيعتها وفطرتها وتبطل ترسم اقنعه لنفسها  هتستريحوا انتم نتيجه مجتمعات اتربت علي قيم متناقضه ومفاهيم مغلوطه
 
 


جمعيه رساله؟

حسيت ان مبعملش دور كبير فيها ومابقتش فاضي بس صدقني فعل الخير والمساهمه فيه شيء رائع  انا بقالي اربع سنين موقف نشاطي فيها


الفيس بوك ولا تويتر؟

الفيس بوك هو موقع تواصل اجتماعي مع الناس والصحاب تعرف اخبارهم تسمع الافكار تهرجوا تتكلموا تتبادلوا الخبرات تتقابلوا  الاجمل انك تنقل العلاقات اللي عليه من علي الكمبيوتر للواقع وتستمر العلاقات دي

تويتر بعرف اقول اللي عايزه هناك بدون رقابه مخبيش عليك انا سافل او نفسي ابقي سافل


ليه بحس ساعات ان عندك رغبه تبقي منحط او فاسد او شرير؟

ده حقيقي يمكن علشان انا طيب وده نقطه ضعفي ويمكن علشان معرفتش اخد حقي فالشر هو الوسيله اللي تخليني انتقم والناس تخاف مني وياريت بقي لو كان معايا سلطه كنت استعملت نفوذي وسويت الهوايل
اكيد عندي رغبات مكبوته وعندي نصف مظلم  واكيد الشر ممتع لانك بتكسر تابوهات وحواجز وقواعد

بتخاف من ابليس؟
لا بخاف من نفسي علشان اماره بالسوء ابليس مالوش دور غير انه بيمسح التراب عن الوساخه اللي موجوده فيك اصلا ويصحيها مابيعملش دور كبير زي ماغلب الناس متخيله ومؤمنه بالعكس ده مظلوم وانا متعاطف معاه جدا لان البني ادمين اكثر شرا من ابليس

شكلك متاثر بعزازيل؟

من اجمل الروايات واحبهم لقلبي

بس انت مش شرير ؟

بص انا مش شرير بس انا بحاول اعمل زي مامارك زوكبيرغ اتقال له في فيلم the social network

" u r not an ass hole but u r trying so hard  to be"


- عارف الانسان بيقابل مين في اخر المطاف؟
بيقابل نفسه 
قديمه من فيلم الاختيار


كان نفسك يبقي اسمك ايه؟
علي  زي علي البدري اقرب شخصيات عكاشه ليا


ايه الفيلم اللي بتعتبره الكتاب المقدس لجيلكم؟

fight club\  فيلم متمرد


روايات  غير عاديه؟

انجيل ادم لمحمد علاء وان تكون عباس العبد لاحمد العايدي




بتحب قراءه الافكار ؟

انا اصلا عندي القدره دي بس مش بنفس المعني ومش بتحكم فيها بس نوع من الشفافيه لكنك مالكش ايد فيها بتحصل تلقائيا وبشكل متكرر  بس ساعات تبقي لعنه لانك نفسك ظنك يخيب ومش كل اللي انت حسيته وشوفته يتحقق علشان فيه حاجات مش عايزها تحصل او اتاكد منها او تطلع صح




اكتر جملتين بتكررهم؟

لماذا لا يموت اولاد الو....

واولاد الاحبه لا استثني منكم احدا


-انت قليل الادب
a7a حد قالك غير كده


-انا مش فاهمك  انت متناقض تماما
انا مش عارفني انا تهت مني انا مش انا


المهم نرجع كنا بنقول ايه
اه


_ باسم يوسف ؟
بحبه بس ساعات بيبالغ وبيبوخ  بس كان نفسي ماينضمش للسي بي سي كنت بحبه اكتر ايام اون تي في واليوتيوب بس شغله مع قنوات الفلول قلل كتير من احترامي له 
بتقرا جرايد؟ بقالي فتره بس باحب الشروق 
المكتبات المفضله لك؟
ديوان والشروق  

ايه حكايه الجبال؟
بعشقها  بحب منظرها بحب اتسلق الجبال بحسها تحدي وبانتشي لما اوصل لاعلي نقطه وبانتشي اكتر لما انزل بحس اني بطير 

بتحب شغلانتك؟
دكتور السنان شغلانه مش حلوه الاو انت عايز تبدع في تخصص معين وتعالج الناس وتقدم لهم خدمه وتخليهم مبسوطين  اما لو هتعتبرها فلوس وبس هتتخنق بالاضافه انك تستحمل تشتغل في اسوا منقطقه في جسم البني ادم بافرازاتها ودمها وريحتها  ومنطقه ضيقه مظلمه وبتاخد منك مجهود كبير 


نفسك في ايه؟
اروح اسوان
اعمل عمره
اروح اسبانيا وفرنسا
نفسي  انط من طياره ومعايا براشوت واطير
نفسي نطاتي تكون عاليه زي سوبر ماريو
نفسي يكون معايا فلوس كتيره تخليني معتمدش علي الشغل واحمل هم الرزق ويبقي فيه ضغط علي اعصابي
نفسي اخلف بنت بجد
نفسي اموت قبل امي انا مبابينش لها حبي ولا باحضنها بس متخيلش العيشه من غيرها امي كانت السبب اني اخاف عليها من تصرفاتي وكنت هاموت من الرعب وانا في المعتقل يوم 26 يناير كنت خايف يكون جري لها حاجه لو عرفت اللي حصل لي وكدبت عليها لما قلت لها مش هانزل يوم 28  ونزلت ولما روحت بالليل وووصلت الزقاازبق اول ماشافتني اغمي عليها وقعدت طول الليل حاضناني وحلفتني منزلش تاني وده كان سبب اني منزلتش يوم موقعه الجمل
 نفسي افرحها لما اتزوج علشان هي نفسها تشوفني متزوج 



طارق؟
انتيمي بينرزفني كتير وبابقي عايز اضربه بس جدع وبحبه جدا واقدم صحابي وبيعرف يتصرف في مواقف كتيره  هو بس يبطل الهبل بتاعه اللي بيخليني اسب له
عمرو؟
اصغر مني بسنتين بس باعتبره اخويا الكبير بيفهمني كويس جدا ونصايحه مفيده  برتاح له بشكل غريب

خالد؟
 خالد
عايز كتاب لوحده اتكلم عنه شخصيه معقده ثريه جدا فيها كل المتناقضات  شخصيه دراميه جدا  مخلص جدا مثفف جدا له مباديء ومعتقدات مبيتخلاش عنها عيبه انه بيدخن بشراهه وعصبي جدا لكنه من جواه طيب ومتفهم وله دور كبير في انه انقذني من الموت اكتر من مره نفسي يتواصل اجتماعيا مع الناس مش يقضيها سياسه ويشوف نفسه  نفسي بجد اشوفه مبسوط ويفكه بقي من اللي هو فيه


محمد امين راضي ؟
موهوب فشخ  انا متوقع انه يبقي اسامه انور عكاشه التاني   بيمثل لي حاجات كتيره كان نفسي تكون فيا رغم انه متقلب كل شويه مره تلاقيه مكتئب ومره تلاقيه بيضحك
والسنه دي هتبقي فاتحه خير عليه  واكتر حد بزعل اني دايقته وياما اتخانقنا بس رجعنا تاني  هو مغرور مش هنختلف في ده وعنده صفات برج الجوزاء  ولسانه بسم الله ماشاء الله ميتوصاش


شله بيت الشمس؟

بحب لمتهم اووي  كلهم  ال الكاشف وفتحي واسامه وسها وعبير ومي وابو كمال وشفيع وعبعظيم  بحسهم اهلي

فيليب

صدق او لا تصدق انا بقالي شهرين مبكلمهوش واستندلت معاه وطلعت عيل سيس بس انا باعتبره رب اخ لم تلده امك 


مروه ؟ 

روميتي او سعاد  زي مباحب اقولها  رب اخت لم تلدها امك برده   ربنا يحقق لها اللي هي عايزاه علشان هي صبوره وتستاهل كل خير 

عبير عاصم؟
جدعه فشخ  ومجنونه بس بحب جنانها  اختي الصغيره بجد


محمد العايدي ؟

اخويا الصغير بيحبني بجد ساعات كنت بستندل معاه بس هو عمره ماستندل


طيب و ....?

بلاش لو سمحت


خايف من ايه؟

خايف اني اتغير للاسوا انا فعلا اتغيرت كتير بس مش عايز افقد انسانيتي مش عايز ابقي الشخص اللي الناس عايزينه انا عايز ابقي نفسي حتي لو فاشل في نظرهم  لان النجاح عندي مش في الشغل ولا الشهادات ولا الزواج والخلفه او فلوس او منصب ا

انا عايز ابقي انسان بسيط بس باعمل الي عايزه ومحدش يتدخل في حريتي ولا حياتي اعمل اي حاجه بحبها من غير ماابقي خايف





                                                             سجل مع علي سليم ...... الاربعاء  الثالثه فجرا  1 مايو 2013








هناك 8 تعليقات:

غير معرف يقول...

حوار نوعاً ما صريح.
يحى هاشم صاحب دار اكتب مش دون على فكرة....إمممم أنت شايف أن 173 متابع قليل - أنا مستغربة أن عندي 25 نصهم ماتوا تقريباً.
أنت عايش الحالة اللي الكل عايشها- متستغربش نفسك قوي كدة.

فافى يقول...

طبعا مفيش وقت اقرأ كل البوست لكن لذيذ وتخيلت نفسى بجاوب على بعض الاسئله دى هو مين اللى بيحقق معاك ده ؟! :)

Unknown يقول...

هايله ومبهرة ايه الصدق ده

الازهرى يقول...

حرام عليك اللى عملته فى نفسك دا وربنا :)

غير معرف يقول...

أنا في يوم اتعرفت على جمعية رسالة
وربنا أراد إني أروحها. وأروح في طرق خير تانية بعدها

لما في يوم سألت عن الجمعية دي

وحضرتك رديت في المنتدى

واديت اللينك للجمعية نفسها وإزاي نقدر نعرف عنها. لما سألت. عن إني نفسي أتشجع في عمل الخير في منتدى كنا مشتركين به

ربنا يجزيك خير. ويجعل ده في ميزان حسناتك يارب

ويحفظ لك أهلك بخير وعافية

الله يكرمك

السلام عليكم ورحمة الله وبركاته

sony2000 يقول...

نفسي اعمل زيك كدا واجاوب علي الاسئله دي
بس متهيالي مش هعرف

Maad Maan يقول...

انا اول مره اشوف مدونتك دي النهارده
و اشكرك جدا علي مقالك ده
انا ما أعرفش انت مين ولا منين بس اشكرك لأن مقالك فيه حجات شبهي
كفايه انك ذيي شايف ان ابليس " أهبل " و الناس مشيلاه فوق حجمه - او شايف ان ممكن يحصل تعايش بين الناس كلها مع اختلاف العقائد او ان ابوك ديكتاتور :)
بجد أشكرك علي المقال ده
و اتمنالك كل توفيق و اتمنالك الثبات علي موقفك خصوصا الزواج :) و نصيحه بلاش تتجوز خالص
اشكرك جدا علي مقالك ده - جدا جدا جدا جدا جدا

Karim Gaber يقول...

مكنتش متصور انى ممكن اعرف حد من شويه كلام مكتوب
معرفتش اسيب البوست رغم انه طويل اوى :D
الا قبل حته رسايل من القلب للقلب :D

شكرا ليك انت وال الاخ علي :)