الجمعة، 29 أغسطس، 2014

نشاطركم الاحزان


 في المجتمع اللي بيسمي مجتمع "النشطاء" (سواء سياسيين او حقوقيين او اي كان) بشوف معاني للصدق و الحب والوفاء والصداقة والشهامة والإخلاص والجدعنة ميعرفهاش البؤساء اللي بيتريقوا علي النشتاء و بيقولوا عليهم بتوع سبوبة. الدموع والبكاء المكتوم النهاردة... الحسرة علي فقدان حاجات كتيرة غالية... الكسرة والحزن الدفين... صعب ترسم الخط بين الشخصي والعام... هي دي البوصلة اللي انا ارتضيتها لنفسي. اللهم دمها نعمة

كتبتها هدي محمود 

............





فيه سببين خلوني اروح جنازه احمد سيف الاسلام المناضل الشيوعي المحترم 

اولهم ان الراجل من الناس النضيفه المحترمه اللي متغرتش ولا باعت نفسها وكان دايما نصير الفقراء والمظلومين وعلشان ولاده علاء وسناء اللي في السجن بتهمه التظاهر  لا سرقوا ولا قتلوا ولا افسدوا 

السبب التاني اني كنت رايح وعايز اشوف كل الناس اللي اعرفها من اربع سنين الناس اللي لهم نفس افكاري وبيحلموا احلام شبه احلامي وجمعنا مره الميدان يوم 25 من اربع سنين وفيه منهم زمايل ومنهم اصحاب اتبدهلنا سوا وكان لنا حلم اسمه الثوره ومصر كنا عايزينها غير مصر بتاعه مبارك او مرسي او العسكر 

احنا مانتفعناش بالثوره ولا كان لنا اغراض الا ان الناس تعيش احسن كنا عايزين العدل والحق والكرامه للناس كلها كنا عايزين المجرم والقاتل ياخدوا جزائهم ومافيش قدامنا الا التظاهر ونقول صوتنا وكان دايما مبدانا السلميه 



انا بقالي سبع شهور ماليش اي نشاطات سياسيه ومقاطعها لكن وحشني الناس اللي شاركتهم الحلم وشفت خالد وعبير وفاطمه عابد وساره محسن وقابلت بعدها صحابي شله السينما ولسخريه القدر قعدنا ف الميدان التحرير بالليل اللي بيحرسه عسكر النظام الجديد واللي مابقيتش شايل له اي ذكريات ولا فاكر حاجه عنه لانه مش هو اللي اتقابلنا فيه من اربع سنين في يوم جميل  بس كان فيه كسره في وشوشهم وحزن حقيقي ودموع مانشفتش يمكن ماقدرتش احزن زيهم لاني ماكنش مقرب من الراجل زيهم وماقابتوش الا مرتين بس ف حياتي لكني كنت حاسس بهم كلهم 

مافيش اجمل من كم الناس اللي حضرت اسلاميين وسطيين اشتراكيين ليبراليين مسيحيين علمانيين كلنا استنينا ادام الجامع وصلينا علي الفقيد ودعينا له لانه كان اب لنا كلنا يمكن ماحزنتش علي حد كده من سنه ونص من ساعه موت دكتور محمد يسري سلامه

الكلمتين اللي نقلتهم فوق نقلا عن هدي قالت اللي انا مش عارف اعبر عنه من امبارح 

وشكرا لكل من بيقول علينا كولجيه او شمامين كوله

شكر الله سعي كل من حضر اليوم وتبقي اخر الاحزان

هناك 6 تعليقات:

فاتيما يقول...

انا كنت هناك يا ليكتر ..
كنت زيك
مقاطعة كل حاجة
بس روحت عشان اكون ف وداع راجل حبيته
من غير ما اقابله
لكن بحترم كل حاجة عملها
وبحب ولاده وبقدر تضحياتهم والبراءة والصمود
كنت زيك ..
عارفة ان الاحباب هناك
وحبيت اكون معاهم ووسطهم
من غير حتى ما اكلم حد او اقول حاجة
وقفت لحد ما خرجوا بيه م المسجد
لكن مقدرتش اروح المقابر
لأنى خفت اركب لوحدى تاكسى
وخفت كمان اطلب من أى حد ياخدنى معاه
ليقلقوا منى وانا كمان اقلق منهم
فروحت
بس كنت هناك
ف الشوية اللى من خروجه من المستشفى
لحد خروجه من الجامع ..
انا اتنفست شوية هوا نضيف من بتوع زمان ...
دعيتله كتير
ولسه ان شاء الهل هدعيله
وقعدت اقولى .. لسه هنكمل
من العبث ان الراجل دا واللى زيه
يموتوا ناقصين حلم
واحنا منكملشى
طب هوه والمرض والموت شده ..
احنا عذرنا اه ؟؟
بعد اليأس وشوية وجع وخيبة امل
وحاجات كتير ...
هنرجع تانى
ونحاول
طول ما احنا فينا نفس
حتى لو ملحقناش يا ليكتر ..
يكفينا المحاولة
عارف
انا لو مش هعيش زى ما بتمنى
لنفسى ولغيرى ولأبنى
مش مهم ..
بقيت دلوقتى بفكر ف بعدين
لأن العيشة اتفه مما الواحد بيتصور
لو رضخ لقوانينها
وساب مبادئه واحلامه واتخلى عنها
عارف
انا مش لو م نافع اعيش زى ما بحب
فنا عاوزة اموت زى الراجل دا ..
عاوزة الناس تفتكرنى الخير
وتترحم عليا
وتشوفنى نضيفة
ويفضل السيرة لحلوة
اللى تخلى غيرى يتشجع ويكمل

لو مكملناش نبقى بترنا حلمه
هوه وغيره من المخلصين
وانا مش ناوية اعمل كدا


وحشتنى
ووحشنى اكتبلك
:)


البقاء لله
والبركة ف ولاده وفينا
نكمل حلمه ...

dr.lecter يقول...

مش معقول يافاتيما هو انا مش مكتوب لي اقابلك خالص؟
انا برده مارحتش المقابر كان عندي امل اشوف علاء وسناء وقلت الداخليه مش هتطلعهم بس عرفت بعد كده انهم جم الترب
انا نفسي لما اموت ابقي زيك الناس تفتكرني بالخير فعلا

مفتقدك بجد ومفتقد كلامك ويارب اشوفك في يوم من الايام

فاتيما يقول...

هيحصل
والله ليحصل ...


هنتقابل ان شاء الله
يمكن ربنا مش رايد نتقابل دلوقتى
عشان مشغولين بحاجات تانية
مش مريحة ولا حلوة
وعمالين بنجرى ونحبط
ونيأس ونرجع نحاول
ونتعب وطول الوقت بنعافر ..
يمكن مكتوب نتقابل
لما ييجى وقت الراحة
يمكن

عارف ..
انا محوشاك ليوم فرحة
آه
مش عاوزة اشوفك وانا زعلانة
يارب قريب
دا يحصل ...

والله ليحصل
:)

dr.lecter يقول...

بقالنا اربع سنين بسمع ده بس لسه عندي امل

dr.lecter يقول...

بقالنا اربع سنين بسمع ده بس لسه عندي امل

فاتيما يقول...

وانا كمان يا ليكتر
انا كمان